ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމެޓީގެ ސިއްރު ބައްދަލުވުމަށް ގަދަކަމުން ވަދެ، ބައްދަލުވުން ކުރިއަށް ގެންދިޔުމަށް ހުރަސްއެޅި ނޫސްވެރިން ނެރެންޖެހުނު ކަމަށް ފުނަދޫ ދާއިރާގެ މެންބަރު މުޙައްމަދު މަމްދޫޙް ވިދާޅުވެއްޖެއެވެ.

މީޑިއާ ރެގިއުލޭޓް ކުރާ ބިލުގެ މަސައްކަތް ކުރިއަށްދިޔަ ބުދަ ދުވަހުގެ ސިއްރު ބައްދަލުވުމަށް ތިން ނޫސްވެރިއަކު ވަދެގަތް ކަމަށް މަޖިލީހުން ބުނެފައިވެއެވެ. މި ބައްދަލުވުމަކީ މަޖިލީހުގެ ގަވާއިދުގެ 167 ވަނަ މާއްދާގެ ދަށުން ބޭއްވުނު ސިއްރު ބައްދަލުވުމެއް ކަމަށާއި، މިފަދަ ބައްދަލުވުންތަކުގައި ކޮމިޓީގެ މެންބަރުންނާއި ސެކްރެޓޭރިއެޓް ފިޔަވައި އިތުރު ފަރާތްތަކަށް ބައިވެރިނުވެވޭނެ ކަމަށް މަޖިލީހުން ފާހަގަކޮށްފައިވެއެވެ.

Ad by Hajj Corporation

"ހެދިފައިހުރި ޤަވާއިދުތަކާ ޚިލާފަށް، ގަދަ ކަމުން، ވަދެގަނެ، އަޑު ގަދަކޮށް، ބައްދަލުވުން ކުރިއަށް ގެންދިޔުމަށް ހުރަސް އެޅި ބަޔަކު ނެރެން ޖެހުނީ،" މަމްދޫޙް ވިދާޅުވިއެވެ.

މި ހާދިސާއާ ގުޅިގެން މަމްދޫޙް ވިދާޅުވީ ނޫސްވެރިކަމުގެ ނިވާފަތްގަނޑުގައި ތިބެ، މަދު ބަޔަކު ހިންގާ މިފަދަ ނޭދެވޭ ޢަމަލުތަކުގެ ސަބަބުން، ޒިންމާދާރުކަމާއެކު ނޫސްވެރިކަން ކުރާ ގިނަ ފަރާތްތަކަށާއި މުޅި ނޫސްވެރިކަމުގެ ދާއިރާއަށް އޭގެ ނޭދެވޭ އަސަރު ކުރާނެ ކަމަށެވެ.

މަޖިލީހުގެ ބަޔާނުގައި ބުނެފައިވާ ގޮތުން، އެ ތިން ނޫސްވެރިން ކޮމިޓީ ކުރާ ކޮޓަރިއަށް ވަދެފައިވަނީ އެއީ ސިއްރު ބައްދަލުވުމެއްކަން އިންޓަރނަލް ސެކިއުރިޓީން އެންގުމަށްފަހުގައެވެ. އަދި އެ ނޫސްވެރިން ނެރެންޖެހުނީ ގަވާއިދާ ޚިލާފަށް ވަދެ، އަޑުގަދަކޮށް، ކޮމިޓީގެ މަސައްކަތަށް ހުރަސްއެޅުމުން ކަމަށް މަޖިލީހުން ބުނެފައިވެއެވެ.