މި ސަރުކާރުން ރައްޔިތުންނަށް ޚިދުމަތް ދިނުމުގައި އެއްވެސް ދިވެހި ރައްޔިތެއްގެ މެދުގައި ތަފާތުކުރުމެއް ނުގެންގުޅޭނެކަމަށް ވިލިމާލެ ދާއިރާގެ މެންބަރު މުހައްމަދު އިސްމާއީލް ވިދާޅުވެއްޖެއެވެ.

ރައީސް ޔާމީން ދައުރުގައި ޗީފް އޮފް ސްޓާފަކަށް ހުންނެވި އަހްމަދު މުސްތަފާ، އެމްޑަބްލިޔުއެސްސީއިން ފެން ކަނެކްޝަނެއް ގުޅައިދިނުމަށް އެއްވެސް ޕީއެންސީގެ މަޖިލިސް މެމްބަރެއްގެ އެހީތެރިކަމެއް ލިބިދާނެތޯ އެކްސްގައި ސުވާލުކުރުމުން މުހައްމަދު ވަނީ، މި ސަރުކާރުން ކަނޑައެޅިފައިވާ އުސޫލްގެ ތެރެއިން ހުރިހާ ރައްޔިތުންނަށް ވެސް ޚިދުމަތް ލިބޭނެކަމަށް ވިދާޅުވެފައެވެ.

މުހައްމަދު އިސްމާއީލް ވިދާޅުވި ގޮތުގައި، ސަރުކާރުން ރައްޔިތުންނަށް ފޯރުކޮށްދޭ އަސާސީ ޚިދުމަތްތައް ލިބިގަތުމުގައި ވަނީ ހަމަހަމަކަން ގާއިމުކުރެވިފައެވެ. އަދި ކޮންމެ ދިވެހި ރައްޔިތަކަށްވެސް ބޭނުންވާ ޚިދުމަތްތަކަށް އެދުމުން އެ ޚިދުމަތެއް ފޯރުކޮށްދެވޭނެ ކަމުގެ ޔަގީންކަން އޭނާ ވަނީ ދެއްވާފައެވެ.

"މި ސަރުކާރުން ރައްޔިތުންނަށް ދެމުންދާ އަސާސީ ޚިދުމަތްތައް ފޯރުކޮށްދިނުމުގައި އެއްވެސް ތަފާތުކުރުމެއް ނުގެންގުޅޭނެ. ކުޑަ މީހެއް، ބޮޑު މީހެއް، މުއްސަނދި މީހެއް، ފަގީރު މީހެއް ބެލުމެއް ނެތި، ކަނޑައެޅިފައިވާ އުސޫލުތަކާ އެއްގޮތަށް ހުރިހާ ރައްޔިތުންނަށްވެސް ޚިދުމަތް ފޯރުކޮށްދެވޭނެ," މުހައްމަދު އިސްމާއީލް ވިދާޅުވިއެވެ.

''އެވޭލާޒަމާނުގައި ކަންކަން ކުރިގޮތް މަނިކުފާނަށް ދަސްވެފަހުރުމަކީ ޕީއެއްސީގެ މެންބަރުން ފުރެންޑުން ހޯދަންޖެހޭނެ ސަބަބެއްނޫން ކަމުގައި ދަންނަވަން'' މުހައްމަދު ވިދާޅުވެފަވެއެވެ.