ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް) ގެ މެންބަރު ކަމަށް އިތުރު ތިން ބޭފުޅެއްގެ ނަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ރައްޔިތުންގެ މަޖިލީހަށް ހުށަހަޅުއްވައިފި އެވެ.

ރައީސް މުއިއްޒު މަޖިލީހަށް ފޮނުއްވި ސިޓީގައި ވަނީ އެޗްއާރްސީއެމްގެ މެންބަރު ކަމަށް އިއުލާނު ކުރުމުން އިޖާބަ ދެއްވި ބޭފުޅުންގެ ތެރެއިން ރައީސަށް ފެނިވަޑައިގަންނަވާ ތިން ބޭފުޅެއްގެ ނަން އިސްކަންދޭ ތަރުތީބުން ހުށަހަޅުއްވާފަ އެވެ.

Ad by Hajj Corporation

ރައީސް މުއިއްޒު ހުށަހެޅުއްވި ނަންތަކަކީ، އަހުމަދު މަޤުސޫމް ، ސީބްރީޒް، ސ. ހުޅުދޫ، އަމިރާ ނައީމް ، ހ. ގުރުސް އަދި ފާތިމަތު ނަފްއަތު އަބްދުލްވައްހާބު ދަފްތަރު. ނަންބަރު ދރ 712 އެވެ.

މަޖިލީހުގެ މިއަދުގެ ޖަލްސާގައި ވަނީ މި މައްސަލަ ދިރާސާކުރަން ކޮމިޓީއަށް ފޮނުވާފަ އެވެ.

އެޗްއާރްސީއެމްއަށް ދެ މެންބަރަކު އައްޔަންކުރަން ޖެހޭތީ ދެ ބޭފުޅެއްގެ ނަން ރައީސް މުއިއްޒު މަޖިލީހަށް މި މަހު ހުށަހެޅުއްވި އެވެ. އެ ބޭފުޅުންނަކީ މުހައްމަދު ފާރިސް ޠާހާ ، ހ. ސޯސަން އާއި މުހައްމަދު ޝަފީގު މަހްމޫދު ، މ. ޕޮޕީ އެވެ.

ޖަލްސާގައި ވަނީ އެޗްއާރްސީއެމްގެ މެންބަރު ކަމަށް މުހައްމަދު ޝަފީގު މަމްދޫހު އައްޔަންކުރަން ފާސްކޮށްފަ އެވެ.

މަޖިލީހުގެ ހިއުމަން ރައިޓްސް ކޮމިޓީން ޝަފީގާއި ތޯހާއާއި އިންޓަވިއު ކުރުމަށްފަހު ރުހުން ހޯދަން މަޖިލީހުގެ ތަޅުމަށް ކޮމިޓީން ފޮނުވީ ހަމައެކަނި ޝަފީގުގެ ނަމެވެ.
އެޗްއާރްސީއެމްއަށް ދެ މެންބަރަކު ނަގަނީ އެ ކޮމިޝަންގެ މެންބަރުންގެ ގޮތުގައި މިހާރު ތިއްބެވި ކޮމިޝަންގެ ނައިބް ރައީސް މޫމިނާ ވަހީދާއި މެންބަރު އާމިނަތު ޝިފާތު އަބްދުލްރައްޒާގުގެ ދައުރު ހަމަވާތީ އެވެ.