މަހު ކުރިއަށްދާ އޭއެފްސީ ފުޓްސަލް އޭޝިއަން ކަޕްގެ ކޮލިފައިންގައި ވާދަކުރާ ގައުމީ ފުޓްސަލް ޓީމު މިޔަންމާއަށް ފުރައިފިއެވެ.

މި ފަހަރުގެ ފުޓްސަލް އޭޝިއަން ކަޕް ކޮލިފައިންގައި، ރާއްޖޭން މެޗުތައް ކުޅެން ޖެހެނީ މިޔަންމާގަ އެވެ. ރާއްޖޭގެ ގްރޫޕްގައި ހިމެނެނީ، މިޔަންމާ އާއި އަފްގާނިސްތާން އެވެ. ކޮލިފައިން ފުރަތަމަ މެޗުގައި، މި މަހު 20 ވަނަ ދުވަހު އަފްގާނިސްތާނާ ކުޅުމަށް ފަހު، ދެ ވަނަ މެޗުގައި، 22 ވަނަ ދުވަހު މިޔަންމާއާ ބައްދަލުކުރާނެ އެވެ.

Ad by Hajj Corporation

ކޮލިފައިންނަށް އެކުލަވާލި ގައުމީ ޓީމުގެ ފައިނަލް ސްކޮޑު އިއްޔެ އިއުލާނުކޮށްފައިވާއިރު، ޓީމުގައި 14 ކުޅުންތެރިން ހިމެނެއެވެ. އެއީ، އަހުމަދު އަޔާޒް (އަޔާ)، ސާމިން މުހައްމަދު (ސާންކޮ)، އަލީ ޝިޔާހު (ޝިޔަޅޭ)، އިސްމާއިލް ވަޖީހު (ވައްޖެ)، ހުސެއިން ސުހެއިލް (ސޮކޭ)، މުހައްމަދު ފާސިރު (ފާއްޓެ)، އަހުމަދު ރާހިލް (ރާއްކޮ)، އަލީ ޝަމާލް (ޝަންމު)، ހުޒައިފަތު ރަޝީދު (ހުޒޭ)، އިޝާން އިބްރާހިމް (ސައްޓު)، މުހައްމަދު އިމްރާން (އިންމި)، އަލީ ހާފިޒް (ހާއްޕެ)، އަބްދުﷲ ޒިމާމް، އަބްދުﷲ ނާސިހު އެވެ.

ޓީމުގެ ކޯޗަކީ މީގެ ކުރިން ޓީމުގެ އެސިސްޓަންޓް ކޯޗަކަށް ހުރި އަހުމަދު ނިޔާޒް (ނިޔާ) އެވެ. އެސިސްޓަންޓް ކޯޗަކީ މުހައްމަދު ފުހެއިދު (ޓޯޑު) އެވެ. އަދި، ޓީމުގެ މެނޭޖަރަކީ، މުހައްމަދު އުމެއިރު އެވެ.

ރާއްޖޭން އެންމެ ފަހުން ފުޓްސަލް އޭޝިއަން ކަޕްގެ ކޮލިފައިންގައި ކުޅެފައިވަނީ، 2023 ވަނަ އަހަރު އެވެ. އެ ފަހަރު، އޭޝިއާގެ ޗެމްޕިއަން އިރާން އަތުން 18-2 އިން ބަލިވިއިރު، ލެބަނަން އަތުން ބަލިވީ 6-1 އިންނެވެ. އަދި، ފަހު މެޗުުގައި ކިރްގިސްތާން އަތުން ބަލިވީ 8-3 އިންނެވެ.

އެންމެ ފަހުން ފީފާ އިން ނެރުނު ފުޓްސަލް ރޭންކިންގައި ރާއްޖެ އޮތީ ދުނިޔޭގެ 106 ވަނައިގަ އެވެ. އޭޝިއާގެ 26 ވަނަ އެވެ. އެއީ، ދެކުނު އޭޝިއާ ސަހަރައްދަށް ބަލާއިރު އެއް ވަނަ އެވެ. އިންޑިއާ އޮތީ 135 ވަަނައިގަ އެވެ. ދެން މި ފަހަރު ކޮލިފައިންގައި ކުޅޭ ޕާކިސްތާން އާއި ބަންގްލަދޭޝް އަދި ރޭންކްކޮށްފައެއް ނުވެ އެވެ.