އަހަރުގެ މިހާތަނަށް ރާއްޖެޒިޔާރަތްކުރި ފަތުރުވެރިންގެ އަދަދު 1.46 މިލިއަނަށް އަރައިފިއެވެ.

ފަތުރުވެރިކަމާ ބެހޭ ވުޒާރާއިން އާންމުކޮށްފައިވާ ތަފާސްހިސާބުތަކުން ދައްކާގޮތުގައި، މި ހިނގާ އޮގަސްޓު މަހުގެ 26 ވަނަ ދުވަހުގެ ނިޔަލަށް ރާއްޖެއަށް 1,463,566 ފަތުރުވެރިން ޒިޔާރަތްކޮށްފައިވެއެވެ.

Ad by Hajj Corporation

މިއީ 2024 ވަނަ އަހަރުގެ މި މުއްދަތާ އަޅާބަލާއިރު 9.2 އިންސައްތައިގެ ކުރިއެރުމެކެވެ.

އޯގަސްޓް މަހުގެ ދުވަހެއްގެ މައްޗަށް އެވްރެޖްކޮށް 6488 ފަތުރުވެރިން ރާއްޖެ އަންނައިރު، މި މަހުގެ އެންމެ ގިނަ ފަތުރުވެރިން ޒިޔާރަތްކުރި ދުވަހަކީ 16 އޯގަސްޓެވެ. އެދުވަހު 7،177 ފަތުރުވެރިން ޒިޔާރަތްކޮށްފައިވެއެވެ.

މިއަހަރުގެ މިހާތަނަށް އެންމެ ގިނަ ފަތުރުވެރިން ރާއްޖެ އައިސްފައި ވަނީ ޗައިނާއިންނެވެ. ޗައިނާގެ 230,374 ފަތުރުވެރިން ޒިޔާރަތްކުރި އިރު އެއީ މުޅި މާކެޓްގެ 15.7 އިންސައްތައެވެ. ދެވަނައަށް އެންމެ ގިނަ ފަތުރުވެރިން ޒިޔާރަތްކޮށްފައި ރަޝިޔާ އިން 174,434 ފަތުރުވެރިން ރާއްޖެ އައިއިރު ތިންވަނައިގައި އޮތް ޔޫކޭ އިން ޒިޔާރަތްކުރީ 132,732 ފަތުރުވެރިންނެވެ. މީގެ އިތުރުން އިޓަލީވިލާތުން 105،379 ފަތުރުވެރިން އައި އިރު ޖަރުމަނުވިލާތުން ޒިޔާރަތްކުރި ފަތުރުވެރިންގެ އަދަދުވަނީ 100،546 އަށް އަރާފައެވެ.

ރާއްޖެއަށް މި އަހަރު ޒިޔާރަތްކުރި ފަތުރުވެރިންގެ ތެރެއިން 1,074,917 ފަތުރުވެރިން ނުވަތަ 73.4 ޕަސެންޓް ޗުއްޓީ ހޭދަކުރީ ރިސޯޓުތަކުގަ އެވެ.

ގެސްޓްހައުސްތަކުގައި 319,516 ފަތުރުވެރިން ޗުއްޓީ ހޭދަކުރިއިރު، ހޮޓާތަކުގައި 38,421 ފަތުރުވެރިން އަދި ޓޫރިސްޓް އުޅަނދުތަކުގައި 29,699 ފަތުރުވެރިން ޗުއްޓީ ހޭދަކުރި އެވެ. މީގެ އިތުރުން އެހެނިހެން ތަންތަނުގައި 1,012 ފަތުރުވެރިން ޗުއްޓީ ހޭދަކުރި އެވެ.

ރާއްޖޭގައި މި ވަގުތު ފަތުރުވެރިކަމަށް 174 ރިސޯޓާއި 896 ގެސްޓްހައުސްގެ އިތުރުން 161 ސަފާރީ އުޅަނދާއި 16 ހޮޓާ ދަނީ ހިންގަމުންނެވެ.

ސަރުކާރުން އަމާޒުހިފާފައިވަނީ މިއަހަރު ރާއްޖެއަށް 2.3 މިލިޔަން ފަތުރުވެރިން ގެނައުމަށެވެ.

އަލަށް ހުޅުވި ވެލާނާ އިންޓަނޭޝަނަލް އެއާޕޯޓުގެ އައު ޓާމިނަލާއެކު، މި އަމާޒަށް ވާސިލްވުމަށް ބޮޑު އެހީއެއް ލިބޭނެކަމަށް ސަރުކާޒުން ބުނެއެވެ. އައު ޓާމިނަލުން އަހަރަކު 7.5 މިލިޔަން ފަތުރުވެރިންނަށް ޚިދުމަތް ދެވޭނެކަމަށް ސަރުކާރުން ބުނެއެވެ.