ކުރީގެ ރައީސް ޔާމީން އަބުދުލްޤައްޔޫމަށް އެހެން މީހުންނަކީ އެއްވެސް ބަޔެއް ނޫންކަމަށާއި، އެމަނިކުފާނަށް ހުރިހާ މީހަކީ ވެސް ހަމަ ‘’ރައީސް ޔާމީން’’ ކަމަށް ދިއްދޫ ދާއިރާގެ މެމްބަރު އަބުދުއްލަތީފް މުހައްމަދު ވިދާޅުވެއްޖެއެވެ.

މެންދުރު ޓީވީން ހުކުރު ދުވަހުގެ ރޭ ގެނެސްދިން ’’ޖަވާބުދާރީ’’ ޕްރޮގްރާމްގައި ޕްރެޒެންޓަރ އައިމިނަތު ޝަފާ ވަނީ، 18 މަޖިލީހުގައި ލަތީފް ޕީޕީއެމްގައި ހުންނެވި ދުވަސްވަރު ޔާމީން ދޫކުރަށްވާ މައުމޫން ފަޅިއަށް އެރި ސަބަބާއި ގުޅެގޮތުންނާއި، އެ ދެބޭފުޅުންގެ ތަފާތާއި ބެހޭ ގޮތުން ސުވާލުކޮށްފައެވެ.

Ad by Hajj Corporation

މި ސުވާލަށް ޖަވާބު ދެއްވަމުން ލަތީފް ވިދާޅުވީ، ރައީސް ޔާމީން ދޫކޮށްލަން ޖެހުނީ މެމްބަރުންގެ މެދުގައި ތަފާތުކުރުންތައް ބޮޑުވުމުން ޕާޓީގެ ތެރޭގައި އުފެދުނު ޚިޔާލުތަފާތުވުންތަކުގެ ތެރޭގައި ކަމަށެވެ. އަދި އެއިރު މައުމޫން ހުންނެވީ ޔާނީމާއި ޚިޔާލުތަފާތުވެ، ސަރުކާރާއި ފެޔަށް ޖެހިވަޑައިގެންފައި ކަމަށް ލަތީފް ވިދާޅުވިއެވެ. އެ ޚިޔާލުތަފާތުވުންތަކުގެ ތެރެއިން އޭނާ އަށް ނެގުނީ މައުމޫންގެ ކޮޅު ކަމަށް ލަތީފް ވިދާޅުވިއެވެ.

ލަތީފް ވިދާޅުވީ، މައުމޫނަކީ ޚުލްޤުހެޔޮ، ކެތްތެރިކަމާއި ރުޅިމަޑުކަމުގެ ވެރި ޑިސިޕްލިންގެ މިސާލެއްކަމަށެވެ. ކިތަންމެ ހޫނުވެގެން ދިޔަނަމަވެސް އެބޭފުޅުންނާއި މުއާމަލާތް ކުރަށްވަނީ ކެތްރިކަމާއެކު ފުރިހަމަ ލީޑަރެއްގެ ސިފަތަކާއެކު ކަމަށް ލަތީފް ވިދާޅުވިއެވެ. އަދި މައުމޫނަކީ އެއްވެސް ހަރުކަށިކަމެއް ނޭއްގާނީކަމެއް، ނުގެންގުޅުއްވާ މަޑުމައިތިރިކަމާއި، ހިތްތިރިކަމުގެ ވެރިއެއް ކަމަށް ވެސް ވިދާޅުވިއެވެ.

‘’އެކަމު އެޔާއި މުޅިން ތަފާތު ޔާމީނު، ރައީސް ޔާމީނަކީ ވަރަށް އަވަހަށް ރުޅިއަންނަ، ކަންކަމުގައި ދެކޮޅު ނުބަލާ އަމިއްލަ އަމިއްލަ އަށް ކަންކަން ގެންގުޅުއްވުމުގެ ވިސްނުން ގެންގުޅުއްވި ބޭފުޅެއް، އެހެން މީހުންނަށް އިހްތިރާމް ކުޑަ، އެހެން މީހުން ދެކެ ރުޅިއަރާ ފޫހިވާ، ޔާމީންގެ ނުހުންނާނެ ކެތްތެރިކަމުގެ ސިފަ،’’ ލަތީފް ވިދާޅުވިއެވެ.

ލަތީފް ވިދާޅުވީ، ޕާޓީ އަކީ ވަތަށް ގިނަ ބަޔަކު ގޮވައިގެން އުޅެންޖެހޭ އެއްޗެއްކަމަށާއި، ޕާޓީގެ މެމްބަރުންނާއި މުއާމަލާތްކުރަން ޖެހޭނީ ކެތްތެރިކަމާއެކު ނަމަވެސް ޔާމީންގެ އެ ސިފަ ނުހުންނަ ކަމަށެވެ. އަދި ތަފާތު ވިސްނުމާއި ފިކުރުގެ މީހުންނާއެކު އުޅެންޖެހޭއިރު، ޔާމީނަށް އެކަން އިހްސާސް ނުކުރެވޭކަމަށް ލަތީފް ވިދާޅުވިއެވެ.

‘’ރައީސް ޔާމީނަށް ހުރިހާ ވެސް މީހަކީ ރައީސް ޔާމީން، ރައީސް ޔާމީންގެ ވިސްނުން ފުޅަކީ ތިމަން މަނިކުފާނުގެ ވިސްނުންފުޅަކީ ރަނގަޅު ގޮތޭ، ތިމަން މަނިކުފާނު ކުރާ ކަންތައްތަކަކީ އެންމެ ރަނގަޅު ކަންތައްތަކޭ، ތިމަން މަނިއްކުފާންކީއޭ ހުރިހާވެސް މީހަކީ’’ ލަތީފް އިތުރު ކުރެއްވިއެވެ.

ލަތީފް ވިދާޅުވީ، ޔާމީނަކީ އެހެން މީހުންނަށް ނަފުރަތުކުރާ، އެހެންމީހުންދެކެ ފޫހިވާ، އެހެންމީހުންދެކެ ރުޅިއަންނަ އަދި އެހެން މީހުންނަށް ގޯނާ ކުރުމުގެ އާދަ މިޒާޖުގައި ހުންނަ ބޭފުޅެއްކަމަށާއި، އަދި އެކަންކަން ރަނގަޅުވެސް ނުކުރެއްވި ކަމަށެވެ.

އެހެންކަމުން، ރައީސް ޔާމީނާއެކު މަސައްކަތް ކުރުމަށް ކިތަންމެ ރަނގަޅު، ކިތަންމެ ކެތްތެރި ބަޔަކު ތިބިނަމަވެސް ވަރަށް އުނދަގޫކަމަށް ލަތީފް ވިދާޅުވިއެވެ.