މުޅި ޣައްޒާ ހިފުމަށް ޔަހޫދީ ފައުޖުގެ ވެރިޔާވެސް ދެކޮޅު
7 އޯގަސްޓު 2025 - 09:44

ފަލަސްޠީނުގެ ޣައްޒާގެ ހުރިހާ ސަރަޙައްދެއް ޔަހޫދީންގެ އަތްދަށަށް ގެންދިޔުމަށް ޒަޔަނިސްޓުންގެ ހައްދުފަހަނަ އެޅި ބޮޑުވަޒީރު ބެންޖަމިން ނަތަންޔާހޫ ނިންމުމުން ޔަހޫދީ ފައުޖުގެ އިސް ވެރިޔާ އެ ކަމާ ދެކޮޅު ހަދާފައިވާ ކަން ހާމަވެއްޖެއެވެ.
މުޅި ޣައްޒާއަށް ވެރިވެގަނެ، އެ ސަހަރުގެ ރައްޔިތުން އަޅުވެތި ކުރުމަށް ޖައްބާރު ނަތަންޔާހޫ ނިންމާފައިވާ ކަން ހާމަވުމާ އެކު ބައިނަލްއަޤްވާމީ މުޖުތަމަޢުން ވަނީ އެކަން ވަރަށް ބޮޑަށް ކުށްވެރި ކޮށްފައެވެ. ނަތަންޔާހޫގެ ނިންމުމަކީ ޙަޤީޤަތަކަށްވާ ނަމަ، އެއީ ވަރަށް ބޮޑަށް ކަންބޮޑުވާ ނިންމުމެއްގެ ގޮތުގައި އެކުވެރި ދައުލަތްތައް (އދ)ން ވަނީ ސިފަކޮށްފައެވެ.

Ad by Hajj Corporation
ޣައްޒާއަށް އަތްގަދަކޮށް، ޣައްޒާގެ ރައްޔިތުން އަޅުވެތި ކުރުމަށް ނިރުބަވެރި ނަތަންޔާހޫ ހުށަހަޅާފައި މި ވަނީ، އެ ސަހަރުގެ ރައްޔިތުންގެ ނަސްލު ނައްތާލުމަށް ޔަހޫދީ ފައުޖުން ހިންގަމުންދާ ޤަތުލުޢާންމު ހުއްޓައިލުމަށް އިސްރާއީލުގެ އެތެރެއާއި ބޭރުން ނަތަންޔާހޫއަށް ބާރު އަޅަމުންދާ ދަނޑިވަޅެއްގައެވެ.
މި ވަގުތު ޔަހޫދީ ފައުޖުގެ ބާރުގެ ދަށުގައި ނެތް ސަރަޙައްދުތަކަށް އަތްގަދަ ކުރުމަށް މަސައްކަތް ކުރުމަކީ، ޔަހޫދީ ސިފައިންގެ ފުރާނަ އިތުރު ނުރައްކަލަށް ހުށަހެޅިގެންދާނެ ރޭވުމެކެވެ. އޭގެ ސަބަބުން، ޣައްޒާގައި ވެރިިކަން ކުރާ ޙަމާސް ޖަމާޢަތުގެ ބެލުމުގެ ދަށުގައި ބާކީ ތިބި އަސީރުންގެ ފުރާނައަށް ވެސް ނުރައްކާވާނެއެވެ.
ނިރުބަވެރި ނަތަންޔާހޫއާއި ޒަމީރާ ދެމެދު ބައްދަލުވުމެއް ބާއްވާފައިވާ ކަން ނަތަންޔާހޫގެ އޮފީހުން ކަށަވަރު ކޮށްދީފައިވީ ނަމަވެސް، އެ ބައްދަލުވުމުގައި ދެކެވުނު ކަމަށް ބުނާ ވާހަކަތައް ކަށަވަރު ކޮށްދީފައެއް ނެތެވެ. އެ މަޢުލޫމާތު މީޑިޔާއަށް ތިލަކޮށްދީފައި ވަނީ އެ ބައްދަލުވުމުގެ މަޢުލޫމާތު ލިބިފައިވާ ޔަހޫދީ ފައުޖުގެ މަޞްދަރުތަކުންނެވެ.
ޣައްޒާ ޢުދުވާނުގައި ޝަހީދު ކޮށްލާފައިވާ މީހުންގެ އަދަދު ވަނީ 61,000 އަށް އުފުލިފައެވެ. އޭގެ ތެރޭގައި ގިނައީ ކުށެއް ނެތް އަންހެނުންނާއި، މައުސޫމު ކުޑަކުދިންގެ އިތުރުން ހިނގާބިނގާވެ ނޫޅެވޭ ވަރުގެ އުމޫރުންނެވެ. އަދި، ޒަޚަމު ކޮށްލާފައިވާ މީހުންގެ އަދަދު ވަނީ 142,000 އަށް އުފުލިފައެވެ.