ތަރައްގީގެ މަޝްރޫއުތައް ހަލުވިކުރުމަށް ކައުންސިލްތަކަށް ސަރުކާރަށް ތާއީދުކުރައްވާ ބޭފުޅުން ހޮއްވަވާދެއްވާ: ފަލާހް
30 ނޮވެމްބަރު 2025 - 12:57

ރަށްރަށުގައި މި ސަރުކާރުން ފަށާފައިވާ ތަރައްގީގެ މަޝްރޫއުތައް ހަލުވިކުރުމަށް އަންނަ ލޯކަލް ކައުންސިލް އިންތިހާބުގައި ސަރުކާރަށް ތާއީދުކުރައްވާ ބޭފުޅުން ކައުންސިލްތަކަށް ހޮއްވަވާދެއްވުމަށް ޕީއެންސީގެ ޕީޖީ ލީޑަރު އަދި އިނގުރައިދޫ ދާއިރާގެ މެމްބަރު އިބްރާހީމް ފަލާހް އެދިވަޑައިގެންފިއެވެ.
އަންނަ އަހަރު ބޭއްވުމަށް ހަމަޖެހިފައިވާ ލޯކަލް ކައުންސިލް އަދި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުގައި، ޕީޕަލްސް ނެޝަނަލް ކޮންގްރެސް (ޕީއެންސީ) ގެ ޓިކެޓުގައި ވާދަކުރަން ބޭނުންވާ ކެނޑިޑޭޓުން ހޮވުމަށް ބާއްވާ ޕްރައިމަރީގައި ބައިވެރިވުމުގެ ފުރުޞަތު، މާދަމާ ހުޅުވާލާން އެ ޕާޓީން ނިންމާފައިވާއިރު މިކަމާ ގުޅިގެން "މެންދުރަށް" މައުލޫމާތު ދެއްވަމުން މެމްބަރު ފަލާހު ވިދާޅުވީ ޕާޓީގެ ޕްރައިމަރީ ކުރިއަށްދާނީ ވަރަށް އިންސާފުވެރިކަމާއެކު ދެފުށް ފެންނަ ގޮތަކަށްކަމަށެވެ.

Ad by Hajj Corporation
އަދި މި ސަރުކާރުން ސީދާ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ އިސްނެންގެވުމާއެކު ގިނަ އަދަދެއްގެ ތަރައްގީގެ ޕްރޮޖެކްޓްތަކެއް މުޅި ރާއްޖޭގެ އެކި ހިސާބުތަކުގައި ކުރިއަށްގެންދާއިރު މި ޕްރޮޖެކްޓްތައް ރައީސްގެ ވައުދުފުޅާ އެއްގޮތަށް އަވަހަށް ނިންމައިދިނުމަށް އަންނަ ލޯކަލް ކައުންސިލް އިންތިހާބުގައި ސަރުކާރަށް ތާއީދުކުރައްވާ ބޭފުޅުން ކައުންސިލްތަކަށް ހޮއްވަވައިދިނުމަށް ފަލާހުވަނީ އިލްތިމާސްކުރައްވާފައެވެ.
" އަތޮޅުތެރޭގައު ވަރަށްގިނަ ޕްރޮޖެކްޓުތައް މި ސަރުކާރުން އެބަ ކުރިއަށްގެންދޭ. މި ޕްރޮޖެކްޓްތައް އަވަހަށް ނިންމައިދީ ރައްޔިތުންނަށް ޑެލިވަރކޮށްދިނުމަށް ރަށު ކައުންސިލްތަކަށް ސަރުކާރަށް ތާއީދުކުރައްވާ ވީހާވެސް ގިނަ އަދަދެއްގެ ކައުންސިލަރުން ހޮއްވަވާދެއްވުމަކީ އަޅުގަނޑުމެންގެ ވަރަށް ބޮޑު އެދުމެއް. އަޅުގަނޑަށް ޔަގީން ރައްޔިތުން އެކަން އެހެންކޮށްދެއްވާނެކަން . މިފަހަރުގެ ލޯކަލް ކައުންސިލް އިންތިހާބުވެގެންދާނީ އެއް ޕާޓީއަކަށް އެންމެ ބޮޑު ކާމިޔާބީއެއް ލިބޭނެ އިންތިހާބަށް". ޕީއެންސީގެ ޕީޖީ ލީޑަރު އަދި އިނގުރައިދޫ ދާއިރާގެ މެމްބަރު އިބްރާހީމް ފަލާހް
ޕްރައިމަރީގައި ބައިވެރިވުމުގެ ފުރުޞުތު މާދަމާއިން ފެށިގެން ޑިސެންބަރު މަހުގެ 15 ގެ ނިޔަލަށް ހުޅުވާލާއިރު، ކުރިމަތިލެވޭނީ ޕާޓީގެ ވެބްސައިޓުގައި އޮންނަ އޮންލައިން ފޯމެއް މެދުވެރިކޮށް މިވަގުތު ޕާޓީގެ މެންބަރެއްގެ ގޮތުގައި ދަފުތަރުވެފައިވާ ފަރާތްތަކަށެވެ.
އިލެކްޝަންސް ކޮމިޝަނުގެ ދަފްތަރުގައިވާގޮތުން ޕީއެންސީގައި 68،665 މެންބަރުން އެބަތިއްބެވެ.


