މިއަހަރުގެ ޖޫން މަހު ދައުލަތަށް 2.9 ބިލިޔަން ރުފިޔާގެ އާމްދަނީއެއް ލިބިފައިވާކަމަށް މާލީ ކަންތައްތަކާއި ތަރައްގީގެ ރޭވުންތެރިކަމާއި ބެހޭ ވުޒާރާގެ ތަފާސްހިސާބުތަކުން ދައްކައިފިއެވެ.

އެވުޒާރާއިން ވަނީ ދައުލަތުގެ ބަޖެޓުން ހޭދަކޮށްފައިވާ މިންވަރާއި، ދައުލަތަށް ލިބިފައިވާ އާމްދަނީ ހިމަނައި، ޖޫންމަހުގެ މަންތްލީ ފިސްކަލް ޑިވެލޮޕްމަންޓް ރިޕޯޓް އާންމުކޮށްފައެވެ.

މި ރިޕޯޓުން ދައްކާގޮތުގައި މިއަހަރުގެ ޖޫން މަހު ދައުލަތަށް 2.9 ބިލިޔަން ރުފިޔާގެ އާމްދަނީއެއް ވަނީ ލިބިފައެވެ. މިއީ މިދިޔަ އަހަރުގެ މި މުއްދަތާއި އަޅާބަލާއިރު 20.8 އިންސައްތަ އިތުރު އަދެދެކެވެ. މިދިޔަ އަހަރުގެ ޖޫންމަހު ދައުލަތަށް އާމްދަނީގެ ގޮތުގައި ލިބިފައިވަނީ 2.4 ބިލިޔަން ރުފިޔާއެވެ.

މާލީ ވުޒާރާގެ ތަފާސްހިސާބުތައް ދައްކާގޮތުން ޖޫންމަހު ލިބުނު އާމްދަނީގެ އެންމެ ބޮޑު ބައެއް ހިއްސާކުރަނީ ޓެކްސްގެ ގޮތުގައި ލިބުނު އާމްދަނީއެވެ. އެގޮތުން ޖޫންމަހު ޓެކްސްގެ ގޮތުގައި ދައުލަތަށް 2.1 ބިލިޔަން ރުފިޔާގެ އާމްދަނީއެއް ލިބިފައިވާއިރު، މިއީ މިދިޔަ އަހަރުގެ ޖޫންމަހު ޓެކްސްގެ ގޮތުގައި ދައުލަތަށް ލިބުނު 1.8 ބިލިޔަން ރުފިޔާގެ އާމްދަނީއާއި އަޅާބަލާއިރު 16.6 އިންސައްތަ އިތުރު އަދަދެކެވެ.

Ad by Hajj Corporation

ތަފާސްހިސާބުތަކުން ދައްކާގޮތުގައި މިދިޔަ ޖޫން މަހު ޓެކްސް ނޫން އާމްދަނީގެ ގޮތުގައި ދައުލަަތަށް 844 މިލިޔަން ރުފިޔާ ލިބިފައިވާއިރު، 2024ވަނަ އަހަރުގެ ޖޫން މަހު މި އަދަދު ހުރީ 622 ރުފިޔާގައެވެ. އެހެންކަމުން މިއީ 35.7 އިންސައްްތަ އިތުރު އަދަދެކެވެ. މީގެ އިތުރުން ޖޫން މަހު ހިލޭ އެހީގެ ގޮތުގައި ދައުލަތަށް 42.5 މިލިޔަން ރުފިޔާ ވަނީ ލިބިފައެވެ. މިއީ 2024ވަނަ އަހަރުގެ ޖޫން މަހު ދައުލަތަށް ހިލޭ އެހީގެ ގޮތުގައި ލިބުނު 16.9 މިލިޔަން ރުފިޔާއާއި އަޅާބަލާއިރު 151.5 އިންސައްތަ އިތުރު އަދަދެކެވެ.

އާމްދަނީގެ އިތުރުވުމާއެކު ސޮވެރިންގ ޑިވެލޮޕްމަންޓް ފަންޑަށް ޖަމާކުރި ފައިސާގެ އަދަދުވެސް މިދިޔަ ޖޫން މަހު އިތުރުވެފައިވާ ކަމަށް ތަފާސްހިސާބުތަކުން ދައްކައެވެ. އެގޮތުން މިއަހަރުގެ ޖޫން މަހު އެސްޑީއެފް ފަންޑަށް 143 މިލިޔަން ރުފިޔާ ޖަމާކޮށްފައިވާއިރު، މިއީ މިދިޔަ އަހަރުގެ ޖޫން މަހު މި ފަންޑަށް ޖަމާކުރި 93 މިލިޔަން ރުފިޔާއާއި އަޅާބަލާއިރު 53.8 އިންސައްތަ އިތުރު އަދަދެކެވެ.

މީގެ އިތުރުން ނިމިދިޔަ ޖޫންމަހު ދައުލަތުގެ ބަޖެޓުން 2.7 ބިލިޔަން ރުފިޔާ ހަރަދުކޮށްފައިވާއިރު، މިއީ 2024ވަނަ އަހަރުގެ ޖޫން މަހު ދައުލަތުން ކޮށްފައިވާ ހަރަދާ އަޅައިބަލާއިރު 3.6 އިންސައްތަ އިތުރު އަދަދެކެވެ. އެގޮތުން، ދައުލަތުގެ ރިކަރަންޓް ހަރަދަށް 2.3 ބިލިޔަން ރުފިޔާ ހަރަދުކޮށްފައިވާއިރު، ކެޕިޓަލް ހަރަދުގެ ގޮތުގައި 462 މިލިޔަން ރުފިޔާ ވަނީ ހަރަދުކޮށްފައެވެ.