ރަށެއްގެ ރަށު ކައުންސިލުން އިއްޔެ ކޮށްފައިވާ ޢިއުލާނެއް ދުށީމެވެ. އެއީ އެރަށު ކައުންސިލުން އެރަށު ބަނދަރުގައި އެޅި ބޮޑު ރެސްޓޯރެންޓެއް ހިންގާނެ ބަޔަކު ހޯދަން ކޮށްފައިވާ ޢިއުލާނެކެވެ. ކައުންސިލުން ސީދާ އާންމު ވިޔަފާރިތެރެއަށް ވަނީ އެވެ. އެރަށުގައި ރެސްޓޯރަންޓް/ހޮޓާތައް ހިންގާ މީހުންނަށް އިތުރު ގޮންޖެހުމެއް ކައުންސިލްގެ ސަބަބުން ކުރިމަތިވަނީއެވެ. ބަނދަރުގައި ރަށުގެ މޫނުމަތީގައި، އެންމެ ތަނަވަސް ލޮކޭޝަންގައި ބޮޑު ރެސްޓޯރެންޓެއް ހަދައި ހިންގަންފެށުމުން އާންމު ވިޔަފާރިތަކަށް ލިބޭނެ ދަތިކަމެއް ކައުންސިލުން ވިސްނާފައިވާހެނެއް ހިޔެއްނުވެއެވެ. ކައުންސިލަކުން ވިސްނަންވާނީ ހަމައެކަނި އެ ކައުންސިލެއްގެ އާމްދަނީ އިތުރުކުރުމަކަށްނޫނެވެ. ކައުންސިލަކުން ވިޔަފާރިއެއް ކުރާންވާނީ އާންމު ވިޔަފާރިތަކަށް ގޮންޖެހުމެއް، ދަތިކަމެއް ނާންނާނެގޮތަށް، ރައްޔިތުންގެ ފުދުންތެރިކަމަށް އިސްކަންދީގެންނެވެ. މިއީ ލޯކަލްކައުންސިލްތަކުގެ ގާނޫނަށް އިސްލާހް ގެނައުމަށް ބުރާސްފަތިދުވަހު މަޖިލީހުން ފާސްކުރި ޤާނޫނުން ހާސިލްވާ އެއް މަގްޞަދެވެ. އެ ޤާނޫނުގައި ކައުންސިލްތަކުން ވިޔަފާރިކުރުމުގައި އާންމު ވިޔަފާރިތައް ހިމާޔަތްކޮށްދޭ އެއް ސަބަބަކީ ވެސް މިއީއެވެ. މިފަދަ އެތައް މިސާލުތަކެއް ނެގިދާނެއެވެ.

ފާހަގަކޮށްލެވޭ ކަމަކީ 17 މެއި 2010 ގައި ދިވެހި ރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ޤާނޫނަށް ޢަމަލުކުރަން ފެށުމުގެ ފަހުން މިއީ މި ޤާނޫނަށް އިސްލާހް ގެނެވުނު 16 ވަނަ ފަހަރެވެ. އެހެންކަމުން މި ޤާނޫނު ވުޖޫދުވިފަހުން އެވްރެޖްކޮށް އަހަރަކު އެއްފަހަރު މި ޤާނޫނަށް އިސްލާހް ގެނެވެމުން އައިސްފައިވެއެވެ. އެހެންކަމުން މިއީ މި ޤާނޫނަށް އިސްލާޙް ގެނެވުނު ފުރަތަމަ ފަހަރު ނޫންކަން ފާހަގަކޮށްލަންޖެހެއެވެ.

Ad by Hajj Corporation

6 އޯގަސްޓްގައި ފާސްކުރި ލާމަރުކަޒީ ޤާނޫނަށް އިޞްލާޙު ގެނައުމުގެ ބިލު

މި ބިލުގައި ވަނީ ރައްޔިތުންގެ މަސްލަހަތު ރައްކާތެރިކޮށް، އާންމު ވިޔަފާރިތައް ހިމާޔަތްކުރުމަށް އަމާޒުކުރެވިފައިވާ އިސްލާޙްތަކެކެވެ. މި އިސްލާޙުތަކުގެ މައިގަނޑު މަޤްޞަދަކީ ރައްޔިތުންގެ ފައިސާ ޒިންމާދާރު ގޮތެއްގައި ބޭނުންކުރުމާއި، ކައުންސިލްތަކުގެ ޚިދުމަތްތައް ހަރުދަނާކުރުމެވެ.

އާންމު ވިޔަފާރިތަކުގެ ހިމާޔަތް

މި ޤާނޫނުގެ 70 ވަނަ މާއްދާއަށް ގެނެވޭ އިސްލާޙަކީ އަމިއްލަ ފަރުދުންގެ އިޤްތިޞާދީ މަސައްކަތްތަކަށް ލިބިގެންދާނެ ވަރަށް މުހިންމު ރައްކާތެރިކަމެކެވެ. މީގެ ސަބަބުން ކޮޓަރި ކުއްޔަށް ދިނުމާއި، ކެފޭ ރެސްޓޯރަންޓް ފަދަ ވިޔަފާރިތައް ހިންގުމުގައި ކައުންސިލްތަކުގެ ނުފޫޒުން އެއްކިބާވެ، މިނިވަންކަމާއެކު ވިޔަފާރިކުރުމުގެ ފުރުޞަތު ރައްޔިތުންނަށް ލިބިގެންދާނެއެވެ.

