އިންޓަރ ސްކޫލު ވޮލީ ބޯޅަ މުބާރާތް 2025 ގެ ނަވާރަ އަހަރުން ދަށުގެ ޗެމްޕިއަންކަން ހުރާ ސްކޫލުން ރެކޯޑަކާއެކު ހޯދައިފިއެވެ.

ވޮލީ ބޯލް އެސޯސިއޭޝަނުން ސްކޫލްތަކަށް ހުޅުވާލައިގެން ބޭއްވި މި މުބާރާތުގެ 19 އަހަރުން ދަށުގެ މި ޗެމްޕިއަންކަން ހުރާ ސްކޫލުން ހޯދީ މުބާރާތުގައި ކުޅުނު އެއްވެސް މެޗަކުން ބަލިނުވެ، ހުރިހާ މެޗެއްގައިވެސް މޮޅުވުމުގެ ރެކޯޑަކާއެކުގައެވެ.

Ad by Hajj Corporation

އިއްޔެ ހަވީރު ކުޅުނު ފައިނަލް މެޗުގައި ހުރާ ސްކޫލުން ވަނީ ވ. ކެޔޮދޫ ސްކޫލާ ކުރިމަތިލައި، ސީދާ ތިން ސެޓުން މޮޅުވެފައެވެ. މި މެޗުގައި ހުރާ ސްކޫލުން ސެޓުތައް ކާމިޔާބުކުރީ 25-12، 25-21 އަދި 25-15 އިންނެވެ.

މުބާރާތުގެ ޗެމްޕިއަން ޓީމަށް ތައްޓާއި މެޑެލް ހަވާލުކޮށްދެއްވީ ފައިނަލް މެޗުގެ ޝަރަފްވެރި މެހެމާނު، ކޮމިޝަނަރ އޮފް ސްޕޯޓްސް މުޙައްމަދު ޠަލާލެވެ.

މުބާރާތުގެ އެންމެ މޮޅު ކުޅުންތެރިޔާގެ މަޤާމު ހޯދީ ހުރާ ސްކޫލުގެ އައިޝަތު ދީމާ ނަދީމެވެ. އަދި އެންމެ މޮޅު ކޯޗުގެ މަޤާމު ހާސިލުކުރީ ތަޖުރިބާކާރު ކޯޗު މުޙައްމަދު ނަދީއެވެ.

މުބާރާތުގެ އެންމެ މޮޅު ހަ ކުޅުންތެރިންގެ ތެރޭގައި ހުރާ ސްކޫލުގެ އައިޝަތު ދީމާ ނަދީމް، މަރިޔަމް ހަމްނާ މުޙައްމަދު، އައިޝަތު ޔުމްނު ޝާހިދު، ފާތުމަތު ނާޔާ ނައުޝާދު އަދި ކެޔޮދޫ ސްކޫލުގެ ފާތުމަތު ޒައިނާ ރަޝީދު، އައިމިނަތު ރައިހާނަތު ފާއިޒު ހިމެނެއެވެ.

މި ކާމިޔާބީއާއެކު ހުރާ ސްކޫލުން ވަނީ އިންޓަރ ސްކޫލު ވޮލީ ބޯޅަ މުބާރާތުގެ ތާރީޚުގައި ފާހަގަކޮށްލެވޭ ރެކޯޑެއް ޤާއިމުކޮށްފައެވެ.