logo
ރިޕޯޓް

ކިޔާށެވެ. ލިޔާށެވެ. އަނެކާގެ އަބުރެއް އޮތްކަން ވެސް ދަންނާށެވެ!

މެންދުރު ޓީމް
28 އޯގަސްޓު 2025 - 15:51
ކިޔާށެވެ. ލިޔާށެވެ. އަނެކާގެ އަބުރެއް އޮތްކަން ވެސް ދަންނާށެވެ!

ޑިމޮކްރެޓިކް މުޖުތަމަޢެއްގައި މިނިވަން އަދި އެހާމެ އިންސާފުވެރި ނޫސްވެރިންނާއި ނޫސްވެރިކަމަކީ ވަރަށް މުހިންމު ދައުރެއް އަދާކުރާ ކަމެކެވެ. އެއީ ވަކިކޮޅަކަށް ނުޖެހި، ޒާތީ ތަޢައްސުބުން އެއްކިބާވެފައިވާ ގޮތައް، ފަރުދީ ހައްޤުތަކަށް ރައްކާތެރިވެ ތިބެ، މިނިވަންކަމާއެކު މަޢުލޫމާތު ފޯރުކޮށްދީ، މައްސަތަކާމެދު ސުވާލު އުފައްދާ، ރައްޔިތުންގެ އަޑު އުފުލައިދޭ ވަސީލަތެކެވެ. ނަމަވެސް، މީޑިއާގެ ފޯރުންތެރިކަމާއި ނުފޫޒު އިތުރުވެފައިވާ މިންވަރާއި، އަދި ވަކީން ޚާއްޞަކޮށް ސިޔާސީ ހަލަބޮލިކަމާއެކު، މީސްމީޑިއާއަށް ބަރޯސާވެފައިވާ މާޙައުލެއްގައި، ނޫސްވެރިކަން ކުރުމުގައި ވެސް ޖަވާބުދާރީވުމާއި،ޒާތީވުމާއި، މަޢުލޫމާތުގެ ސައްހަކަމާއި، އިތުބާރާއި، އަޚްލާޤީ އިންތަކާމެދު އެތައް ކަންބޮޑުވުންތައް އުފެދިފައިވެއެވެ.
ފާއިތުވަމުން މިދާ ހަފްތާގައި، ރައްޔިތުންގެ މަޖިލީހަށް ރައްޔިތުންގެ މަންދޫބަކު ހުށަހެޅި، މީޑިއާ ރެގިއުލޭޓްކުރުމުގެ ބިލާއި ގުޅޭގޮތުން ބައެއް ނޫސްވެރިންނާއި ސިޔާސީ އިދިކޮޅު ފަރާތްތަކުން ރާވާ އިންތިޒާމުކޮށްގެން މުޒާހަރާތަކާއި، ޕެޓިޝަންތަކާއި، އާންމު ވިސްނުމުގައި އިޖުތިމާއީ، އަދި ޤާނޫނީ އިމުން ބޭރު އެތައް ކަމެއް ދަނީ ހިންގަމުންނެވެ. މި ބިލަށް ޒިންމާދާރުކަމާއެކު ފާޑުކިޔާ ފަރާތްތަކުގެ ނަޒަރުގައި ބިލު ޖުމުލަގޮތެއްގައި ރަނގަޅެވެ. އެފަރާތްތަކުން ބުނާ ގޮތުގައި މީޑިއާގެ މިނިވަންކަން އޮންނަންވާނީ ޒިންމާދާރުކަމާއި، ޤާނޫނީ ހަމަތަކާއި، ޤާނޫނުއަސާސީގެ ތަރަހައިގެ ތެރޭގައެވެ. އެހެން ނަމަވެސް، ބައެއް ކުދިކުދި މައްސަލަތަކަށް ބިލު ދިރާސާކުރުމުގެ މަރުހަލާއިން ހައްލު ހޯދުމުން، ބިލު އިތުރަށް ފުރިހަމަވެގެންދާނެއެވެ.

