ވޯލްޑް ޗެންޕިއަން އާޖެންޓީނާގެ ކީޕަރު އެމިލިއާނޯ މާޓިނެޒް މެންޗެސްޓަރ ޔުނައިޓެޑާ ގުޅުމަށް ކުޅުންތެރިޔާ އާއި ދެމެދު އެއްބަސްވުމަކަށް އައިސްފިއެވެ.

ޑެހެޔާ މެންޗެސްޓަރ ޔުނައިޓެޑް ދޫކޮށްލުމަށްފަހު ޔުނައިޓެޑަށް ދިމާވެފައިވާ އެންމެ ބޮޑު މައްސަލައަކީ ގޯލު ކީޕަރުންގެ މައްސަލައެވެ. އެކަން މިސީޒަނުގައި މިހާތަނަށް ކުޅުނު ހަތަރު މެޗުންވެސް ވަނީ ފެނިގެން ގޮސްފައެވެ. ޔުނައިޓެޑުގެ ގޯލް ކީޕަރުން ކަމުގައިވާ އާންދްރޭ އޮނާނާ އަދި އަލްޓައި ބައިންދިރު ދައްކަމުންދާ ފެންވަރާމެދު ހިތްހަމަނުޖެހުމާއެކު، ޔުނައިޓެޑް ވަނީ ޓްރާންސްފާ މާކެޓް ބަންދުވާން ފަހުވަގުތަށް ވެފައިވަނިކޮށް ކީޕަރެއް ހޯދުމަށްވަނީ އަވަސް މަސައްކަތްތަކެއް ފަށާފައެވެ.

Ad by Hajj Corporation

ޔުނައިޓެޑްގެ ސްކޮޑުގައި ތިބި ކުޅުންތެރިން ވެސް މިހާރުގެ ގޯލްކީޕަރުންނާމެދު އިތުބާރު ގެއްލިފައިވާކަމަށް ރިޕޯޓުތަކުން ދައްކައެވެ. މި މޫސުމުގައި ފޯވަޑް ލައިނަށް 200 މިލިއަން ޕައުންޑަށްވުރެ ގިނަ އަދަދެއްގެ ފައިސާ ހޭދަކޮށްފައިވުމާއެކު، ގޯލްކީޕަރެއް ގަތުމަށް ބަޖެޓުން ބޮޑު އަދަދެއް ނުލިބޭނެއެވެ.

ކުރިން ރޯޔަލް އެންޓްވާޕްގެ ސެނެ ލެމެންސްއާ ގުޅުމަށް މަސައްކަތްކުރި ނަމަވެސް، މިހާރު ޔުނައިޓެޑް ވަނީ މާޓިނެޒްއާ ދިމާއަށް އެނބުރިފައެވެ. މީގެ ކުރިންވެސް ޔުނައިޓެޑުން މިސީޒަނުގައި މާޓިނެޒް ލޯނުގައި ގެނައުމަށް ކުރި މަސައްކަތް ނާކާމިޔާބުވެފައިވެއެވެ.

މިއާއެކު ހޯމަ ދުވަހުގެ ރޭ ޓްރާންސްފަރ ވިންޑޯ ބަންދުވުމުގެ ކުރިން އައު ގޯލްކީޕަރަކު ޔުނައިޓެޑްއާ ގުޅޭނެކަން ކަށަވަރެވެ. މިވަގުތު ކުލަބުން ކުރިޔަށް ގެންދަނީ އެސްޓަންވިލާ އާއެކު ފީއަކަށް އެއްބަސްވުމުގެ މަސައްކަތްތަކެވެ.