ރިއަލް މެޑްރިޑްގެ ބްރެޒިލިއަން ތަރި ވިނިސިއަސް ޖޫނިއާގެ މޮޅު ކުޅުމާއެކު ރެއާލް މެޑްރިޑް ލަލީގާގެ ތިންވަނަ މެޗުވެސް ކާމިޔާބުކޮށްފިއެވެ. ވީއޭއާރުގެ އެހީގައި ރެއާލްގެ ޖުމްލަ ތިން ގޯލެއް ބާތިލް ކުރި މިމެޗު ރެއާލް ކާމިޔާބުކުރީ 2-1 އިންނެވެ.

މިމެޗުގައި ޖުމްލަ ރެއާލް އިން 5 ގޯލެއް ޖަެހިނަމަވެސް، ވީއޭއާރުގެ ނިންމުންތަކުގެ ސަބަބުން މެޑްރިޑުގެ 3 ގޯލު ބާތިލުވިއެވެ.

Ad by Hajj Corporation

ރެއާލް ގެ ދަނޑުގައި ކުޅުނު މިމެޗުގެ 7 ވަނަ މިނެޓުގައި ކައިލިއަން އެމްބާޕޭ ޖެހި ގޯލު ވީއޭއާރު ބަލައި އޮފްސައިޑްގެ ސަބަބުން ބާތިލުވިއެވެ. އެމްބާްޕޭގެ އޮފްސައިޑް ވެފައިވަނީ ބޮލުގެ އިސްތަށިކޮޅެވެ. އަދި އޭގެ 11 މިނެޓު ފަހުން މަޔޯކާގެ ސްޓްރައިކަރު މުރިޤީ ކޯނަރ އެޓީމަށް ލިބުނު ފުރަތަމަ ފުރުސަތުގައި ކޯނަރަކުން އެޓީމަށް ލީޑުނަގައިދިނެވެ.

ނަމަވެސް މެޑްރިޑުން ވިދިވިދިގެން ދެ ގޯލު ޖެހިއެވެ. 37 ވަނަ މިނެޓުގައި އަރްދާ ގުލަރ ބޮލުން ގޯލެއް ޖެހިއިރު، އޭގެ މިނެޓެއް ފަހުން ވިނިސިއަސް ވަނީ ރީތި ގޯލެއް އޭގެ މިނެޓެއް ފަހުން ޖަހާފައެވެ.

ފުރަތަމަ ހާފުގެ އިތުރު ވަގުތުގައި އެމްބާޕޭ ޖެހި ދެވަނަ ގޯލު އޮފްސައިޑްގެ ސަބަބުން ބާތިލުކުރިއެވެ. އަދި ދެވަނަ ހާފުފެށިގެން 55 ވަނަ މިނެޓުގައި ގުލަރ ޖެހި ގޯލެއްވެސް ވީއޭއާރުގެ ނިންމުމަކުން ބާތިލުވިއެވެ.

ވިނީ ވަނީ މިސީޒަނުގައި މިހާތަނަށް ކުޅުނު ތިން މެޗުން ދެގޯލާއި އެއް އެސިސްޓް ހަދާފައެވެ. މިމޮޅާއެކު ރެއާލް މިސީޒަނުގައި މިހާތަނަށް ކުޅުނު ތިން މެޗުން 9 ޕޮއިންޓާއެކު މިވަގުތު އޮތީ ތާވަލުގެ އެއްވަނައިގައެވެ. ލަލީގާގައި މިރޭ ބާސެލޯނާ ވަޔެކާނޯ އާއި ދެކޮޅަށް ނިކުންނާނެއެވެ. މިމެޗު ފަށާނީ ރާއްޖެގަޑިން މިރޭ 12:30 ގައެވެ.