އިސްލާމް ދީނުގެ އަސްލު ބިނާވެފައި އޮންނަނީ ފަރުޟު އަޅުކަންތަކާއި ސުންނަތްތަކާއި ވާޖިބު ތަކާއި ރުކުންތަކުންގެ މައްޗަށެވެ، އަމަލުން ދައްކަން ޖެހޭ ކަންކަމާއި ހިތުން ޝައްކެއް ވަސްވާހެއް ނެތި ހިތްނިޔަތް ޙާލިސްކޮށްގެން ގަބޫލުކުރަންޖެހޭ ޢައިބުގައިވާ ލާޒިމް ކަން ކަން ހިމެނެއެވެ. އެގޮތުން މިއަދުގެ ޙުތުބާ ހާއްސަކޮށްފައިވަނީ އީމާންކަމުގެ އެންމެ މުހިއްމު އެއް ރުކުން ކަމުގައިވާ މަލާއިކަތް ބޭކަލުންނަށް އީމާންވުމުގެ މައްޗަށް ބިނާކޮށްފައެވެ.

މިކަމަށް ބާރުދޭ އެންމެ މާތް އެއް މަސްދަރަކީ ކީރި ނަބިއްޔާގެ ސުންނަތުންނާއި މާތްﷲ ބާވައިލެއްވި އިލާހީ ގާނޫނު ކަމަށްވާ ކީރިތި ޤުރްއާނެވެ. މަލާއިކަތް ބޭކަލުން ވަކި ޖިންސަކަށް ނިސްބަތްނުވާ ހިނދު އެއީ ﷲسُبْحَانَهُ وَتَعَالَى މާތް ކުރައްވާފައިވާ މަޙުލޫގުންނެވެ. މަލާއިކަތް ބޭކަލުންނަކީ ނިދުމާއި ކެއުމާއި އަދި މިފަދަ ދުނިޔެވީ ސިފަތަަކުން މާތްﷲ އިސްތިސްނާ ކުރައްވާފައިވާ މަޙުލޫގުންނެެވެ. ވަކި ޖިންސެއްގައި ނުލެއްވި ކަމުގައި ވީނަމަވެސް މަލާއިކަތް ބޭކަލުންނަށް މާތްﷲ އަމުރުފުޅަށް އިންސާނުންގެ ސިފައަށް ސިފަ ބަދަލަކުރުމުގެ ބާރު ދެއްވާފައިވެއެވެ.

މަލާއިކަތް ބޭކަލުން ހަލްގު ކުރައްވާފައިވަނީ ނޫރުންނެވެ. މަލާއިކަތްބޭކަލުންނަކީ މާތް ރަސްކަލާނގެ އަށް ކިޔަމަންވުމަށް ހައްދަވާފައިވާ ބައެކެވެ. މަލާއިކަތް ބޭކަލުންގެ އަދަދު މާތްﷲ ފިޔަވައި އެހެން އެއްވެސް ފަރާތެެއް ދެނެވޮޑިގެން ނުވެއެވެ.

އަރުޝި އުފުއްލެވުމަށް މަލާއިކަތް ބޭކަލުން ލައްވާފައިވެއެވެ. ނަރަކައާއި ސުވަރުގެއަށް މަލާއިކަތުން ލައްވާފައިވެއެވެ. ވަހީގެ ބާވައިލެއްުވުމަށާއި ގިޔާމަތް ދުވަހުގެ ތާޅަފިލި ފުމެލެއްވުމަށް އަދި މަރުހިއްޕެވުމަށް މަލާއިކަތް ބޭކަލުން ލައްވާފައިވެއެވެ. ހެޔޮ ކަންތައްތަކާއި އަޅުކަންތަކުގެ އިތުރުން މާތްﷲ ހަނދުމަކުރާ ފަރާތްތަކަށް ރަހުމަތް ލެއްވުމަށް އެދި ދުއާ ދަންނަވަން މަލާއިކަތް ބޭކަލުން ހިމަނުއްވާފައިވެއެވެ. މީސްތަކުންގެ ޢަމަލުތައް ލިޔުއްވާ މަލާއިކަތް ބޭކަލުން ވެއެވެ.

މަލާއިކަތް ބޭކަލުންގެ މައްޗަށް ހެޔޮދުއާ ކުރުމަށް މާތްﷲ ވަނީ އަޅުގަނޑުމެންނަށް އަންގަވާފައެވެ. އަދި ޤުރްއާނުގައި މިކަން ބަޔާންކުރައްވާ ވަހީ ކުރައްވާފައިވެއެވެ.

