ތައިލެންޑްގައި ބޭއްވުނު 2025 ވަނަ އަހަރުގެ އެފްއައިވީބީ އަންހެނުންގެ ވޮލީބޯޅަ ވޯލްޑް ޗެމްޕިއަންޝިޕްގެ ފައިނަލްގައި އޮލިމްޕިކް ޗެމްޕިއަނުން ކަމުގައިވާ އިޓަލީން ތުރުކީ ބަލިކޮށް މުބާރާތުގެ ޗެމްޕިއަންކަން ހޯދައިފިއެވެ.

އާދީއްތަ ދުވަހު ކުޅުނު ފައިނަލް މެޗުގައި އިޓަލީން ތުރުކީ ބަލިކުރީ ފަސް ސެޓުން 3-2 (25-23، 13-25، 26-24، 19-25، 15-8) ގެ ނަތީޖާއަކުންނެވެ. ދުނިޔޭގެ އެންމެ ވަރުގަދަ ދެ ޤައުމު ދެމެދު ކުޅުނު ވާދަވެރި މެޗެއްގައި އިޓަލީން މުބާރާތުގެ ޗެމްޕިއަންކަން ހޯދީ ޓައި-ބްރޭކް ސެޓުގައެވެ.

Ad by Hajj Corporation

މި ކާމިޔާބީއާއެކު އިޓަލީން ވޭތުވެދިޔަ އަހަރާއި ބައިގެ ތެރޭގައި ވޮލީބޯޅައިގެ އެންމެ ބޮޑެތި ހަތަރު މުބާރާތް ކާމިޔާބުކޮށްފައިވެއެވެ. އެއީ އޮލިމްޕިކް ރަން މެޑަލް، ވޮލީބޯޅަ ނޭޝަންސް ލީގް، ވޯލްޑް ޗެމްޕިއަންޝިޕް އަދި ވީއެންއެލްގެ ޗެމްޕިއަންކަމެވެ.

ތުރުކީއަށް މި މުބާރާތުގެ ތާރީޚުގައި ފުރަތަމަ ފަހަރަށް ޗެމްޕިއަންކަން ހޯދުމުގެ ފުރުސަތު ލިބުނު ނަމަވެސް، އިޓަލީން އެ ފުރުސަތު ނަގާލިއެވެ. އިޓަލީއަށް މިއީ 2002 ގައި ހޯދި ޗެމްޕިއަންކަމަށްފަހު ދެވަނަ ފަހަރަށް ހޯދި ވޯލްޑް ޗެމްޕިއަންޝިޕެވެ. އަދި ވޭތުވެދިޔަ ތިން ފައިނަލްގައިވެސް އިޓަލީ ވަނީ ކުޅެފައެވެ.

މެޗުގެ އެންމެ މޮޅު ކުޅުންތެރިޔާގެ ގޮތުގައި ތުރުކީގެ މެލިސާ ވަރގަސް ފާހަގަކުރެވުނެވެ. އޭނާ 33 ޕޮއިންޓް ހޯދިއެވެ. އޭގެ ތެރޭގައި 28 ކިލްސް، 4 އޭސް އަދި އެއް ބްލޮކް ހިމެނެއެވެ. އިޓަލީގެ ފަރާތުން ޕައޯލާ އެގޮނޫ 22 ޕޮއިންޓް ހޯދިއިރު، މިރިއަމް ސިއްލާ 19 ޕޮއިންޓް ހޯދިއެވެ.