މީޑިއާ ރެގިއުލޭޓްކުރަން ޖެހޭ!

Ad by Hajj Corporation

Ad by Hajj Corporation

ނޫސްވެރިކަމުގެ މިނިވަންކަމަކީ ވަރަށް މުހިންމު އަދި އަސާސީ ކަމެއް ނަމަވެސް،ރެގިއުލޭޓްކުރުމެއް ނެތި ތަންމިނަށް ދެވިފައި އޮންނަ މިނިވަންކަމެއް ނަހަމަގޮތުގައިފަސޭހައިން ބޭނުންކުރެވިދާނެއެވެ. އަދި ކުރަންވެސް ކުރާނެއެވެ. ޑިމޮކްރަސީގެ އެއް ތަނބުގެ ގޮތުގައި އޮންނަ މީޑިއާގެ މިނިވަންކަމަކީ ހަމައެއް، ލަމައެއް ނެތި އޮންނަން ޖެހޭ މިނިވަންކަމެއް ނޫނެވެ. މީޑިއާ ރެގިއުލޭޓްކުރުމުގެ ބިލު އޮތުމުގެ މަޤްޞަދަކީ، ބައެއް ފަހަރަށް އެއްވެސް ބަލާލުމެއް ނެތި، ވަކިކޮޅަކަށް ބުރަވެ ތިބެ ކުރާ ނޫސްވެރިކަމަށް، ޒިންމާދާރުވުމުގެ މޫރިތި ސިފަ ގެނައުމެވެ.

ކަންމިހެން އޮތް ނަމަވެސް، މި ބިލަށް ފާޑުކިޔާ ފަރާތްތަކުން ބުނާގޮތުގައި މިއީ ނޫސްވެރިކަމުގެ މިނިވަންކަމަށް ހުރަސްއެޅޭ ކަމެކެވެ. ޤަބޫލުކުރަން ޖެހޭ ހަޤީގަތަކީރެގިއުލޭޓްކުރުމަށް ގޮވާލުމަކީ ކޮންޓްރޯލްކުރުމަށް ގޮވާލުމެއް ނޫނެވެ. އެއީ ކޮންޓްރޯލްކުރުމެއް ވެސް ނޫނެވެ. ރެގިއުލޭޓްކުރަން ޖެހެނީ، މުޅި މީޑިއާގެ ހައްޤުގައެވެ. މީޑިއާގެ ރައްކާތެރި ކަމަކެވެ. އެއީ ނޫސްވެރިކަމަކީ ދޮގު މަޢުލޫމާތު ފެތުރުމާއި، އަބުރާބެހުމާއި އަދި މިނިވަންކަން ނަހަމަގޮތުގައި ބޭނުން ނުކުރާނެކަން ކަށަވަރުކުރުމަށެވެ.

ޙައްޤުތަކާއެކު ވާޖިބުތައްވެސް އޮންނާނެ

ޚިޔާލުފާޅުކުރުމުގެ މިނިވަންކަމުގެ ޙައްޤަކީ އަސާސީ ޙައްޤެކެވެ. ނަމަވެސް އެއީ އެހެން މީހުންނަށް ގެއްލުން ދިނުމުގެ، އަބުރާބެހުމުގެ ނުވަތަ އަނިޔާވެރިކަމަށް ހިތްވަރުދިނުމުގެ ޙައްޤެއް ނޫނެވެ. އެހެން ފަންނުތަކުގެ ހިދުމަތްތެރިންނެކޭ އެއްފަދައިން، ނޫސްވެރިންގެ މައްޗަށްވެސް ޒިންމާދާރުކަމާއެކު ޢަމަލުތައް ބައްޓަންކުރުން ވާޖިބެވެ. ޢާންމުންގެ ވިސްނުން ބައްޓަންކުރުމުގެ ބާރު ލިބިފައިވުމާއެކު، ރައްޔިތުންގެ ޤަދަރާއި ޙައްޤުތައް ރައްކާތެރިކުރުމުގެ ޒިންމާވެސް އޮވެއެވެ.

