ރައްޔިތުންގެ މަޖިލީހުގެ ކުރީގެ ރައީސް އަބްދުﷲ މަސީހު މުހައްމަދުގެ އިތުބާރު ނެތް ކަމަށް ހުށަހެޅި މައްސަލައިގައި ސޮއިކުރި 12 މެމްބަރުންނަށް ޖެއްސި ހާލު ހަނދުމަފުޅު އެބަހުރިތޯ ސުވާލުކުރައްވައި ރައީސް ޔާމީނަށް ވުރެ މަޖިލިސް މެމްބަރުން ނިކަމެތިކުރި ވެރިޔަކު ނެތްކަމަށް ޕީއެންސީގެ ޕީޖީ ލީޑަރު އަދި އިނގުރައިދޫ ދާއިރާގެ މެމްބަރު އިބްރާހީމް ފަލާހް ވިދާޅުވެއްޖެއެވެ.

ވެރިކަން ކުރާ ޕީޕަލްސް ނެޝަނަލް ކޮންގްރެސްއަށް ނިސްބަތްވާ ރައްޔިތުންގެ މަޖިލީހުގެ މެންބަރުންނަށް ފާޑުވިދާޅުވެ ރައީސް ޔާމީން ވަނީ ވާހަކަފުޅު ދައްކަވާފައެވެ. ސަރުކާރު މެންބަރުންނަށް ފާޑުވިދާޅުވަމުން ޔާމީން ވިދާޅުވީ، މެންބަރުން ތިބީ އެމީހުންނާއި އެމީހުންގެ ނަފުސާއި ރައްޔިތުން ވެސް ވިއްކާލައިގެން ކަމަށެވެ.

Ad by Hajj Corporation

މި ވާހަކަތަކަށް ރައްދު ދެއްވައި މެމްބަރު ފަލާހް ވަނީ 18 ވަނަ މަޖިލީހުގައި މެމްބަރުންނާއިމެދު ރައީސް ޔާމީން ކަންތައް ކުރިގޮތުން ޕީޕީއެމްގެ 12 މެމްބަރުން ތިންއަހަރު މަގުމަތީ ގަނަތެޅުވިކަން ހަނދުމަފުޅު އެބަހުރިތޯ ސުވާލުކުރައްވާފައެވެ.

"ތިޔަށްވުރެ މެމްބަރުން ނިކަމެތިކުރި ވެރިއަކު ނެތް!" ފަލާހު ވިދާޅުވިއެވެ.

ފަލާހު ވިދާޅުވީ 20ވަނަ މަޖިލީހުން އަލަށްފާސްކުރާ އަދި އިސްލާހް ގެންނަ އެއްވެސް ޤާނޫނެއް ގޯސްވެގެން ކުރިއަށްއޮތް އެއްވެސް މަޖިލީހަކުން ބަދަލެއް ނުގެންނާނެކަމަށާއި ރައީސް މުޢިއްޒުވަނީ މެމްބަރުންނަށް މަޖިލީހުގައި ފުރިހަމަ މިނިވަންކަންމަތީ މަސައްކަތްކުރުމުގެ އިޚްތިޔާރުދެއްވާފައިކަމަށެވެ.

މީގެ އިތުރުން ރައީސް ޔާމީނުގެ ވެރިކަމުގައި ދަޢުލަތުން ވަގަށްނަގާފައިވާ އެތައްސަތޭކަމިލިއަން ރުފިޔާއެއް ހަލާލު ފައިސާއަށް ހެދޭނެކަމަށްހީނުކުރެއްވުމަށާއި ރޭގެ ޖަލްސާއަށް 200މީހުން ގެންދިޔައީ ދަޢުލަތުން ވަގަށްނަގާފައިވާ ފައިސާއިން ބޮލަކަށް 1200 ރުފިޔާދީގެންކަމަށް ފަލާހް ވަނީ ތުހުމަތު ކުރައްވާފައެވެ.

"އެވަރުންވެސް 2ބައިކުޅަ އެއްބައިތިބީ ބަނަގާޅީން!." ފަލާހު ވިދާޅުވިއެވެ.

ރައީސް މުޢިއްޒު މިޤަޢުމުގެ ރައްޔިތުންގެ ހެވާލާބައަށް ކުރައްވަމުންގެންދަވާ މަސައްކަތްޕުޅަށް ޔާމީނުފަދަ މިޤަޢުމުގެ ބައިތުލްމާލު ދަވާލާފައިވާ އަނިޔާވެރިއެއްގެ ވާހަކަތަކުން ކުޑަވެސް ބަދަލެއްނާންނާނެކަމަށް ފަލާހް ވިދާޅުވިއެވެ.

ރައީސް ޔާމީނަށް ވުރެ މަޖިލިސް މެމްބަރުން ނިކަމެތިކުރި ވެރިޔަކުނެތްކަމަށް ފަލާހް ވިދާޅުވިއިރު މަސީހުގެ އިތުބާރު ނެތް ކަމަށް 45 މެންބަރުންގެ ސޮޔާ އެކު މަޖިލީހަށް ފޮނުވީ ޖުލައި 3، 2017ގަ އެވެ. އެއީ މަޖިލީހުގެ ސާފު އަޣުލަބިއްޔަތަށް ވުރެ ވެސް ގިނަ އަދަދެއްގެ މެމްބަރުން ކަމަށްވާތީ، އެ މައްސަލަ މަޖިލީހަށް އެޖެންޑާ ކުރުމުގެ ކުރިން، އޭގެ ތެރެއިން ބައެއް މެންބަރުން މަޖިލީހުން ވަކި ކުރުމަށް ސަރުކާރުން ނިންމި އެވެ. އެއީ އެފަދަ މައްސަލަތައް މަޖިލީހަށް ހުށަހެޅުމަށް ބޭނުންވާ ގާނޫނީ އަދަދު ހަމަނުވާ ކަމަށް ބަލައި، އެ މައްސަލަ އެޖެންޑާ ނުކޮށް ބޭރު ކޮށްލުމެވެ.

12 މެމްބަރުން، ޖުލައި 13، 2017 ގެ ކުރިން ޕާޓީން ވަކިވެފައި ވިޔަސް، އިތުބާރު ނެތް ކަމުގެ މައްސަލަ އިން މަސީހު ސަލާމަތް ކުރުމަށްޓަކައި، ސަރުކާރާއި ރައްޔިތުންގެ މަޖިލީހާއި ޕީޕީއެމާއި އިލެކްޝަންސް ކޮމިޝަން ގުޅިގެން ނިންމީ، އެ 12 މެމްބަރުން މަޖިލީހުން ވަކިވެއްޖެ ކަމަށް ކަނޑައެޅުމަށެވެ.

ނަމަވެސް މަސީހުގެ އިތުބާރު ނެތް ކަމަށް ހުށަހެޅި މައްސަލައިގައި ސޮއިކުރި 12 މެމްބަރަކު މަޖިލީހުން ވަކިވެފައިވާ ކަމަށް އިލެކްޝަންސް ކޮމިޝަނުން ކަނޑައެޅި ކަނޑައެޅުން ސުޕްރީމް ކޯޓުން ވަނީ ބާތިލުކޮށްފައެވެ.