މިއަހަރު ރިޒާވުން ދަރަނި ދައްކަން ނެގި އަދަދު 60 އިންސައްތަ އިތުރުވެއްޖެ
7 އޯގަސްޓު 2025 - 09:55

މިއަހަރުގެ ޖުލައި މަހުގެ ނިޔަލަށް ރިޒާވުން، ސަރުކާރުގެ ބޭރުގެ ދަރަނި އަދާކުރުމަށް 212.6 މިލިއަން ޑޮލަރު ހޭދަކޮށްފައިވާއިރު، މިއީ މިދިޔަ އަހަރުގެ މި މުއްދަތާއި އަޅާބަލާއިރު 60 އިންސައްތަ އިތުރު އަދަދެއް ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބުނެފިއެވެ.
އެމްއެމްއޭއިން އެހެން ބުނީ، މަނިޓަރީ ސިޔާސަތުގެ ދަށުން ފާއިތުވި އަހަރުތަކުގައި އެމްއެމްއޭއިން އެޅި ފިޔަވަޅުތަކާއި ގުޅޭގޮތުން މިއަދު އެ ބޭންކުން ނެރުނު ނޫސް ބަޔާނުގައެވެ. އެގޮތުން އެބަޔާނުގައި އެމްއެމްއޭއިން ވަނީ ރާއްޖޭގެ ރަސްމީ ރިޒާވާއިި ގުޅޭ ތަފްސީލީ މައުލޫމާތު ހިއްސާކޮށްފައެވެ.

Ad by Hajj Corporation
އެމްއެމްއޭ އިން ބުނީ ކޮވިޑް -19 ގެ ސަބަބުން ރާއްޖެއަށް ލިބުނު ބޭރުގެ ފައިސާގެ އާމްދަނީ ދަށްވުމުގެ ސަބަބުން، ރުފިޔާގެ އެކްސްޗޭންޖް ރޭޓަށް ވަރަށް ބޮޑު ނޭދެވޭ އަސަރުތަކެއް ކުރި ކަމަށެވެ.
އެގޮތުން 2022 ވަނަ އަހަރުން ފެށިގެން ރާއްޖެއަަށް ތެޔޮ އިމްޕޯޓް ކުރުމަށް ކުރާ ހޭދަވަނީ ވަރަށް ބޮޑަށް އިތުރުވެފައިވާ ކަމަށް އެ ބޭންކް ބުނެއެވެ. އެމްއެމްއޭ އިން ހިއްސާކޮށްފައިވާ މައުލޫމާތުގައި ވާގޮތުން 2017 ވަނަ އަހަރުން 2021 ވަނަ އަހަރަށް ކޮންމެ އަހަރަކު ތެލަށްކުރާ ހަރަދު އެ ބޭންކުގެ ފޮރިން އެކްސްޗޭންޖް އިންޓަވެންޝަން ސިޔާސަތުގެ ދަށުން ވިއްކާ ޖުމްލަ ބޭރު ފައިސާގެ ނިސްބަތުން އެމްރެޖްކޮށް 33 އިންސަތާގައި ހުރިއިރު، 2022 ވަނަ އަހަރުން 2024 ވަނަ އަހަރަށް އެމްރެޖްކޮށް މި އަދަދު ވަނީ 49 އިންސަތަ އަށް އިތުރުވެފަކަމަށެވެ.
ރާއްޖޭގައި ރިޒާވަށް ލިބޭ ބޭރު ފައިސާގެ ބޮޑު ބައެއް ހިއްސާކުރަނީ ފަތުރުވެރިކަމުގެ ސިނާއަތުން ޓެކުހާއި ފީގެ ގޮތުގައި ސަރުކާރަށް ލިބޭ ބޭރު ފައިސާގެ އާމްދަނީ ކަމަށް އެމްއެމްއޭ އިން ވަނީ ބުނެފައެވެ. އެގޮތުން 2025 ވަނަ އަހަރުގެ ފުރަތަމަ ހަތް މަސްދުވަހުގެ ތެރޭގައި ސަރުކާރަށް ޓެކުހާއި ފީގެ ގޮތުގައި ލިބުނު ބޭރު ފައިސާގެ އާމްދަނީ ވަނީ 2024 ވަނަ އަހަރުގެ މި މުއްދަތާއި އަޅާބަލާއިރު 30 އިންސައްތަ އިތުރު ވެފައެވެ.
އަދި މީގެ އިތުރުން ބޭރު ފައިސާއާބެހޭ ގާނޫނުގެ ދަށުން ވިޔަފާރިތަކަށް ބޭންކުތަކަށް މާރުކުރާ އަދަދުގެ ތެރެއިން، ބޭންކުތަކުން އެމްއެމްއޭއަށް ވިއްކަންޖެހޭ އަދަދުގެ ގޮތުގައި ޖުލައި މަހުގެ ނިޔަލަށް ޖުމްލަ 247.2 މިލިއަން ޑޮލަރު ލިބިފައިވާ ކަމަށް އެމްއެމްއޭ އިން ބުނެއެވެ.
އެމްއެމްއޭ އިން ބުނީ ރާއްޖެއަށް ތެލާއި، ކާޑު އަދި ބޭހާއި މެޑިކަލް އިކުއިޕްމަންޓް އެތެރެކުރުމަށްޓަކައި އެސްޓިއޯ އަށް ވަނީ 274.3 މިލިއަން ޑޮލަރު ވިއްކާފަކަމަށެވެ. މީ
ގެ އިތުރު އަމިއްލަ ވިޔަފާރިތަކާއި އާންމުންގެ އެކި ބޭނުންތަކަށާއި، ތައުލީމާއި ބޭސްފަރުވާއާއި، ރާއްޖެއިން ބޭރަށް ދަތުރުކުރާ ކޮންމެ ދިވެއްސަކަށް 500 ޑޮލަރުގެ މަގުން، ޖުލައި މަހުގެ ނިޔަލަށް ޖުމްލަ 217 މިލިއަން ޑޮލަރު އެމްއެމްއޭ އިން ވަނީ ވިއްކާފައިކަމަށް އެ ބޭންކު ބުންޏެވެ.