އޭއެފްސީ ޗެލެންޖް ލީގުގެ ގުރޫޕް ސްޓޭޖުން މާޒިޔާ އަށް ފުރުސަތު ގެއްލިއްޖެ އެވެ. މާޒިޔާއަށް މުބާރާތުގެ ފުރުސަތު ގެއްލުނީ ރާއްޖޭގެ ގައުމީ ފުޓްބޯޅަ ދަނޑުގައި މިއަދު ކުވައިތުގެ އަލް އަރާބީއާ ދެކޮޅަށް ކުޅުނު ކޮލިފިކޭޝަން މެޗުން 4-0 ން އަލް އަރާބީ ކާމިޔާބުކުރުމާ ގުޅިގެންނެވެ.

މިދިޔަ އަހަރު މުޅިން އަލަށް ފެށި ޗެލެންޖް ލީގުގައި މާޒިޔާ އާއި އަލްއަރާބީ އަށް ވެސް ގުރޫޕް ސްޓޭޖުން ސީދާ ޖާގަ ލިބުނެވެ. ގުރޫޕް ސްޓޭޖްގައި އަލް އަރާބީއާ ދެކޮޅަށް ކުވައިތުގައި ކުޅުނު މެޗުން މާޒިޔާ ބަލިވީ 2-0 ންނެވެ.

Ad by Hajj Corporation

މެޗަށް ބަލާއިރު މެޗު ފެށިގެން ތިން މިނެޓްތެރޭ އަލް އަރާބީން ލީޑް ނަގައި ލަނޑެއްޖަހާފައިވާއިރު އެ ލަނޑު ޖެހީ އެ ޓީމުގެ ބިދޭސީ ފޯވާޑް އަނޔޯ އައިވޯލާ އެވެ. އަދި ދެވަނަ ލަނޑު 11 ވަނަ މިނެޓުގައި ކާމިޔާބުކޮށްދިނީ ބެލްޖިއަމްގެ ޖޫލިއަން ނަގޯއީ އެވެ.

އަލް އަރާބީން ތިންވަނަ ލަނޑުޖެހީ މެޗުގެ ދެވަނަ ހާފު ފަށައިގެން 10 މިނެޓުވެސް ނުވަނީހެވެ . އެ ލަނޑު ޖެހީ ކްރިސްޓޮފާ ޖޯން އެވެ. މެޗުގެ 87 ވަނަ މިނެޓްގައި ހުސައިން އަޝްކަނާނީ އަލް އަރާބީގެ ހަތަރު ލަނޑު ޖެހި އެވެ.

މި މެޗު މާޒިޔާއިން ކުޅެފައިވަނީ ރަސްމީ އެއްވެސް މުބާރާތެއްގައި ވާދަނުކުރާތާ އަހަރެއް ފަހުންނެވެ. އެހެންކަމުން މިކަމުގެ އަސަރު ރާއްޖޭގެ ޤައުމީ ޓީމާއި ފުރަތަމަ ޑިވިޝަނުގެ ކުލަބުތަކުން އަންނަނީ ފެންނަމުންނެވެ.