ސަރުކާރާ ހަވާލުވިއިރު ދައުލަތުގެ ދަރަނި ހުރީ ނުބައްދަލު ހިސާބަށް މައްޗަށް ގޮސްފައި ކަމަށާއި، މި ހާލަތުގައި ވެސް އެއްވެސް ޖެހިލުމެއްނެތި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކުރައްވަމުން ގެންދަވާ މަސައްކަތްތައް ރައްޔިތުން ދެނެގަންނަން ޖެހޭކަމަށް އޭދަފުށީ ދާއިރާގެ މަޖިލިސް މެންބަރު އަހުމަދު ސަލީމް (ރެޑްވޭވް ސަލީމް) ވިދާޅުވެއްޖެއެވެ.

ރައީސް ބ. އަތޮޅަށް ކުރައްވަމުންގެންދަވާ، ދަތުރުފުޅުގެ ތެރެއިން ބ. އޭދަފުށީގައި އޮތް ޖަލްސާގައި ވާހަކަ ދައްކަވަމުން މެންބަރު ސަލީމް ވިދާޅުވީ، ދައުލަތުގެ ކުންފުނިތައް ސަރުކާރާ ހަވާލުވިއިރު އޮތީ އެތައް ބިލިއަން ރުފިޔާއަކުން ދަރާފައި ކަމަށެވެ. އަދި މިސަރުކާރާއި ހަވާލު ވިރު ގައުމު އޮތީ އެންމެ ބާރުމިނުގައި ކަންކަން ގެންދެވޭ ހާލަތެއްގައި ނޫންކަމަށް ސަލީމް ވިދާޅުވިއެވެ.

Ad by Hajj Corporation

 ޤައުމުގެ މާލީ ހާލަތު ރަނގަޅު ކުރުމަށް ސަރުކާރުން ގިނަ މަސައްކަތްތަކެއް ކުރަމުންދާ ކަމަށްވެސް ވިދާޅުވިއެވެ.

ފާއިތުވި ސަރުކާރުން ދައުލަތުގެ ކުންފުނިތަކަށް ބޮޑެތި ގެއްލުންތަކެއް ވެފައިވާ ކަމަށާއި، އެ ކުންފުނިތައް އަލުން ރަނގަޅު ހާލަތަކަށް ގެނައުމަށް ވަގުތު ބޭނުންވާނެ ކަމަށްވެސް ސަލީމް ވިދާޅުވިއެވެ.

"ހުރިހާ ކުންފުނިތަކެއް އޮތީ އެތައް ބިލިއަނަކުން ދަރާފައި، ދިވެހި ދައުލަތް އޮތީ އެތައް ބިލިއަނަކުން ދަރާފައި. އެހެންވީމާ، އަޅުގަނޑުމެންގެ މާތް މަޤްޞަދަކަށް މި ވަނީ މި ޤައުމު އެންމެ ފުރަތަމަ ސަލާމަތްކުރުން،" ސަލީމް ވިދާޅުވިއެވެ.

ސަލީމް ފާހަގަކުރެއްވި ގޮތުގައި، ޤައުމުގެ އިޤްތިޞާދީ އަދި އިޖުތިމާއީ ހާލަތު ރަނގަޅުކުރުމަށް ގިނަ ފިޔަވަޅުތަކެއް އަޅަން ޖެހެއެވެ. އޭގެ ތެރޭގައި ބައެއް މީހުން ހިތްހަމަނުޖެހޭ ފިޔަވަޅުތައްވެސް ހިމެނެއެވެ.

ސަލީމް ވިދާޅުވީ ރައީސް މުއިއްޒުއަކީ ވަރަށް އިހްލާސްތެރި، ހިކުމަތްތެރި އަދި އިހުސާންތެރި ބޭފުޅެއްކަމަށާއި ރައީސް ރައްޔިތުންނަށް ދެއްވާ އިހުސާންތެރިކަމުގެ ބަދަލު ރައްޔިތުން ވެސް ދޭންޖެހޭނެ ކަމަށެވެ.