ފުނަދޫއަށް މަސްތުވާތަކެތި އެތެރެ ކުރި މީހަކު ހައްޔަރަށް
20 އޯގަސްޓު 2025 - 11:09

މާލެއިން ފުރައިގެން ށ. ފުނަދޫއަށް ދަތުރުކުރަމުންދިޔަ ލޯންޗަކުން އެރަށަށް މަސްތުވާތަކެތި ގެންދާކަމަށް ކައުންޓަރ ނާކޮޓިކްސް އިންޓެލިޖެންސަށް ލިބުނު މައުލޫމާތަކާ ގުޅިގެން ހިންގި އޮޕަރޭޝަނުގައި މީހަކު ހައްޔަރުކޮށްފިއެވެ.
މި އޮޕަރޭޝަނުގައި ހައްޔަރުކޮށްފައިވަނީ ށ. ފުނަދޫ / ފުނަމާގެ، ޙަސަން ޝިނާން (20އ) އެވެ. އޭނާ ހައްޔަރުކޮށްފައިވަނީ، މި އޮގަސްޓު މަހުގެ 18 ވަނަ ދުވަހު ހިންގި އޮޕަރޭޝަނުގައި، ފުނަދޫ ބަނދަރުމަތިންނެވެ. އޭނާ ހައްޔަރުކޮށް ބަލައިފާސްކުރި އިރު މަސްތުވާތަކެތި ކަމަށް ބެލެވޭ އެއްޗެއްހުރި 15 ސެލޯފިންކޮޅު ފެނިފައިވެއެވެ.

Ad by Hajj Corporation
މި އޮޕަރޭޝަން ހިންގާފައިވަނީ ފުނަދޫ ޕޮލިސް ސްޓޭޝަނާއި ކައުންޓަރ ނަކޮޓިކްސް އިންޓެލިޖެންސް ގުޅިގެންނެވެ.
މި މައްސަލައާ ގުޅިގެން ޙަސަން ޝިނާންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުުމުން 10 ދުވަހަށް ބަންދުކުރުމަށް ވަނީ އަމުރުކޮށްފައެވެ.
މި މައްސަަލަ ފުލުހުން ދަނީ ތަހުގީގު ކުރަމުންނެވެ.