ދެ ރަށެއްގައި މިސްކިތް އިމާރާތް ކުރުމަށް އިސްލާމީ ވުޒަރާގެ ފަރާތުން، ދެ ކުންފުންޏަކާއި ހަވާލުކޮށްފިއެވެ.

މިސްކިތް އިމާރާތް ކުރުމުގެ މަސައްކަތް ކުރުމަށް ނިންމާފައިވަނީ ހއ. މުރައިދޫ އާއި ގއ. ގެމަނަފުށީގައެވެ. މި އެއްބަސްވުމުގައި އިސްލާމީކަންތައްތަކާ ބެހޭ ވުޒާރާގެ ފަރާތުން ސޮއިކުރެއްވީ ވަޒީރުގެ ނާއިބު އިބްރާހިމް އާސިމްއެވެ. އެމްޓީސީސީގެ ފަރާތުން ސޮއިކުރެއްވީ އެކުންފުނީގެ މެނޭޖިން ޑިރެކްޓަރ ޑީސީޕީ (ރިޓަޔާޑް) އަޙުމަދު ސައީދު އެވެ. އަދި ރޯޑް ޑިވެލޮޕްމެންޓް ކޯޕަރޭޝަން، (އާރްޑީސީ)ގެ ފަރާތުން އެއްބަސްވުމުގައި ސޮއިކުރެއްވީ އެކުންފުނީގެ މެނޭޖިން ޑިރެކްޓަރ އިބްރާހިމް ނަޒީމްއެވެ.

Ad by Hajj Corporation

މުރާއިދޫއާއި ގެމަނަފުށީގައި އިމާރާތް ކުރާ މިސްކިތަކީ 300 މީހުންގެ ޖާގައިގެ މިސްކިތެކެވެ. މި ދެ މިސްކިތުގެ މަސައްކަތް އެއްކޮށް ނިމޭއިރު ވުޟޫ ކުރާނެ ބަޔަކާއި، މުއްނާރު، ލޭންޑްސްކޭޕިން އަދި ވަށާފާރުގެ އިތުރުން ލައިބްރަރީއެއް ހިމެނެއެވެ. މީގެ އިތުރުން މި ދެމިސްކިތް ބިނާ ކުރެވޭނީ ސޯލަރ ސިސްޓަމްވެސް ހަރުކުރެވޭ ގޮތަށެވެ.

މުރައިދޫގައި ދައުލަތުގެ ބަޖެޓުން 7.78 މިލިއަން ރުފިޔާ ހަރަދުކޮށްގެން އިމާރާތް ކުރާ މި މިސްކިތް އިމާރާ ކުރުމުމަށް ހަވާލުކޮށްފައިވަނީ 365 ދުވަހުގެ ތެރޭގައި ނިންމާ ގޮތަށެވެ. އަދި 7.7 މިލިއަން ރުފިޔާ ހަރަދުކޮށްގެން ގެމަނަފުށީގައި އިމާރާތް ކުރާ މިސްކިތް ނިންމުމަށް ދީފައިވަނީ 240 ދުވަހެއެވެ. މިއީ ދަޢުލަތުގެ ޕީއެސްއައިޕީ ބަޖެޓުން ޚަރަދުކޮށްގެން ކުރިއަށް ގެންދާ މަޝްރޫޢުއެކެވެ.