އެމްޑީޕީން ވަކިވެވަޑައިގެން ފައްޓަވާ އައު ދަތުރަކީ ކާމިޔާބު ދަތުރަކަށްވުމަކީ އުންމީދުކަމަށް ކުރީގެ ޔޫތު މިނިސްޓަރު އަހްމަދު މަހްލޫފް ހޯމަ ދުވަހު ވިދާޅުވެއްޖެއެވެ.

ހޯމަ ދުވަހު އެމްޑީޕީއިން ވަކިވެވަޑައިގެންފައިވާ މަހްލޫފް މި ސަރުކާރާއި ގުޅެން އުޅޭކަމުގެ އަޑުތައް ވަނީ ގަދަވެފައެވެ. އެއީ މި ސަރުކާރުގެ ޚިދުމަތްތައް ބަލައިގަނެ އިދިކޮޅުގައި ތިއްބެވި ބޭފުޅުން ވެސް ގައުމީ ޚިދުމަތަށް މި ސަރުކާރަށް އެއްބާރުލުންދޭން ފެށުންކަމަށް ގިނަ ބަޔަކު ސިފަކުރެއެވެ. އަދި މަހްލޫފް ފަދަ ކުރީގެ މިނިސްޓަރުކަމާއި، މަޖިލިސް މެމްބަރުކަން ކުރަށްވާފައިވާ ހައި-ލެވެލް ޕޮލިޓީޝަނެއް އެމްޑީޕީ ދޫކޮށްލާނީ އެ ޕާޓީއާއި މެދު އުންމީދު ނެތުމުންކަމަށް ވެސް ގިނަ ބަޔަކު އަންނަނީ ބުނަމުނެވެ.

Ad by Hajj Corporation

އެމްޑީޕީން މުޅި ގައުމު ހަލަބޮލިކުރަން މަސައްކަތް ފަށާފައިވަނިކޮށް، އެ ޕާޓީދޫކޮށްލެއްވި މަހްލޫފް ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވެފައި ވަނީ  2015 ވަނަ އަހަރުން ފެށިގެން އެމްޑީޕީއާއެކު މަސައްކަތްކުރުމުގެ ފުރުސަތު ލިބުނު ކަމަށްޓަކައި އުފާކުރައްވާ ކަމަށެވެ.

މަހްލޫފް އިތުރަށް ފާހަގަކުރައްވާފައިވަނީ ރައީސް އިބްރާހިމް މުހައްމަދު ޞާލިހުގެ ކެބިނެޓުގައި ރައްޔިތުންނަށް ޚިދުމަތްކުރުމުގެ ފުރުސަތު ލިބުނުކަމަށްޓަކައި ޝުކުރުވެރިވާ ކަމަށެވެ. އަދި އެމްޑީޕީގެ މެންބަރެއްގެ ގޮތުގައި ހުންނެވިއިރު އެހީތެރިވެދެއްވި އެންމެހާ ޕާޓީގެ މެންބަރުންނަށް ޝުކުރު އަދާކުރައްވާފައިވެއެވެ.

"2015 ވަނަ އަހަރު އެމްޑީޕީ އާއެކު މަސައްކަތްފެށީ ގަދަކޮށް އޮތް ޕީޕީއެމްގެ ސަރުކާރުދޫކޮށް ނުކުމެއެވެ. އެއީ ޖަލުން އަދި ގޭބަންދުން، އެތައް ގުރުބާނީއެއްވެގެން ގެނައިވެރިކަމެކެވެ،" މަހްލޫފް ވިދާޅުވިއެވެ.

މަހްލޫފް ފާހަގަކުރެއްވި ގޮތުގައި ސިޔާސީ ޕޯޑިއަމްތަކަށް އަރާ އަދި ސިޔާސީ މަސައްކަތެއްގައި އަމަލީގޮތުން ނޫޅޭތާ 2 އަހަރު ވެފައިވާއިރު، އެމްޑީޕީން ވަކިވުމުގެ ނިންމުމަކީ ވަރަށް އުނދަގޫ ނިންމުމެއް ކަމަށެވެ. ނަމަވެސް އެކަން އެނގެންޖެހޭ ފަރާތްތަކަށް ސާފުވާނެކަމުގެ ޔަގީންކަން އޮތް ކަމަށް ވިދާޅުވިއެވެ.

މަހްލޫފްގެ ދުޢާއަކީ މިފަށާ އައު ދަތުރަކީ ﷲ ގެ އިރާދަފުޅާއެކު ކާމިޔާބު ދަތުރަކަށް ވުން ކަމަށް ވިދާޅުވެފައިވެއެވެ.

މަހްލޫފް މި ސަރުކާރާއި ގުޅިވަޑައިގެންފިނަމަ އެކަމުން ދޭހަވަނީ މި ސަރުކާރަށް އޮތް ތާއީދާއި، ކުރިމަގުގެ އުންމީދު ބޮޑުކަމެވެ.