މޫސުމަށް އަންނަ ބަދަލުތަކާއި ކަނޑުގެ ލޮނުގަނޑު އުފުލުމުގެ ނުރައްކަލާ ކުރިމަތިލުމުގައި ތައުލީމުގެ މުހިންމުކަމާ ގުޅޭގޮތުން ހަޔާ އެޑިއުކޭޝަން މިނިސްޓަރު ޑރ. އަލީ ހައިދަރު އަޙްމަދު, "ކްރިއޭޓިވް އެޑިއުކޭޝަން ސަމިޓް 2025" ގައި ވާހަކަފުޅު ދައްކަވައިފިއެވެ.

ރާއްޖެއަކީ އެވްރެޖްކޮށް ކަނޑުގެ ލޮނުގަނޑުން 1.5 މީޓަރު އުސްމިނުގައި އޮންނަ، 1000 އަށްވުރެ ގިނަ ރަށްތަކެއް ހިމެނޭ ގައުމެއްކަން މިނިސްޓަރު ފަހަގަކުރެއްވިއެވެ.

Ad by Hajj Corporation

އެންމެ އެކަހެރި ރަށްތަކުގައި ދިރިއުޅޭ ކުދިންނަށް ވެސް ތައުލީމު ލިބޭނެ މަގު ތަނަވަސްކޮށްދިނުމާއި، ރަށްރަށުގައި މަސައްކަތްކުރާ މުދައްރިސުންގެ ތަމްރީނާއި ކުރިއެރުމަށް ބައިނަލްއަގްވާމީ އެހީތެރިކަން ހޯދުމާއި، އިއާދަކުރަނިވި ހަކަތައާއި، ދެމެހެއްޓެނިވި ފަތުރުވެރިކަމާއި، ނޫ އިގްތިސާދުގެ ދާއިރާތަކުން ޒުވާނުން ބާރުވެރިކުރުވުމުގެ މައްޗަށް ވެސް މިނިސްޓަރު އަލިއަޅުވާލެއްވިއެވެ.

އެމަނިކުފާނު ވިދާޅުވީ، މޫސުމަށް އަންނަ ބަދަލުތަކުގެ ސަބަބުން އެންމެ ބޮޑަށް އަސަރުކުރާ ގައުމުތަކުގެ ތެރޭގައި ހިމެނޭ ދިވެހިރާއްޖެ ފަދަ ޤައުމުތަކަށް، މި ގޮންޖެހުންތަކާ ކުރިމަތިލާއިރު ތައުލީމީ ދާއިރާއަށް ކުރާ އިންވެސްޓްމަންޓަކީ ދުނިޔޭގެ އެންމެންގެ ޒިންމާއެއްގެ ގޮތުގައި ދެކެންޖެހޭ ކަމެއްކަމަށެވެ.

އަދި މިކަމަކީ ދެމެހެއްޓެނިވި ގޮތެއްގައި ކުރިއަށް ދިއުމަށާއި، ދިމާވާ ގޮންޖެހުންތަކާ ކުރިމަތިލުމުގެ ގާބިލުކަން އިތުރުކުރުމަށް ކޮންމެހެން މުހިންމު ކަމެއްކަން ވެސް އެމަނިކުފާނު ފާހަގަކުރެއްވިއެވެ.

މި ސަމިޓަކީ ތައުލީމީ ދާއިރާގައި ކުރިމަތިވާ ގޮންޖެހުންތަކާއި، އޭގެ ހައްލުތައް ހޯދުމަށް ބައިނަލްއަގްވާމީ ފެންވަރުގައި މަޝްވަރާކުރުމަށް ބޭއްވޭ މުހިންމު ބައްދަލުވުމެކެވެ.