މި މަހުގެ ފުރަތަމަ 13 ދުވަސްތެރޭ ރާއްޖެއަށް 62,027 ފަތުރުވެރިން ޒިޔާރަތްކޮށްފައިވާކަމަށް ފަތުރުވެރިކަމާބެހޭ ވުޒާރާގެ ތަފާސްހިސާބުތަކުން ދައްކައިފިއެވެ.

މިއީ މިދިޔަ އަހަރުގެ މިމުއްދަތާ އަޅާބަލާއިރު 18.7 އިންސައްތައިގެ ކުރިއެރުމެކެވެ.

Ad by Hajj Corporation

އެ ވުޒާރާއިން ނެރެފައިވާ އެންމެ ފަހުގެ ތަފާސްހިސާބުތަކުން ދައްކާގޮތުގައި، މިއަހަރުގެ މިހާތަނަށް ރާއްޖެއަށް ޒިޔާރަތްކޮށްފައިވަނީ ޖުމްލަ 1.5 މިލިއަން ފަތުރުވެރިންނެވެ. މިއީވެސް މިދިޔަ އަހަރުގެ މިމުއްދަތުގައި ރާއްޖެއަށް ޒިޔާރަތްކުރި 1.4 މިލިއަން ފަތުރުވެރިންނާ އަޅާބަލާއިރު 9.7 އިންސައްތައިގެ އިތުރުވުމެކެވެ.

ތަފާސްހިސާބުތަކުން ދައްކާގޮތުގައި ރާއްޖެއަށް އެންމެ ގިނަ ފަތުރުވެރިން ޒިޔާރަތްކުރަނީ ޗައިނާއިންނެވެ. އެގޮތުން ޗައިނާއިން 245,553 ފަތުރުވެރިން ޒިޔާރަތްކޮށްފައިވާއިރު، ރަޝިއާއިން 186,263 ފަތުރުވެރިން، އިނގިރޭސިވިލާތުން 138,869 ފަތުރުވެރިން، އިޓަލީވިލާތުން 108,837 ފަތުރުވެރިން އަދި ޖަރުމަނުވިލާތުން 106,919 ފަތުރުވެރިން ރާއްޖެއަށް ޒިޔާރަތްކޮށްފައިވެއެވެ.

ސަރުކާރުން މިއަހަރަށް އަމާޒުކޮށްފައިވަނީ 2.3 މިލިއަން ފަތުރުވެރިން ރާއްޖެއަށް ގެނައުމަށެވެ. މިހާރު 1.5 މިލިއަން ފަތުރުވެރިން ޒިޔާރަތްކޮށްފައިވާއިރު، އަމާޒު ހާސިލުކުރުމަށް އިތުރު 700,000 ފަތުރުވެރިން ބޭނުންވެއެވެ. ފަތުރުވެރިކަމާބެހޭ ވުޒާރާއިން ވިދާޅުވެފައިވަނީ މިއަހަރަށް ކަނޑައެޅި އަމާޒު ހާސިލުވާނެކަމުގެ އުންމީދު ބޮޑުކަމަށެވެ.