ރައީސުލްޖުމްހޫރިއްޔާ ޑރ. މުހައްމަދު މުޢިއްޒު  މުޢިއްޒަކީ ފަލަސްތީނުގެ ހައްގުގައި މިހާތަނަށް އެންމެ މަސައްކަތްޕުޅުކުރަށްވާ ރައީސްކަމަށް ފުނަދޫ ދާއިރާގެ މެންބަރު މުހައްމަދު މަމްދޫހް މިއަދު ވިދާޅުވެއްޖެއެވެ.

ރައީސުލްޖުމްހޫރިއްޔާ މިއަދު ފަލަސްތީނުގެ ރައީސް ޑރ. މަޙްމޫދު ޢައްބާޞްއާ ބައްދަލުކުރަށްވާ ފޮޓޯއެއް އެކްސްގައި ހިއްސާކުރައްވަމުން މަމްދޫހް ވިދާޅުވީ، ފަލަސްތީނުގެ ލޮބުވެތި ހިތްވަރުގަދަ ރައްޔިތުންގެ ޙައްޤުގައި ރައީސުލްޖުމްހޫރިއްޔާ ޑރ. މުޢިއްޒު‬⁩ ކުރައްވަވަމުން ގެންދަވާ މަސައްކަތްޕުޅުތައް ފަލަސްތީނުން ބަލައިގަންނަ ކަމަށެވެ.

''ފަލަސްތީނުގެ ހައްގުގައި، އެލޮބުވެތި މުސްލިމު އަޚުންނާއި އުޚްތުންގެ ހައްގުގައި، މިރާއްޖޭގެ އަޑު، ފަސްޖެހުމެއް، މަޑުޖެހުމެއް، ހުއްޓުމެއް، ބިރެއް ޖެހިލުމެއްނެތި، މިވަރަށް ގުގުމާލެއްވި ރަޢީސްކު އަދި ނުދެކެން'' މަމްދޫހް ވިދާޅުވެފަވެއެވެ.

ފަލަސްތީނުގެ ލޮބުވެތި ރައްޔިތުންގެ ޙައްޤުގައި މި ސަރުކާރުން ކެންޑިނޭޅި ވަކާލާތުކުރަމުން އަންނައިރު، އެކަމަކީ ގިނަ ދިވެހިންވެސް ބަލައިގަނެ ރައީސުލްޖުމްހޫރިއްޔާ އަށާއި ސަރުކާރަށް ޝުކުރުއަަދާކުރާ ކަމެކެވެ.

ރައީސުލްޖުމްހޫރިއްޔާ މިއަދު ވަނީ ފަލަސްތީނުގެ ރައީސް ޑރ. މަޙްމޫދު ޢައްބާޞްއާ ބައްދަލުކުރަށްވާފައެވެ.

އދ.ގެ އާންމު މަޖިލީހުގެ 79 ވަނަ ސެޝަނުގައި ބައިވެރިވެވަޑައިގަތުމަށް ރައީސުލްޖުމްހޫރިއްޔާ އެމެރިކާއަށް ކުރަށްވަމުން ގެންދަވާ ދަތުރުފުޅުގެ ތެރެއިން މިއަދު ފަލަސްތީނުގެ ރައީސް ޑރ. މަޙްމޫދު ޢައްބާޞްއާ ބައްދަލުކުރަށްވާފައިވާއިރު، ރައީސުލްޖުމްހޫރިއްޔާ ވަނީ ފަލަސްތީނާ ދެކޮޅަށް އިސްރާއީލުން ހިންގާ ހަނގުރާމަ ހުއްޓައިލުމަށް ގޮވައިލަށްވައި ފަލަސްޠީނުގެ ރައްޔިތުންނަށް ކުރިމަތިލާންޖެހިފައިވާ ނުރައްކާތެރި ޙާލަތު ބަދަލުކުރުމަށް ބައިނަލްއަޤްވާމީ މުޖުތަމަޢުން ގުޅިގެން މަސައްކަތްކުރުމަށް ގޮވާލައްވާފައެވެ.