2020 ވަނަ އަހަރުން ފެށިގެން ދިވެހި އިޤްތިސާދުގައި ދައުުރުވާ ދިވެހި ރުފިޔާގެ ނިސްބަތް، 178 އިންސައްތަ އިތުރުވެފައިވާ ކަމަށާއި، އެ ފައިސާ ދައުރުވުން މަދުކުރުމަށް އޯޕަން މާކެޓް އޮޕަރޭޝަން (އޯއެމްއޯ) އެއް ފަށައިފައިވާ ކަމަށް މަރުކަޒީ ބޭންކް، އެމްއެމްއޭ އިން ބުނެފިއެވެ.

އެމްއެމްއޭއިން އެހެން ބުނީ، މަނިޓަރީ ސިޔާސަތުގެ ދަށުން ފާއިތުވި އަހަރުތަކުގައި އެމްއެމްއޭއިން އެޅި ފިޔަވަޅުތަކާ ގުޅޭ ގޮތުން މިއަދު އެ ބޭންކުން ނެރުނު ނޫސް ބަޔާނުގައެވެ. އެގޮތުން އެ ބަޔާނުގައި އެމްއެމްއޭއިން ވަނީ ރާއްޖޭގެ އިޤްތިސާދީ ޙާލަތާއި، މަނިޓަރީ ސިޔާސަތުގެ ދަށުން ރާއްޖޭގައި އޮންނަ ބޭރު ފައިސާގެ ޑިމާންޑާއި ސަޕްލައިގެ މިސްމެޗުގެ ޙައްލާ ގުޅޭ ތަފްސީލީ މަޢުލޫމާތު ހިއްސާކޮށްފައެވެ.

Ad by Hajj Corporation

އެގޮތުން އެމްއެެމްއޭއިން ބުނީ، އިޤްތިޞާދުގައި ދައުރުވާ ރުފިޔާގެ ލިކުއިޑިޓީ 2020 ވަނަ އަހަރާއި އަޅާބަލާއިރު %178 އިތުުރުވެފައިވާ ކަމަށާއި، އެހެން ނަމަވެސް ބޭންކުތަކުން ޓީ-ބިލް އަދި ޓީ-ބޮންޑްގައި އިންވެސްޓްކުރުމާއި ރުފިޔާއިން ދޫކުރާ ލޯނު އިތުރުވުމުގެ ސަބަބުން، 2024 ވަނަ އަހަރު ބޭންކިން ނިޒާމުގައި އިތުރަށް ހުރި ރުފިޔާގެ ލިކުއިޓީ ކޮންމެވެސް ވަރަކަށް ދަށަށް ދިޔަ ކަމަށެވެ.

އެގޮތުން، މި އަހަރުގެ ޖޫން މަހު ބޭންކިން ނިޒާމުގައި ރުފިޔާ ލިކިއުޑިޓީގެ ގޮތުގައި އެވްރެޖްކޮށް ހުރީ 7.0 ބިލިއަން ރުފިޔާ ކަމަށާއި، އެ އަދަދަކީ އަހަރުން އަހަރަށް ބަލާއިރު، 2 އިންސައްތަ އިތުރު އަދަދެއް ކަމަށް އެމްއެމްއޭއިން ބުންޏެވެ.

އެމްއެމްއޭއިން ބުނީ، ބޭރު ފައިސާގެ ބާޒާރުގައި ޒަމާނުއްސުރެ އޮންނަ ޑިމާންޑް އަދި ސަޕްލައި މިސްމެޗްއަށް ހައްލެއް ހޯދުމުގައި މިދިޔަ އަހަރު އެކުލަވާލި ބޭރު ފައިސާއާ ބެހޭ ޤަވާއިދު އަދި ބޭރު ފައިސާއާ ބެހޭ ޤާނޫނު މުހިންމު ރޯލެއް އަދާކުރާ ކަމަށެވެ.

އެގޮތުން އެ ޤަވާއިދުގެ ދަށުން ލިބޭ ފައިސާއިން ލިބޭ ޢާމްދަނީ، ރާއްޖޭގައި ހިފެހެއްޓި ހަރުދަނާކޮށް ބޭރު ފައިސާގެ ލިކުއިޑިޓީ އިތުރުކުރުމުގެ ގޮތުން ބޭރު ފައިސާއިން އާމްދަނީ ލިބޭ ފަރާތްތަކުގެ ބޭރު ފައިސާގެ އާމްދަނީގެ ޖުމްލަ އަދަދު ރާއްޖޭގެ ބޭންކަކަށް ޖަމާކުރުމަށާއި އޭގެ ވަކި މިންވަރެއް ރާއްޖޭގެ ބޭންކިން ނިޒާމަށް މާރުކުރުމަށް ޤާނޫނުން މިހާރު ލާޒިމުކުރާކަން އެމްއެމްއޭއިން ފާހަގަކުރިއެވެ.

