މެންޗެސްޓަރ ސިޓީ އާއި ޓޮޓްނަމް ހޮޓްސްޕަރ 2025-26 ވަނަ އަހަރުގެ ޕްރިމިއަރ ލީގް ސީޒަން ފަށައިގަތުމުގެ ގޮތުން ކުޅުނު މެޗުތައް ފަސޭހަކަމާއެކު ކާމިޔާބުކޮށްފައެވެ. އެގޮތުން ސިޓީއިން ވޯލްވްސް އާއި ދެކޮޅަށް ފުރަތަމަ މެޗުގައި ނިކުމެފައިވާއިރު، ޓޮޓްނަމް ނިކުތީ ބާންލީއާއި ދެކޮޅަށެވެ.

ވޫލްވްސްގެ އަމިއްލަ ދަނޑުގައި ކުޅުނު މެޗުގައި ޕެޕް ގުއާޑިއޯލާގެ ސިޓީ އިން ކާމިޔާބުކުރީ ފަސޭހަކަމާއެކު 4-0 ންނެވެ. މި މެޗުގައި ފުރަތަމަ ފަހަރަށް ކުޅުނު ޓިޖާނީ ރެއިންޑަރސް އަދި ރަޔާން ޗެރްކީ ވަނީ އާދަޔާ ޚިލާފު ޕަފޯމަންސްއެއް ދައްކާފައެވެ. މިދެކުޅުންތެރިންވެސް ސިޓީއަށް ގޯލުޖަހައިދީފައިވާއިރު، އަނެއް ދެގޯލު ކާމިޔާބުކޮށްދިނީ ހާލަންޑެވެ. މިއާއެކު ހާލަންޑް 2022 ވަނަ އަހަރުގައި ސިޓީއަށް ބަދަލުވިފަހުން ސީޒަން ހުޅުވާ ކޮންމެ މެޗެއްގައި ގޯލުޖަހާފައިވެއެވެ.

Ad by Hajj Corporation

މިނަތީޖާއާއެކު ޕްރީމިއަރ ލީގުގައި ތިންވަނައިގައި މިިދިޔަ ސީޒަން ނިންމާލި ސިޓީގެ ކޯޗު ގުއާޑިއޯލާ ހުރީ ހިތްހަމަ ޖެހިފައެވެ. މިިދިޔަ ސީޒަނުގައި ނިކުތް ދަށް ނަތީޖާއާއެކު މިސީޒަނުގައި ޓީމާއި ގުޅުނު ހުރިހާ ކުޅުންތެރިންގެ ފަރާތުންވެސް ރަނގަޅުކުޅުމެއް ރޭގެ މެޗުގައި ފެނިފައިވެއެވެ.

މީގެ އިތުރުން މިދިޔަ ސީޒަނުގައި ރެލިގޭޝަން ޒޯނާއި އެންމެ ގާތުގައި 17 ވަނަ އިގައި ނިންމާލި ޓޮޓްނަމްވެސް ރޭގައި ވަނީ ފަސޭހަކާމާއެކު ބާންލީ ބަލިކޮށްފައެވެ. ޓޮޓްނަމްގެ އައު މެނޭޖަރު ތޯމަސް ފްރޭންކްގެ އިރުޝާދުގެ ދަށުން މީގެ ދެތިން ދުވަސްކުރިން ޔޫރަޕިއަން ސުޕަކަޕްގައި ޕީއެސްޖީއަތުން ބަލިވިނަމަވެސް، ޓޮޓްނަމްގެ ފަރާތުން މިސީޒަނުގައި ފެނުނު ދެމެޗުންވެސް ޓޮޓްނަމް ވަނީ އާދަޔާ ޚިލާފު މޮޅުކުޅުމެއް ދައްކާފައެވެ. މިމެޗުގައި މިދިޔަ ސީޒަނުގައި ޕްރީމިއަރ ލީގުގައި އެންމެ 4 ގޯލު ކާމިޔާބުކުރި ރިޗާލިސަން ވަނީ ދެގޯލު ކާމިޔާބުކޮށްފައެވެ. އަދި ފަހުގޯލު ކާމިޔާބުކޮށްދިނީ ޖޯންސަންއެވެ. މިމެޗު ނިމުނީ 3-0 އިންނެވެ.

މި ނަތީޖާތަކާއެކު ސިޓީ އަދި ސްޕާރސް ވަނީ ވަގުތީގޮތުން ޕޮއިންޓް ތާވަލުގެ އެންމެ ކުރިން ޖާގަހޯދާފައެވެ.