ހދ. ނައިވާދޫ ބިން ހިއްކުމާއި ގޮނޑުދޮށް ހިމާޔަތް ކުރުމުގެ މަޝްރޫއު މަޑުނުޖެހި، ވަރަށް އަވަހަށް ކުރިޔަށް ގެންދަވާނެ ކަމުގެ ޔަގީންކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވައިފިއެވެ.

ހދ. އަތޮޅަށް ރައީސް ކުރައްވަމުންގެންދަވާ ދަތުރުފުޅުގެ ތެރެއިން، އެ އަތޮޅު ނާވާއިދޫގެ ބިން ހިއްކުމާއި ގޮނޑުދޮށް ހިމާޔަތް ކުރުމުގެ މަޝްރޫއުގައި މިއަދު ވަނީ އެމްޓީސީސީއާއެކު ސޮއިކޮށްފައެވެ. ރައީސް އެފަދައިން ވިދާޅުވީ، އެ މަޝްރޫއުގެ އެއްބަސްވުމުގައި އެމްޓީސީސީއާއެކު ސަރުކާރުން ސޮއިކުރުމަށްފަހު، އެ ރަށުގެ ރައްޔިތުންނާ މުޚާތަބުކުރައްވައި ދެއްކެވި ވާހަކަފުޅުގައެވެ.

Ad by Hajj Corporation

އެގޮތުން ރައީސް ވިދާޅުވީ، މިދިޔަ ރިޔާސީ އިންތިހާބުގެ ކެމްޕެއިންގައި ނައިވާދޫއަށް ވި އެންމެ މުހިންމު ވައުދަކީ ރަށުގެ ބިން ހިއްކުމާއި ގޮނޑުދޮށް ހިމާޔަތް ކުރުމުގެ މަޝްރޫއު ކަމަށާއި، އެ މަޝްރޫއަށް ވަރަށް ބޮޑު އިސްކަމެއް ދެއްވައިގެން ކުރިޔަށް ގެންދަވާނެ ކަމަށެވެ.

އިރާދަކުރެއްވިއްޔާ ސަރުކާރުން މި މަޝްރޫއަށް ވަރަށް އިސްކަން ދީގެން ވަރަށް އަވަހަށް ކުރިއަށް ގެންދާނަން. އޭގެ ސަބަބަބުން ރަށަށް އިގްތިސާދީ ގޮތުން ވެސް ކުރިއެރުމުގައި ފަސޭހަތަކެއް، ކާމިޔާބީތަކެއް ހާސިލް ކުރުމަށް މަގުފަހިވެގެންދާނެ ކަން ޔަގީން، - ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު

ރައީސް ވިދާޅުވީ، ބިން ހިއްކުމުގެ މަޝްރޫއު ނިމުމުން ރައްޔިތުން ބޭނުންވާ މުހިންމު ކަންކަން ފުރިހަމަކޮށްދިނުމަށް ފަހިވާނެ ކަމަށާއި، އެގޮތުން ގެދޮރު ބިނާކުރުމާއި އެކިއެކި ބޭނުންތަކަށް ބިން އިތުރު ކުރެވޭނެ ކަމަށް ރައީސް ވިދާޅުވިއެވެ.

އެއާއެކު ރައީސް ވަނީ ނާވައިދޫގައި ފަށައިފައިވާ ނަމަވެސް މަޑު ޖެހިފައި ހުރި މަޝްރޫއުތައް ވެސް ހަލުވިކަމާއެކުގައި ކުރިއަށް ގެންދަވާނެ ކަމުގެ ޔަގީންކަން ދެއްވާފައެވެ.

ނާވައިދޫގެ ބިން ހިއްކުމާއި ގޮނޑުދޮށް ހިމާޔަތް ކުރުމުގެ މަޝްރޫއުގައި މިއަދު ސޮއިކޮށްފައިވާއިރު، އެ މަޝްރޫއުގައި ހައުސިން، ކޮންސްޓްރަކްޝަން އެންޑް އިންފްރާސްޓްރަކްޗާ މިނިސްޓްރީގެ ފަރާތުން ސޮއިކުރެއްވީ މިނިސްޓަރު ޑރ. އަބްދުﷲ މުއްތަލިބެވެ. އެމްޓީސީސީގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު އަހުމަދު ސައުދީއެވެ.

އާބާދީގައި 450 މީހުން ހިމެނޭ ނައިވާދޫ ބިން ހިއްކުމާއި ގޮނޑުދޮށް ހިމާޔަތް ކުރުމުގެ މަޝްރޫއުގެ ދަށުން ހަތް ހެކްޓަރުގެ ސަރަހައްދެއްގެ ބިން ހިއްކުމާއި 619 މީޓަރުގެ ސަރަހައްދެއްގައި ބޮޑުހިލައިގެ ރިވެޓްމަންޓް ޖެހުމާއި 45 މީޓަރުގެ ސަރަހައްދެއްގައި ބޮޑުހިލައިގެ ގްރޮއިން ޖެހުމުގެ މަސައްކަތް ހިމެނެއެވެ. މި މަޝްރޫއަކީ 82.64 މިލިއަން ރުފިޔާއަށް 300 ދުވަހުގެ ތެރޭގައި ނިންމަން އެމްޓީސީސީއާ ހަވާލުކޮށްފައިވާ މަޝްރޫއެކެވެ.