މިމަހުގެ 21 ވަނަ ދުވަހުގެ ފަހުން އިމްޕޯޓް އެކްސްޕޯޓާއި ގުޅުންހުރި އެންމެހައި ޚިދުމަތްތައް ލިބެން ހުންނާނީ ހަމައެކަނި "ޓްރޭޑިއަން" ޕޯޓަލް މެދުވެރިކޮށްކަމަށް ޓްރޭޑް ނެޓުން ހާމަކޮށްފިއެވެ.

ދައުލަތުގެ މީޑިއާގެ ޕްރޮގްރާމެއްގައި ވާހަކަދައްކަވަމުން ޓްރޭޑް ނެޓްގެ ޖެނެރަލް މެނޭޖަރ އައިސީޓީ އަހްމަދު ސަމޫން ވިދާޅުވި ގޮތުގައި، މިހާރު ޓްރޭޑިއަން ޕޯޓަލްގައި 17 އެޖެންސީ ހަރަކާތްތެރިވަމުންދެއެވެ. އަދި މިމަހުގެ 21 ގެ ފަހުން އިމްޕޯޓް އެކްސްޕޯޓާއި ގުޅުންހުރި ހިދުމަތްތައް ލިބޭނީ ހަމައެކަނި މި ޕޯޓަލް މެދުވެރިކޮށް ކަމަށްވުމާއެކު،ހިދުމަތް ހޯދާ ފަރާތްތަކުން ވީހާވެސް އަވަހަކަށް ރަޖިސްޓްރީކުރުމަށް އޭނާ އިލްތިމާސްކުރެއްވިއެވެ.

Ad by Hajj Corporation

ނެޝަނަލް ސިންގަލް ވިންޑޯ "ޓްރޭޑިއަން" އަކީ ދިވެހި ވިޔަފާރިވެރިންނަށް ލުއިފަސޭހަ ގޮތްތަކެއް މަގުފަހިކޮށްދިނުމަށް ފަރުމާކޮށްފައިވާ ޕްލެޓްފޯމެކެވެ. މި ޕްލެޓްފޯމަކީ އިމްޕޯޓް، އެކްސްޕޯޓް ވިޔަފާރީގެ ބޭނުންތަކަށް އެކި އިދާރާތަކުން ހޯދަންޖެހޭ ޚިދުމަތްތައް، އޮންލައިންކޮށް އެއް ޕްލެޓްފޯމެއްގެ ތެރެއިން ލިބޭނެގޮތަށް ފަރުމާކޮށްފައިވާ ނިޒާމެކެވެ.

ކަޓްއޮފްގެ މާނައަކީ 21 ސެޕްޓެމްބަރުގެ ފަހުން ޓްރޭޑިއަން ސިސްޓަމް ތެރެއިންނޭ އެޕްލިކޭޝަންސްތައް ބަލައިގަނާނެކަމަށް ސަމޫން ވިދާޅުވިއެވެ.

ޓްރޭޑިއަން ޕޯޓަލްގައި ރަޖިސްޓްރީވުމަށް ހުޅުވާލީ މިއަހަރުގެ އޭޕްރީލް 20 ގައެވެ. މިހާތަނަށް 58 އަށްވުރެ ގިނަ ޝިޕިން އެޖެންޓުންނާއި 70 އަށްވުރެ ގިނަ ފްރައިޓް ފޯވާޑަރުން ވަނީ ރަޖިސްޓްރީވެފައެވެ. މި ޕްލެޓްފޯމް ރަސްމީކޮށް އިފްތިތާޙްކޮށްފައިވަނީ މިދިޔަ އަހަރުގެ ސެޕްޓެމްބަރު މަހުއެވެ.