ރާއްޖޭގެ ފުޓްބޯޅަ ސީޒަން ހުޅުވުމުގެ ގޮތުން ކުޅުނު އެފްއޭ ޗެރިޓީ ޝީލްޑް މެޗުގައި މާޒިޔާ ސްޕޯޓްސް އެންޑް ރެކްރިއޭޝަން، އީގަލްސް އާ ދެކޮޅަށް ކުޅުނު މެޗުން 2-0 ލަނޑުން ކާމިޔާބުކޮށްފިއެވެ. މިއީ މި ޝީލްޑް މާޒިޔާއިން ކާމިޔާބުކުރި ހަވަނަ ފަހަރެވެ.

ދޮޅު އަހަރަށްފަހު ރާއްޖޭގައި ފުރަތަމަ ޑިވިޝަންގެ މުބާރާތްތައް ފެށުމަށް ކުޅެވުނު މި މެޗުގައި މާޒިޔާގެ ފަރާތުން ލަނޑުތައް ޖަހައިދިނީ އަހުމަދު އައިހަމް އާއި ނާއިޒު ހަސަންއެވެ. ރަސްމީ ބޯޅަދަނޑުގައި ކުޅުނު މެޗުގައި ވާދަވެރި ކުޅުމެއް ދައްކައި، މެޗުގެ ފުރަތަމަ ހަމަލާ އުފެއްދީ އީގަލްސްއެވެ.

Ad by Hajj Corporation

މެޗުގެ ފުރަތަމަ ލަނޑު މާޒިޔާއަށް ލިބުނީ ފުރަތަމަ ހާފުގެ އިތުރު ވަގުތުގައި އައިހަމް ފޮނުވާލި ބޯޅަ އީގަލްސްގެ ކުޅުންތެރިއެއްގެ ގައިގައި ޖެހި ގޯލަށް ވަނުމުންނެވެ. ދެވަނަ ލަނޑު ޖެހީ 57 ވަނަ މިނެޓުގައި ނާއިޒު ހަސަންއެވެ. މިއީ އައިހަމް އޭރިޔާ ތެރެއަށް ވަދެ ހުރަސްކޮށްލި ބޯޅައެއް ގޯލް އޭރިޔާ ތެރެއިން ކީޕަރު ނުކުތް ވަގުތު ނާއިޒު ކާމިޔާބުކުރި ލަނޑެކެވެ.

މި މެޗުން މޮޅުވުމާއެކު މާޒިޔާއަށް ލިބުނު ޗެރިޓީ ޝީލްޑްގެ ފައިސާގެ އެއްބައި އެ ޓީމުން ވަނީ ރާއްޖޭގައި ލޮލުގެ ފެނުމުން މަހުރޫމްވެފައި ތިބޭ ކުދިންގެ ޖަމްއިއްޔާއަށް ހަދިޔާކޮށްފައެވެ. މެޗަށްފަހު ޝީލްޑް މާޒިޔާއާ ހަވާލުކޮށްދެއްވީ ކުޅިވަރު ވަޒީރު އަބްދުﷲ ރާފިއުއެވެ.

ފާހަގަކޮށްލެވޭ ކަމަކީ މާޒިޔާއިން އެންމެ ފަހުން ޗެރިޓީ ޝީލްޑް ކާމިޔާބުކޮށްފައިވަނީ 2023 ވަނަ އަހަރުގައެވެ.