ބަންޑާރަނައިބަކީ ހަމައެކަނި ސަރުކާރުގެ ގާނޫނީ ވަކީލަކަށް ވުމުގެ ބަދަލުގައި ރައްޔިތުންގެ ސަލާމަތާއި މަންފާއާއި އާންމު މިނިވަންކަން ދިފާއުކުރުމަށްޓަކައި މަސައްކަތްކުރަންޖެހޭ ފަރާތެއް ކަމަށް ބަންޑާރަނައިބު އަހްމަދު އުޝާމް ވިދާޅުވެއްޖެއެވެ.

ބަންޑާރަނައިބުގެ އޮފީހަށް 75 އަހަރު ފުރުމުގެ މުނާސަބަތުގައި ބޭއްވި ރަސްމީ ޖަލްސާގައި ވާހަކަފުޅު ދައްކަވަމުން ބަންޑާރަނައިބު ވިދާޅުވީ، ބަންޑާރަނައިބުގެ އޮފީހަކީ ދިވެހިރާއްޖޭގެ ގާނޫނީ ނިޒާމުގެ މައިގަނޑު އެއް ބިންގާ ކަމަށެވެ.

Ad by Hajj Corporation

ބަންޑާރަނައިބު ފާހަގަކުރެއްވި ގޮތުގައި، 25 އޮގަސްޓް 1950 ގައި ވަކި އޮފީހެއްގެ ގޮތުގައި ބަންޑާރަނައިބުގެ އޮފީސް ގާއިމުކުރެވުނީ ދިވެހިރާއްޖޭގެ ގާނޫނީ ނިޒާމު ތަރައްގީކުރުމަށް އެޅުނު ވަރަށް ހާއްސަ ފިޔަވަޅެއްގެ ގޮތުގައެވެ. އަދި 2008 ވަނަ އަހަރުގެ އާ ގާނޫނުއަސާސީއާ އެކު ބަންޑާރަނައިބުގެ މަސްއޫލިއްޔަތުތައް އިތުރަށް ފުޅާވެގެން ދިޔަކަން އޭނާ ފާހަގަކުރެއްވިއެވެ.

"ބަންޑާރަނައިބަކީ ހަމައެކަނި ސަރުކާރުގެ ގާނޫނީ ވަކީލަކަށް ވުމުގެ ބަދަލުގައި، އެއީ ދިވެހިރާއްޖޭގެ ގާނޫނުގެ ވެރިކަން ނަގަހައްޓައި ހިމާޔަތްކޮށް، ކުރިއަރުވައި، ރައްޔިތުންގެ ސަލާމަތާއި މަންފާއާއި އާންމު މިނިވަންކަން ދިފާއުކުރުމަށްޓަކައި މަސައްކަތްކުރަންޖެހޭ ފަރާތެއް،" ބަންޑާރަނައިބު އަހްމަދު ހުޝާމް.

އެ އޮފީހުގެ މުވައްޒަފުންނަކީ ނަޒާހާތްތެރި، އަހްލާގީ، އިތުބާރުހިފޭ އަދި އިންސާފުވެރި ބަޔަކަށް ވާންޖެހޭކަން ފާހަގަކުރައްވަމުން، ބަންޑާރަނައިބު ވިދާޅުވީ އެ މުއައްސަސާއަކީ މި ސިފަތަކުގެ މަތީގައި ސާބިތުވެ ހުރި މުއައްސަސާއެއް ކަމަށެވެ.

ޝަރުއީ ނިޒާމު ކުރިއެރުވުމަށާއި ގާނޫނީ އޮނިގަނޑު ތަރައްގީކުރުމަށް ކުރެވޭ މަސައްކަތުގައި ޝަރުއީ ދާއިރާއިންނާއި ރައްޔިތުންގެ މަޖިލީހުން ދެއްވާ އެއްބާރުލެއްވުން ފާހަގަކުރައްވަމުން، އެ ފަރާތްތަކަށް ހާއްސަ ޝުކުރެއް ވެސް ބަންޑާރަނައިބު އަރިސްކުރެއްވިއެވެ.