މެންޗެސްޓަރ ސިޓީގެ ސްޓްރައިކަރު އާލިންގ ހާލަންޑް ޗެމްޕިއަންސް ލީގުގައި 50 ގޯލު ހަމަކުރުމާއެކު، މި ސީޒަނުގެ ޗެމްޕިއަންސް ލީގުގެ ފުރަތަމަ ބުރުގައި 10 ކުޅުންތެރިންނާއެކު ކުޅުނު ނަޕޯލިއާ ދެކޮޅަށް 2-0 އިން ސިޓީ މޮޅުވެއްޖެއެވެ.

ނަޕޯލީގެ ކެޕްޓަން ޖިއޮވާނީ ޑި ލޮރެންޒޯ ހާލަންޑް އަށް ފުރަތަމަ ހާފުގެ 21 ވަނަ މިނެޓުގައި ކުރި ފައުލަކާއި ގުޅިގެން ރަތް ކާޑު ދެއްކުމާއެކު މެޗުގެ ބޮޑުބައެއް އެޓީމުކުޅެން ޖެހުނީ 10 ކުޅުންތެރިންނާއެކީގައެވެ. މިއާއެކު ޑިފެންޑަރެއް ނެތްތަން ފޫބައްދަން ނަޕޮލީ އަށް މަޖުބޫރިވީ ސިޓީގެ ކުރީގެ ކުޅުންތެރިޔާ ކޭޑީބީ ދަނޑުން ބާލާށެވެ.

Ad by Hajj Corporation

މިމެޗުގެ ފުރަތަމަ ގޯލު ހާލަންޑް ޖެހީ މެޗުގެ 56 ވަނަ މިނެޓުގައެވެ. މިއީ ޗެންޕިއަންސް ލީގުގައި ހާލަންޑް ޖެހި 50 ވަނަ ގޯލެވެ. ސިޓީގެ ނަންބަރު 9 ހާލަންޑް ޗެމްޕިއަންސް ލީގުގައި 50 ގޯލު ހަމަކުރީ އެންމެ 49 މެޗުން ކަމަށްވާއިރު، މިއީ މި މުބާރާތުގެ ތާރީހުގައި އެއްވެސް ކުޅުންތެރިއަކު މިހާ އަވަހަށް 50 ގޯލު ހަމަކުރި ފުރަތަމަ ފަހަރެވެ.

ސިޓީގެ ދެވަނަ ގޯލު ޖަހާދީފައިވަނީ ރެއިންޑާސް ގެ އެސިސްޓަކާއެކު ޑޯކޫ އެވެ.

ސިޓީ ދެން ޗެމްޕިއަންސް ލީގުގައި ކުޅޭނީ އޮކްޓޯބަރު 1 ގައި މޮނާކޯއާ ދެކޮޅަށެވެ. ނަމަވެސް މިވަގުތު ޓީމުގެ އަމާޒު ހުރީ އާދިއްތަ ދުވަހު ޕްރިމިއަރ ލީގުގައި އާސެނަލްއާ ދެކޮޅަށް ކުޅޭ މުހިންމު މެޗަށެވެ.