ފަލަސްތީނުގެ ޣައްޒާއަށް އެހީ ވަނުން އިސްރާއީލުން މަނާކޮށް، ޣައްޒާ ރައްޔިތުން ބަނޑަށް ޖެއްސުމަށް ކުރާ މަސައްކަތް ނިމުމަކަށް ގެނައުމަށް ދުނިޔޭގެ ސިއްހަތާ ބެހޭ ޖަމިއްޔާ (ޑަބްލިއުއެޗްއޯ) އިން ތަކުރާރުކޮށް ގޮވަމުން އެބަދެއެވެ.

ފާއިތުވި 24 ގަޑިއިރު ތެރޭ ކާބޯތަކެތި ލިބުމުން މަހްރޫމްވެ، ބަނޑުހައިހޫނުކަން ތަހައްމަލު ކުރަން ޖެހުމުގެ ސަބަބުން ފަސަލްތީނުގެ ޣައްޒާގައި އިތުރު 6 މީހުން ވަނީ ޝަހީދުވެފައެވެ.

Ad by Hajj Corporation

ފަލަސްތީނުގެ ހެލްތް މިނިސްޓްރީން ހާމަކޮށްފައިވާ ގޮތުގައި ޝަހީދުވި 6 މީހުންގެ ތެރޭގައި 2 ކުޑަކުދިން ވެސް ހިމެނެއެވެ.

ޑަބްލިއުއެޗްއޯގެ ވެރިޔާ، ޓެޑްރޯސް އަދަނޮމް ގެބްރެޔެސަސް ވަނީ އިސްރާއީލުން ޣައްޒާއަށް ކުރިމަތިކުރާ ހަނގުރާމަ ފެށުނު ފަހުން މަދުވެގެން 370 މީހުން ކާނާ ނުލިބުމުގެ ސަބަބުން ޝަހީދުވެފައިވާ ކަމަށް ވިދާޅުވެފައެވެ.

ނިރުބަވެރި އިސްރާއީލުން 2023 ވަނަ އަހަރުގެ އޮކްޓޫބަރު މަހުގެ 7 ވަނަ ދުވަހު ޣައްޒާއަށް ހަމަލާ ދޭން ފެށި ފަހުން ބަނޑުހައިހޫނުކަން ތަހައްމަލުކޮށް، މަލްނިއުޓްރިޝަނުގެ ޝިކާރައަކަށްވެ ޝަހީދުވި މީހުންގެ ޖުމްލަ އަދަދު ވަނީ 393 އަށް އަރާފައެވެ. މީގެ ތެރޭގައި 140 ކުޑަކުދިން ވެސް ހިމެނެއެވެ.