ކޮޅުމަޑުލު މަޑިފުށީގެ އިޚްތިޞާޞްގައި އެ އަތޮޅު އުފުރިޔާއާއި ކޮޅުފުށި ހިމެނުއްވުމަށް ރައީސުލްޖުމްހޫރިއްޔާ ޑރ.މުހައްމަދު މުޢިއްޒު ނިންމަވައިފިއެވެ.

އެމަނިކުފާނު މިގޮތަށް ނިންމަވާފައިވަނީ، ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނުގެ 1-56 ވަނަ މާއްދާގެ (ހ) އިން، ދިވެހިރާއްޖޭގެ އެންމެހައި އިދާރީ ދާއިރާތަކުގައި ހިމެނޭ ސިޓީ ކައުންސިލްތަކާއި ރަށު ކައުންސިލްތަކުގެ އިޚްތިޞާޞް ކަނޑައެޅުމަށް ރައީސުލްޖުމްހޫރިއްޔާއަށް މަތިކޮށްފައިވާ މަސްއޫލިއްޔަތުގެ ދަށުން ނެރުއްވި ރައީސުލްޖުމްހޫރިއްޔާގެ ޤަރާރަކުންނެވެ.

Ad by Hajj Corporation

މިއީ ރައީސުލްޖުމްހޫރިއްޔާ ގެ ވަޢުދުފުޅުގައި ހިމެނިވަޑައިގަންނަވާ ކަމެކެވެ.

މަޑިފުށީގެ އިޚްތިޞާޞަށް ގެނައި ބަދަލު ދައްކުވައިދޭ ޗާޓު ޖަދުވަލުކޮށް، މި ޤަރާރު މިހާރު ވަނީ ދިވެހި ސަރުކާރުގެ ގެޒެޓުގައި ޝާއިޢު ކުރައްވާފައެވެ.

މިދިޔަ އަހަރުގެ ފެބްރުއަރީ މަހު މަޑިފުއްޓަށް ވަޑައިގެން ރައީސް ވަނީ، އެ ރަށާ އުފުރިޔާއާ ގުޅާލަދޭނެ ކަމަށާއި ކޮޅުފުށި ވެސް އެރަށު އިހުތިޞާސްގެ ތެރޭގައި ހިމަނުއްވައިދެއްވާނެ ކަމަށް ވައުދުވެވަޑައިގެންފައެވެ.

އޭގެއިތުރަށް، މަޑިފުށި ކައުންސިލަށް އިގުތިޞާދީ ފުރުސަތުތައް ފަހިކޮށްދެއްވާނެ ކަމަށް އޭރު އެ މަނިކުފާނު ވިދާޅުވެފައިވެއެވެ.