ރާއްޖޭގައި މަސްވެރިކަމުގެ ދާއިރާ ކުރިއަރުވައި، ދިވެހި މަސްވެރި އުޅަނދުތައް އަޕްގްރޭޑް ކުރެވިދާނެ ގޮތަކާއި ގުޅޭ ގޮތުން ޗައިނާގެ ކުންފުންޏަކާއެކު މަޝްވަރާކޮށްފިއެވެ.

މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަހުމަދު ޝިޔާމް، ޗައިނާގެ ފުޖިއަން މާވެއި ޝިޕްބިލްޑިން ކުންފުންޏަށް، އެ ވުޒާރާގެ އިސް އޮފިޝަލުންނާއެކު ވަނީ ޒިޔާރަތްކުރައްވާފައެވެ. މި ޒިޔާރަތުގެ މައިގަނޑު މަގްސަދަކީ ޗައިނާގެ ބޯޓުބަނދަރު ކުރުމުގެ ސިނާއަތާއި ބެހޭ އިތުރު މައުލޫމާތު ހޯދައި، ދިވެހިރާއްޖޭގެ މަސްވެރިކަމުގެ ދާއިރާ ތަރައްގީކުރުމަށް ބޭނުންކުރެވިދާނެ ކުރިއަރާފައިވާ އުފެއްދުންތަކާއި، ޓެކްނޮލޮޖީތަކާ ބެހޭގޮތުން މަޝްވަރާ ކުރުމެވެ.

Ad by Hajj Corporation

މި ޒިޔާރަތުގައި ވަޒީރު ވަނީ ޗައިނާގެ ބޯޓުބަނދަރު ކުރުމުގެ ސިނާއަތުގައި ބޭނުންކުރާ ޒަމާނީ އުކުޅުތަކާއި، ފަންނުވެރިކަން ދެނެގަތުމަށް ވަރަށް ބޮޑު ސަމާލުކަމެއް ދެއްވާއެވެ. އެގޮތުން، އެ ކުންފުނީގެ މާހިރުންނާ ބައްދަލުކުރައްވައި، މަސްވެރި އޮޑިފަހަރުގެ ޑިޒައިނާއި، ހަކަތައިގެ ކެޕޭސިޓީ އިތުރުކުރުމަށް ބޭނުންކުރެވިދާނެ އައު ހިޔާލުތަކާއި ޓެކްނޮލޮޖީތަކާ ބެހޭގޮތުން މަޝްވަރާކޮށްފައެވެ.

ރާއްޖޭގައި ޒަމާނީ ޓެކްނޮލޮޖީތަކުގެ އެހީގައި، ދިވެހި މަސްވެރި އޮޑިފަހަރު އިތުރަށް ހަރުދަނާކޮށް، އެހީއަކަށް ވާނެ ކަންކަން ހޯދުމަކީ، ވަޒީރު ޝިޔާމްގެ ޒިޔާރަތުގެ މުހިންމު ބޭނުމެކެވެ. މީގެ އިތުރުން، މަސްވެރިކަމާ ގުޅުންހުރި އެހެނިހެން ސިނާއަތްތަކަށް އައު އުފެއްދުންތައް ތައާރަފްކުރުމަށް ބޭނުންވާ އެހީތެރިކަން ހޯދުމަށް ވެސް އެ ޒިޔާރަތުގައި ވަނީ މަޝްވަރާކޮށްފައެވެ.

އެ ޒިޔާރަތުން ޗައިނާގެ ބޯޓުބަނދަރު ކުރުމުގެ ދާއިރާގައި ހުރި ތަޖުރިބާ އާއި ފަންނުވެރިކަން ދިވެހިރާއްޖެއަށް ގެނައުމަށް މަގުފަހިވެ، މަސްވެރިކަމުގެ ސިނާއަތަށް ޒަމާނީ ބަދަލުތަކެއް ގެނައުމަށް މަސްވެރިކަމާއި ބެހޭ ވުޒާރާއިން ދަނީ މަސައްކަތް ކުރައްވަމުންނެވެ.