ތެދެކެވެ. ޑިމޮކްރަސީ ބިނާވެފައިވަނީ މިނިވަން ނޫސްވެރިކަމެއްގެ މައްޗަށެވެ. ޙަޤީޤަތާއި، އަޚްލާޤީ މިންގަނޑާއި، އެހެން މީހުންގެ ޙައްޤުތަކަށް އިޙްތިރާމްކުރުމުގެ އިމުގެ ތެރޭގައި ހިނގާ ނޫސްވެރިކަމެއްގެ މައްޗަށެވެ. މިކަން އޮޅުވާ ނުލާށެވެ.

ނޫސްވެރިންނަކީ ޤާނޫނަށްވުރެ މަތީގައި ތިބޭ ބައެއް ނޫން!

ނޫސްވެރިންނަކީ ދައުލަތެއްގެ ހަތަރު ވަނަ ބާރުކަމުގައި ބެލެވިފައިވީ ނަމަވެސް، ޤާނޫނު އަސާސީއަށް، ޤާނޫނަށް ތަބާވާންޖެހެއެވެ. ނޫސްވެރިއެއްކަމުގައިވުމަކީ އެ މީހެއްގެ ޢަމަލުތަކަށް ޖަވާބުދާރީވާން ނުޖެހޭނެ މީހެއް ނޫންނެވެ. އަބުރާބެހުމާއި، ޝަޚްޞު ހަލާކުކުރުމާއި، ދޮގު މަޢުލޫމާތު ފެތުރުމަކީ ނޫސްވެރިކަމެއް ނޫނެވެ. އެއީ ޤާނޫނީ ގޮތުން ކުށްވެރިވާނެ ކަމަކަށް ހަދަންޖެހެއެވެ. އެކެއްގެ ހައްޤުގެ ބޭނުންކުރަންޖެހޭނީ އަނެއްގެ ހައްޤަށް ރައްކާތެރިވެގެންނެވެ.

ޤާނޫނު ހެދެނީ އިންސާފާއި ހަމައިގެ ތެރޭންކުރެވޭ، ޢަދުވެރި، މިނިވަން، މަޢުލޫމާތުގެ ޞައްޙަ ނޫސްވެރިކަމަށް ހުރަސް އަޅާކަށް ނޫނެވެ. ޤާނޫނު ހެދެނީ ނޫސްވެރިކަމުގެ މިނިވަންކަމުގެ ބޭނުން ނޫސްވެރިންކުރާއިރު، ރައްޔިތުން ނުވަތަ ވަކިވަކި ފަރުދުންގެ ހައްޤުތައް ރައްކާތެރިކުރުމަށެވެ. މުޖުތަމަޢުއަށް ކުރިމަތިވެދާނެ ނޭދެވޭ ކަންކަމުން ސަލާމަތްކުރުމަށެވެ. ޤާނޫނުގެ ޙުކޫމަތު ދެމެހެއްޓުމަކީ ސެންސަރޝިޕެއް ނޫނެވެ.އެއީ ޢަދުލު އިންސާފާއި ޑިމޮކްރެޓިކް ނިޒާމަށް ކޮންމެހެން ބޭނުންވާ ކަމެކެވެ.

ސިޔާސީ އެޖެންޑާއަށް ރައްކާތެރިކަމެއް ނެތް!

މީޑިއާގެ މުހިންމު އެއް ދައުރަކީ ސަރުކާރުގެ ސިޔާސަތުތަކަށް ސަރުކާރުޖަވާބުދާރީކުރުވުމެވެ. ފޮށެމުން، ހޯއްގޮވަމުން، ވެރިންގެ ފަހަތުން ދުވުމެއް ނޫނެވެ.ހިތާމައަކީ މިއަދު ދިވެހިރާއްޖޭގެ ބައެއް މަދު މީޑިއާތަކާއި ނޫސްވެރިންގެ ކިބައިން ފެންނަނީ "މިނިވަންކަމުގެ" ނަމުގައި މީޑިއާ ނިވާފަތްގަނޑަކަށް ހަދައިގެން ސިޔާސީ ވާހަކަތައް ފެތުރުމާއި، ވަކި މަޞްލަޙަތުތަކެއް ޙިމާޔަތްކުރުމާއި، ބައިބައިވުން އުފެދޭފަދަ ވާހަކަތައް ފެތުރާ ތަނެވެ.  

