ފަލަސްތީން މައްސަލަ ސުލްހަވެރިކަމާއެކު ހައްލުކުރުމަށް އެކުލަވާލާފައިވާ "ނިއުޔޯކް ޑެކްލަރޭޝަން" އަށް ދިވެހިރާއްޖެއިން ފުރިހަމަ އަށް ތާއިދުކުރާކަމަށް ޚާރިޖީ ވުޒާރާއިން ހާމަކޮށްފިއެވެ.

މި ޤަރާރަކީ އދ. ގެ 80 ވަނަ ޖެނެރަލް އެސެމްބްލީގެ ދެވަނަ ޕްލެނަރީ ބައްދަލުވުމުގައި ފާސްކުރެވުނު ޤަރާރެކެވެ.

Ad by Hajj Corporation

މި ގަރާރު ފާސްކުރުމަށް ވޯޓު ދިން 142 ޤައުމުގެ ތެރޭގައި ދިވެހިރާއްޖެ ހިމެނެއެވެ. އަދި 10 ގައުމަކުން ވަނީ މި ގަރާރާ ދެކޮޅަށް ވޯޓު ދީފައެވެ. އަދި 12 ގައުމަކުން ވަނީ ވޯޓުގައި ބައިވެރިނުވެ ވަކި ފަރާތަކަށް ވޯޓު ނުދީ ތިބެފައެވެ.

މި ޑެކްލަރޭޝަނަކީ 2025 ވަނަ އަހަރުގެ ޖުލައި 28 އިން 30 އަށް އދ. ގައި ބޭއްވުނު މަތީ ފެންވަރުގެ ބައިނަލްއަގަވާމީ ކޮންފަރެންސްގެ ނަތީޖާއެކެވެ. މި ކޮންފަރެންސް އިންތިޒާމުކޮށްފައިވަނީ ފްރާންސް އަދި ސައޫދީ އަރަބިއްޔާގެ އިސްނެގުމުގެ ދަށުންނެވެ.

ފޮރިން މިނިސްޓްރީން ނެރުނު ބަޔާނުގައި ފާހަގަކޮށްފައިވާ ގޮތުގައި، މި ޑެކްލަރޭޝަނުގައި މިނިވަން، ސިޔާދަތީ، އިޤްތިސާދީ ގޮތުން ދެމެހެއްޓެނިވި އަދި ޑިމޮކްރެޓިކް ފަލަސްތީން ދައުލަތެއް ގާއިމުކުރުމުގެ ސާފު ތަސައްވުރެއް ހިމެނެއެވެ. އަދި މީގެ އިތުރުން ބައިނަލްއަގްވާމީ ގާނޫނުގެ އުސޫލުތަކާއި، ސަރަހައްދީ ސަލާމަތާއި، އިންސާނީ ހައްގުތަކާއި، އަމިއްލަ ނިންމުންތައް ނިންމުމުގެ ހައްގު ހިމާޔަތްކުރުމުގެ މުހިންމުކަން ވަނީ ފާހަގަކޮށްފައެވެ.

ދިވެހިރާއްޖެއިން ވަނީ 1967 ގެ ކުރީގެ ބޯޑަރުތަކާއެކު، އިރުމަތީ ގުދުސް ވެރިރަށްކަމުގައި ހިމެނޭ ގޮތަށް، އދ. ގެ ކަމާބެހޭ ގަރާރުތަކާއި ބައިނަލްއަގްވާމީ ގާނޫނާ އެއްގޮތްވާ ގޮތުގެމަތިން މިނިވަން އަދި ސިޔާދަތީ ފަލަސްތީން ދައުލަތެއް ގާއިމުކުރުމަށް ތާއީދުކުރާކަން އަލުން ތަކުރާރުކޮށްފައެވެ.