ދީނުގެ މިފަދަ މަތެިވެރި ރުކުންތަކުގެ އަލީގައި ދެދުނިޔެ އާއި އާޙިރަރތް ބާއްޖަވެރިކުރުމަކީ ކޮންމެ މުސްލިމަކަށް ލިބިފައިވާ މަތިވެރި ނިޢުމަތެކެވެ. އިސްލާމް ދީނަކީ އޭންމެ ފުރިހަމަ ދީނެވެ. ޤުރްއާނަކީ މި ބިންމަތީގައިވާ އެންމެ ވަރުގަދަ އިލާހީ ޤާނޫނެވެ. އިސްލާމީ އުއްމަތެއް ހެޔޮގޮތުގައި ބިނާކުރެވޭނީ މިފަދަ ކަންކަމަށް އަހައްމިއްޔަތުކަން ދޭ މިންވަރަކުންނެވެ. މިފަދަ ހިކުމަތްތަކުގެ މުރާދާއި މަގްސަދު އަދި މިކަންކަމުގެ އާޙިރުު ސަވާބާއި ދަރުމައާއި ލާބަ އަމިއްލައަށް އެނގިގެންނެވެ. އަދި އެނގޭ މިންވަރަކުން އެހެން މީހުން އެފަދަ ކަންކަމަށް އަހުލުވެރިކޮށް ހޭލުންތެރިކުރުމަކީ ވެސް ކޮންމެ މުސްލިމެއްގެ ވެސް ފަރުދީ ޒިންމާއެކެވެ.

އިސްލާމް ދީނުގައި އަދާ ކުރަން އަންގަވާފައިވާ ހައްގުތަކަށް ރައްކާތެރިވާން ކޮންމެ މުސްލިމަކުވެސް ޖެހޭނެއެވެ. އިޖްތިމާޢީ ފޭރާން ރީތިކުރުމަށާއި އުޙުރަވީ ހަޔާތް ބާއްޖެވެރިކުރުމަށް އެންމެ ފައިދާ ހުރި ސަރަކަ އަކީ ވެސް ސަމުގާ އަކީ ވެސް އިސްލާމް ދީނުގެ ރުކުންތަކާއި އަޅުކަންތަކާއި ސުންނަތްތަކެވެ.

ޒަމާނަށް އައިސްފައިމިވާ ބަދަލުތަކާއި އެކު ދީނުގެ ކަންކަމަށް އޮންނަ އަހައްމިއްޔަތުކަން މިއަދުގެ މުޖްތަަމައުގައި ވަރަށް ވެސް ދަށެވެ. ޅައިރުން ފެށިގެން ދަސްކޮށްދީ ތަރުބިއްޔަތު ކުރެވިގެން މެނުވީ ތަރުތީބުން މިދެންނެވި ކަންކަމަކަށް އަޅުގަނޑުމެންފެ ޅަދަރިން ފަރިތައެއްނުވާނެއެވެ. ޅައުމުރުގައި ދީނަށް ދަރިން އަހުލުވެރިކުރުވުމަކީ ކޮންމެ ބެލެނިވެރިއެއްގެވެސް އެންމެ ބޮޑު އެއް މަސްއޫލިއްޔަތެވެ. ދަރިން ދީނަށް ލޯބި ޖައްސައި އެމަގުން ކުރިއަށް ދާން ނަމޫނާ ދައްކަންވެސް ތިބޭނީ ބެލެނިވެރިންނެވެ.

ކޮންމެ ހުކުރު ޙުތުބާ އެއްގައިވެސް ދީނީ މައިގަނޑު މުހިއްމު އެތައް ކަމެއްގެ މަތިމް ހަނދުމަކޮށްދެެއެވެ. އެކަމެއްގެ ހުކުމާއި އަސްލު އޮންނަގޮތް ސުންނަތާއި ހަދީޘް ތަކުގެ އަލީގައި ވަރަށް ތިލަކޮށް ސާފުކޮށް އެނގި ހާމަވާން ހުރެއެވެ. އެހެން ކަމުން ކޮންމެ މަޙުލޫގެއް މައްޗަށް އޮތް ވާޖިބަކީ. މިބީދައިން އަމަލުކޮށް ހަތް އުޑު މަތިން ބާވައިލެއްވި އިލާހީ ޤާނޫނަށް ތަބާ ވެގެން، އޭގެއިިން ދަސްވާ ޙިކުމަތްތަކާއި މައުލޫމާތުގެ އަލީގައި އާޙިރަތް ބާއްޖަވެރިކުރުމަށް މަސައްކަތް ކުރުމެވެ. އަދި ދުނިޔޭގައި އުޅުމަށް ދެއްވާފައިވާ ވަގުތުގެ ބޭނުން އޭގެ އެންމެ ފުރިހަމައަށް އަދާ ކުރަން މަސައްކަތް ކުރުމަކީ ވެސް ކޮންމެ މީހެއްގެ ވެސް ވާޖިބެކެވެ.