މިފަދަ ޢަމަލުތަކުން ނޫސްވެރިކަމާމެދު ޢާންމުންގެ އިތުބާރު ގެއްލުމުގެ އިތުރުން ނޫސްވެރިކަމުގެ އަސާސް ވެސް ބަލިކަށިވެއެވެ. ނޫސްވެރިކަން އޮންނަންވާނީ ހަމައެކަނި ސަރުކާރުގެ ނުފޫޒުން އެކަނި އެއްކިބާވެގެން އެކަންޏެއް ނޫނެވެ.ނޫސްވެރިކަން އޮންނަންވާނީ ސިޔާސީ ފިކުރުތަކާއި، ސިޔާސީ ޕާޓީތަކާއި، ޒާތީވިސްނުންތަކާއި އަދި ވިޔަފާރީގެ ނުފޫޒުތަކުން ވެސް އެއްކިބާވެފައެވެ.

އަބުރާބެހުމުގެ އަގެއް އޮންނަންވާނެ!

މީޑިއާގެ މިނިވަންކަމުން އެހެން މީހުންގެ އަބުރާބެހުމުގެ ޙައްޤެއް ނުލިބެއެވެ. ދޮގު ތުހުމަތުތަކާއި، ނަމާއި އަބުރަށް ގެއްލުންދިނުމާއި، ޝަޚްޞިއްޔަތަށް ހަމަލާދިނުމަކީ "ނޫސްވެރިކަންކުރުން" ކަމުގައި ބުނެ ދިފާޢުކުރެވޭނެ ކަންކަމެއް ނޫނެވެ. ނޫސްވެރިން ތައްޔާރަށް ތިބެންވާނީ ޤާނޫނީ އަދި އަޚްލާޤީ ހައްދުތައް ފަހަނައަޅާދާ ލިޔުންތަކާއި ރިޕޯޓްތަކަށް ޖަވާބުދާރީވާށެވެ. ނޫސްވެރިޔަކު ވިޔަސް އެހެން މީހަކު ވިޔަސް، ކުށެއް ކޮށްފިނަމަ އަދަބު ލިބެންޖެހޭނެއެވެ. ހައްޤަކަށް އަރައިގެންފިނަމަ، އެކަމެއް ބެލެންޖެހޭނެއެވެ. އަބުރު ނަގާލައިފިނަމަ، އެ އަބުރުގެ އަގު އަދާކުރަންޖެހޭނެއެވެ. މީޑިއާ ނިވާފަތްގަނޑަކަށް ހަދައިގެން، ޤާނޫނާއި ފަރުދީ ހައްޤުތަކާއި އިންސާނީ ކަރާމާތްތައް މުގުރާ ނުހެދޭނެއެވެ. އެއީ ރަނގަޅު ކަމެއް ކަމުގައި ކިތަންމެ ބާރަށް ބުންޏަސް އެއީ ގޯހެކެވެ.

'ދުވަސްވީ ނޫސްވެރިން' އަކީ މުޅި މީޑިއާއެއް ނޫން!