އަދި 2024 ވަނަ އަހަރުގެ އޮކްޓޫބަރު މަހުން 2025 ވަނަ އަހަރުގެ މޭ މަހުގެ ނިޔަލަށް ބޭރު ފައިސާއާބެހޭ ޤާނޫނާއި ގަވާއިދުތަކުގެ ދަށުން ކޮންމެ ހަފްތާއަކު ބޭންކުތަކަށް މާރުކުރާ ފައިސާގެ ތެރެއިން 60 އިންސައްތަ އެމްއެމްއޭއަށް ވިއްކުމަށް ޤާނޫނުގެ ދަށުން އެކުލަވައިލާފައިވާ ސިޔާސަތުތަކުން ބޭންކުތަކަށް އަންގާފައިވާނެ ކަމަށާއި، އޭގެ އިތުރަށް 30 އިންސައްތަ ޤާނޫނުގެ ދަށުން އެމްއެމްއޭއަށް ވިއްކަންޖެހޭނެ ކަމަށް ކަނޑައަޅައި، ބޭންކުތަކުން އިތުރަށް މާރުކުރާ މި 30 އިންސައްތަ އަލުން އަނބުރާ ބޭންކުތަކަށް ކޮންމެ ހަފްތާއަކު އެ އޮތޯރިޓީ އިން ދަނީ ވިއްކަމުން ކަމަށް ވެސް ބޭންކުން ބުންޏެވެ.

މީގެ އިތުރުން، އެންމެ މުހިންމު އެއް ފިޔަވަޅުގެ ގޮތުގައި ދިވެހި އިޤްތިސާދުގައި ދައުރުވާ ދިވެހި ފައިސާގެ އެކްސެސް މަދުކޮށް، ދިވެހި ރުފިޔާގެ އެކްސްޗޭންޖް ރޭޓަށް ކުރަމުންދާ ނޭދެވޭ އަސަރު ކުޑަކުރުމަށްޓަކައި އޯއެމްއޯގެ ދަށުން ރިވާސް ރީޕާޗޭސް އޮޕަރޭޝަންސް މިދިޔަ މަހުގެ 23 ވަނަ ދުވަހު ފަށާފައިވާ ކަމަށް ވެސް އެ ބޭންކުން ބުންޏެވެ.

އަދި އެކަމުގެ ތެރެއިން ބޭންކިން ނިޒާމުގެ އެކްސެސް ލިކުއިޑިޓީގެ ތެރެއިން 2.1 ބިލިއަން ރުފިޔާ މަދުކުރެވިފައިވާ ކަމަށް ވެސް އެ ބަޔާނުގައި އެމްއެމްއޭ އިން ބުންޏެވެ.

ދިވެހި ރުފިޔާގެ ޙާލަތު ރަނގަޅުކުރުމަށް ކުރަމުންދާ އިތުރު މަސައްކަތްތަކުގެ ތެެރެއިން، ސާކް ފްރޭމްވޯކް ގެ ދަށުން ރިޒާވް ބޭންކް އޮފް އިންޑިއާ (އާރްބީއައި) އާއެކު މިދިޔަ އަހަރު ވެފައިވާ ކަރަންސީ ސްވޮޕް އެއްބަސްވުމުގެ ދަށުން 400 މިލިއަން އެމެރިކާ ޑޮލަރުގެ ސްވެޕެއް ހަ މަސް ދުވަހަށް ނަގާފައިވާ ކަމަށް ވެސް ބޭންކުން ބުންޏެވެ. އަދި އެ ސްވޮޕް، މިހާރު އިތުރު ހަ މަސް ދުވަހުގެ މުއްދަތަަށް ރޯލްއޯވާ ކޮށްފައިވާ ކަމަށް ވެސް ބޭންކުން ބުންޏެވެ.

މީގެ އިތުރުން، އެމްއެމްއޭގައި ހުންނަ ބޭރު ފައިސާގެ މިނިމަމް ރިޒާވް ރިކުއަމެންޓް ދެ ފަހަރެއްގެ މަތިން ދަށްކުރެވިފައިވާއިރު، ހުސްވި މަހުގެ 24 ވަނަ ދުވަހު އެ އަދަދު ވަނީ 7.5 އިންސައްތައިން 5 އިންސައްތައަށް ދަށްކޮށްފައެވެ. އެކަމުގެ ސަބަބުން ޭރު ފައިސާގެ ލޯނު ދޫކުރުމަށް ބޭންކުތަކަށް ވަގުތުން ގާތްގަނޑަކަށް 45 މިލިއަން އެމެރިކާ ޑޮލަރު އިތުރަށް ލިބޭނެ ކަމަށް އެ ބޭންކުން އަންދާޒާކުރެއެވެ.