މިދިޔަ ޖުލައިމަހު ހުވަދު އަތޮޅުން ވަގަށްނެގި 60،000 ވުރެ ގިނަ ރުފިޔާގެ އިލެކްޓްރޯނިކް ސާމާނު ފުލުހުން ހޯދައިފިއެވެ.

ސައުތު ޕޮލިސް ސަބް ރީޖަން (ގއ އަދި ގދ) ގެ ރަށްރަށުގައި ކުރަމުންދާ މަސައްކަތްތަކުގެ ތަފާސްހިސާބުތައް ފުލުހުން ވަނީ އާންމުކޮށްފައެވެ.

Ad by Hajj Corporation

އެގޮތުން ފުލުހުންގެ ތަފާސްހިސާބުތަށް ދައްކާގޮތުން، މިދިޔަ ޖުލައި މަހު ހުވަދު އަތޮޅުން ވަގަށް ނެގި 64،429 ރުފިޔާގެ އިލެކްޓްރޯނިކް ސާމާނު ހޯދާފައިވެއެވެ. އަދި ވަގަށް ނެގި 25،000 ރުފިޔާ ގެ އިތުރުން، އެހެނިހެން ތަކެތީގެ ގޮތުގައި 4500 ރުފިޔާގެ ތަކެތި ހޯދާފައިވެއެވެ.

މީގެ އިތުރުން މިދިޔަ މަހު ވިސިބިލިޓީ އެންޑް ޓްރެފިކް މެނޭޖްމަންޓް ޕޮއިންޓްގެ ގޮތުގައި 98 ތަނެއް ހަމަޖެއްސި ކަމަށާއި 1329 ލޮކޭޝަން ޗެކް ކުރިއަށް ގެންދިޔަ ކަމަށް ފުލުހުންގެ ތަފާސް ހިސާބުތަކުން ދައްކައެވެ.

އެގޮތުން، 138 މިނެޓްގެ ފުޓް ޕެޓްރޯލް ކުރިއަށް ގެންދިޔަ އިރު، މަގުމަތިން ހުއްޓުވައި 143 މީހަކާއި ސުވާލުކޮށްފައިވެއެވެ. އޭގެ ތެރެއިން 71 މީހުންނަކީ ކުށުގެ ރެކޯޑް އޮތް މީހުން ކަމަށާއި 72 މީހުންނަކީ ކުށުގެ ރެކޯޑް ނެތް މީހުން ކަމަށް ފުލުހުން ބުނެފައިވެއެވެ.