މީޑިއާގައި ނުފޫޒުގަދަ، ދުވަސްވީ، ޒަމާންވީ، ތަޖުރިބާކާރުން ކަމުގައި ބުނާ މީހުންވެސް މަދުން ނަމަވެސް އުޅެއެވެ. އެމީޙުންގެ ނަޒަރުގައި، އެމީހުން މީޑިއާގެ ކަންކަމުގައި ބުނާ ބުނުމަކީ އެންމެ ފަހުގެ ބަހެވެ. އެއީ ކަން އޮންނަންވީ ގޮތެވެ. ދަންނަވަންތޯއެވެ. ކިތަންމެ ދުވަސްވިޔަކަސް، ކިތަންމެ ތަޖުރިބާކާރަސް، ކިތަންމެ ނުފޫޒުގަދަޔަސް، މުޅި މީޑިއާ ޕްރޮފެޝަންގެ ނަމުގައި، ދެތިން މީހަކަށް ބަހެއް ނުކިޔޭނެއެވެ. ދިވެހިރާއްޖޭގެ ނޫސްވެރިކަން މާނަކުރެވެނީ މަދު ބައެއްގެ މައްޗަކަށް ނޫނެވެ. އެކަން މާނަކުރެވޭނީ ދިވެހިރާއްޖޭގައި މަސައްކަތްކުރާ ހުރިހާ ނޫސްވެރިންގެ މައްޗަށެވެ. އެއިން ކޮންމެ މީހަކުވެސް އަމިއްލަ އަޚްލާޤީ އަދި އެޑިޓޯރިއަލް ވިސްނުންތަކެއް ހުންނާނެއެވެ. ހުރިހާ ނޫސްވެރިންނަކީ އަބުރާބެހެން ބޭނުންވާ މީހުންނެއް ނޫނެވެ.

ހަމައެކަނި ސީނިއަރ ނޫސްވެރިން ނުވަތަ ވަކި މީޑިއާތަކެއް "ޙަޤީޤީ" މީޑިއާގެ ގޮތުގައިތަމްސީލުކުރާ ކަމަށް ދެއްކުމަކީ އޮޅުވާލުމެކެވެ. ޙަޤީޤީ ތަމްސީލުކުރުން އަންނަނީ ގިނަ މީހުންގެ މައްޗަށެވެ. މީޑިއާ ރެގިއުލޭޓްކުރަން މިހާރު މަޖިލީހަށް ވައްދާފައިވާ ބިލަށް ގިނަ ނޫސްވެރިން ތާއީދުކުރެއެވެ.

ޢަދުލުވެރި ނޫސްވެރިކަމަކަށް ވަކާލާތުކުރަމާތޯ؟

ދުޅަހެޔޮ ޑިމޮކްރަސީއަކަށް ބޭނުންވަނީ މިނިވަން، ޢަދުލުވެރި، އަޚްލާޤީ އަދި ޤާނޫނީ ނޫސްވެރިކަމެކެވެ. ނޫސްވެރިކަމުން ރައްޔިތުންނަށް ޚިދުމަތްކުރާނަމަ، އެކަން ކުރަންވާނީ ޤާނޫނީ އިމުގެ ތެރޭންނެވެ.

Hajj Corpooration

Hajj Corpooration

ކޮމެންޓް

ގުޅުންހުރި ލިޔުންތައް

''މިއީ ނުފޫޒުން ސަލާމަތްކޮށްދޭނެ 100 ޕަސެންޓް މީޑިއާ ޕްރޯ ސަރުކާރެއް''ރިޕޯޓް | 16 ގަޑިއިރު ކުރިންކިޔާށެވެ. ލިޔާށެވެ. އަނެކާގެ އަބުރެއް އޮތްކަން ވެސް ދަންނާށެވެ!ރިޕޯޓް | ދުވަހެއް ކުރިންއެއްވެސް ނޫސްވެރިއަކު ހައްޔަރެއް ނުކުރޭ، ދުރަށް ޖެއްސީ ނަސޭހަތް ދިނުމަށްފަހު: ވަޒީރު އިޙްސާންޚަބަރު | 2 ދުވަސް ކުރިންއަންހެން ނޫސްވެރިންނަށް ފުރައްސާރަކުރުން އިތުރުވެފައިވާތީ އެމްޖޭއޭގެ ކަންބޮޑުވުންޚަބަރު | 7 މަސް ކުރިން