އަސާސީ ޚިދުމަތްތަކުގެ ފެންވަރު ރަނގަޅުކުރުން

މި ޤާނޫނުގެ 75 ވަނަ މާއްދާއަށް ގެނެވޭ އިސްލާޙުގެ ސަބަބުން އަސާސީ ޚިދުމަތްތައް ފޯރުކޮށްދިނުމުގައި ހުރިހާ ރަށެއްގައިވެސް އެއް މިންގަނޑެއް ގެންގުޅެވި، ޚިދުމަތްތައް ފަސޭހަކަމާއެކު ލިބިގަތުމުގެ މަގު ތަނަވަސްވެގެންދާނެއެވެ. މިއީ ރައްޔިތުންގެ ދިރިއުޅުމުގެ ފެންވަރު މަތިކުރުމަށް ލިބިގެންދާނެ ވަރަށް މުހިންމު ކުރިއެރުމެކެވެ.

މާލީ ޒިންމާދާރުކަން އިތުރުކުރުން

މި ގާނޫނުގެ 79 ވަނަ މާއްދާއަށް ގެނެވޭ އިސްލާޙުގެ ސަބަބުން ކައުންސިލްތަކުގެ މާލީ ޒިންމާދާރުކަން އިތުރުވެގެންދާނެއެވެ. މީގެ ސަބަބުން އާންމު ޚިދުމަތްތަކަށް ދައްކަންޖެހޭ ފައިސާ ޤަވާއިދުން ދެއްކުމަށް ހުރިހާ ކައުންސިލްތަކަކަށްވެސް ލާޒިމުވެގެންދާނެއެވެ. މިއީ ރައްޔިތުންގެ ފައިސާ ރަނގަޅު ގޮތުގައި ބޭނުންކުރުމަށް އެޅޭ މުހިންމު ފިޔަވަޅެކެވެ.

ހިންގުން ހަރުދަނާކުރުން

މި ގާނޫނުގެ 100 ވަނަ މާއްދާއަށް ގެނެވޭ އިސްލާޙުގެ ސަބަބުން ކައުންސިލްތަކުގެ ހިންގުމުގެ ނިޒާމު އިތުރަށް ހަރުދަނާވެ، ރައްޔިތުންގެ ފައިސާއަށް ޚިޔާނާތްތެރިވުމުގެ ފުރުޞަތުތައް ބަންދުވެގެންދާނެއެވެ. މީގެ ސަބަބުން ދެފުށް ފެންނަ ގޮތެއްގައި ރައްޔިތުންގެ ފައިސާ ބޭނުންކުރެވި، ޒިންމާދާރުކަން އިތުރުވެގެންދާނެއެވެ.

ދެމެހެއްޓެނިވި ތަރައްޤީ

މި ޤާނޫނުގެ 144 ވަނަ މާއްދާއަށް ގެނެވޭ އިސްލާޙުގެ ސަބަބުން ކައުންސިލަރުންގެ މަސައްކަތުގެ ފެންވަރު މަތިވެ، ދައުރުގެ ފުރަތަމަ ދުވަހުން ފެށިގެން ނަތީޖާ ނެރުމަށް މަސައްކަތްކުރަން ޖެހޭނެއެވެ. މީގެ ސަބަބުން 5 އަހަރުގެ ތަރައްޤީގެ ޕްލޭންތައް އަމަލީ ސިފަ ގެނައުމަށް އިތުރު ބާރެއް ލިބިގެންދާނެއެވެ.

މި އިސްލާހްތަކުން ލިބެނީ މުޅިން ވެސް ފައިދާ

މި އިސްލާޙުތަކަކީ ރައްޔިތުންގެ މަސްލަހަތު ރައްކާތެރިކޮށް، އާންމު ވިޔަފާރިތައް ކުރިއެރުވުމަށް މަގުފަހިކޮށްދޭނެ މުހިންމު ބަދަލުތަކެކެވެ. މީގެ ސަބަބުން ކައުންސިލްތަކުގެ ޚިދުމަތްތައް ހަރުދަނާވެ، ރައްޔިތުންނަށް ލިބޭ ޚިދުމަތްތަކުގެ ފެންވަރު މަތިވެގެންދާނެއެވެ. އަދި ރައްޔިތުންގެ ފައިސާ ރައްކާތެރިކަމާއެކު ބެލެހެއްޓި، ދެފުށް ފެންނަ ގޮތެއްގައި ޚަރަދުކުރެވިގެންދާނެއެވެ.

މި އިޞްލާޙަކީ ދައުލަތުގެ އެހީ ދޫކުރުމުގެ ގަވާއިދުތައް މުރާޖާކުރެވި ބޭނުންތެރިކަމާއި ކައުންސިލްތައް ބާރުވެރިކުރެވި، ޢަދުލު ވެރިކަމާއެކު އެހީ ބެހުމުގައި އެހީތެރިވެދޭނެ އިޞްލާޙްތަކެކެވެ. މި އިޞްލާޙްތަކުގެ ސަބަބުން ފަންޑިންގ ޕްރޮސެސް ތެރެއިން ފޭވަރިޒަމް، ކޮރަޕްޝަން ނުވަތަ ގޯސް މެނޭޖްމަންޓެއްގެ ނުރައްކާ ކުޑަކޮށްދޭނެއެވެ. އެހެންކަމުން މި އިސްލާހްތަކާމެދު ރައްޔިތުން ކަންބޮޑުވާންވީ ހަމަ އެއްވެސް ކަމެއްނެތެވެ.