ކުޑަކުއްޖަކަށް ޖިންސީ ގޯނާކުރުމުގެ ތުހުމަތުގައި ދައުވާކޮށްފައިވާ މީހަކު ސިކުނޑީގެ އުނިކަމެއް ހުރުމުގެ ސަބަބުން ދައުވާ ލިބިގަތުމަށް ނުކުޅެދޭތީ، އެ މައްސަލަ ދައުލަތުން ވަނީ އަނބުރާ ގެންގޮސްފިއެވެ.

މި މައްސަލައަކީ މީގެ ހަ އަހަރު ކުރިން ދެކުނު އަތޮޅެއްގެ ރަށެއްގައި ހިނގި ކުޑަކުއްޖަކަށް ޖިންސީ ގޯނާކުރުމުގެ މައްސަލައެކެވެ. ދަށު ކޯޓުން މި މައްސަލައިގައި ކުށް ސާބިތުނުވާ ކަމަށް ނިންމުމާ ގުޅިގެން ދައުލަތުން ވަނީ އެ މައްސަލަ ހައި ކޯޓުގައި އިސްތިއުނާފް ކޮށްފައެވެ.

Ad by Hajj Corporation

ނަމަވެސް ހައި ކޯޓުގެ އަމުރަކަށް ހަދާފައިވާ މެޑިކަލް އެސެސްމަންޓުން ދައްކާގޮތުން، ދައުވާ ލިބުނު ފަރާތަކީ ދައުވާ ލިބިގަތުމުގެ ކުޅެދުންތެރިކަން ހުރި މީހެއް ނޫނެވެ. އެހެންކަމުން، މި މައްސަލަ އިތުރަށް ކުރިއަށް ގެންދަން ބޭނުން ނުވާ ކަމަށް ދައުލަތުން ވަނީ ނިންމާފައެވެ.

ދައުވާލިބުނު ފަރާތަށް ބޭނުންވާ ފަރުވާގެ އިންތިޒާމް ހަމަޖެއްސުމަށް، އޭނާ ދިރިއުޅޭ ރަށުގެ ކައުންސިލާ ގުޅިގެން މަސައްކަތްތަކެއް ކުރަމުން އަންނަކަމަށް ފުލުހުން ވަނީ ބުނެފައެވެ.

މި މައްސަލަ ބެއްލެވި ހައި ކޯޓުގެ ތިން ފަނޑިޔާރުންގެ އިއްތިފާގުން ވަނީ ދައުވާ ފޯމު ބާތިލްކޮށްފައެވެ.