މިއަހަރުގެ ބަރަކާތްތެރި ޙައްޖު ދުވަހުގެ މުނާސަބަތުގައި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދިވެހި އެންމެހައި ރައްޔިތުންނަށް ދުވަހުގެ ތަޙުނިޔާއާއި ހެޔޮއެދުންތައް ފޮނުއްވައިފިއެވެ.

ރައީސުލްޖުމްހޫރިއްޔާ މި ތަޙުނިޔާ ފޮނުއްވާފައިވަނީ މިއަދު ސޯޝަލް މީޑިއާގައި ކުރެއްވި ޕޯސްޓެއްގައެވެ. އެމަނިކުފާނުގެ މެސެޖުގައި، މި ބަރަކާތްތެރި ދުވަހުގެ ހެޔޮ ދަރުމައާއި ޘަވާބު ކޮންމެ ދިވެހި ރައްޔިތަކަށްމެ މިންވަރު ކުރެއްވުން އެދި ދުޢާ ކުރައްވާފައިވެއެވެ.

Ad by Hajj Corporation

ރައީސްގެ މެސެޖުގައި އިތުރަށް ވިދާޅުވެފައިވަނީ، ޙައްޖު ދުވަހަކީ ރަޙްމަތާއި ބަރަކާތާއި ބާއްޖަވެރިކަމުގެ ދުވަހެއްގެ ގޮތުގައެވެ. އަދި އެއީ މާތްﷲގެ ރުއްސެވުމާއި ފުއްސެވުން ލިބިގެންދާ މަތިވެރި ދުވަހެއްކަން ފާހަގަކުރައްވައި، ދިވެހި އެންމެހައި ލޮބުވެތި ރައްޔިތުންނަށް މި ދުވަހުގެ ހެޔޮ ދަރުމަ ދެއްވުމަށް އެދިވަޑައިގެންފައިވެއެވެ.

މިއަހަރުގެ ޙައްޖު ދުވަހަކީ މާދަމާއެވެ. ޙައްޖުގެ މަތިވެރި އަޅުކަމުގައި ބައިވެރިވުމަށް ސައުދީ އަރަބިއްޔާއަށް ގޮސްފައިވާ ދިވެހި ޙާޖީންގެ ޙާލަތާ ގުޅޭގޮތުން ޙައްޖު މިޝަނުން މަޢުލޫމާތު ދީފައިވާ ގޮތުގައި، ހުރިހާ ޙާޖީންވެސް މިހާރު ތިބީ ޢަރަފާތަށް ދަތުރުފެށުމަށް ފުރިހަމައަށް ތައްޔާރުވެގެންނެވެ.