މޫސުމަށް އަންނަ ބަދަލުތަކާ ގުޅިގެން ހާލަތާ ގުޅޭގޮތަށް ބަދަލުވުމަކީ އެއްވެސް ޤައުމެއްގެ ޤައުމީ ބުރައެއް ނޫން ކަމަށާއި، އެއީ މުޅި ދުނިޔެއަށް ކުރިމަތިވެފައިވާ ގޮންޖެހުމެއް ކަމަށް ދިވެހިރާއްޖޭގެ ފަތުރުވެރިކަމާ ތިމާވެއްޓާ ބެހޭ ވުޒާރައިގެ މިނިސްޓަރު ޠާރިޤް އިބްރާހިމް ވިދާޅުވެއްޖެއެވެ.

މިކަން މިނިސްޓަރު ފާހަގަކުރެއްވީ، 'ކޮޕް30'ގެ ކުރިން ބޭއްވުނު "މޫސުމަށް އަންނަ ބަދަލުތަކާ ގުޅިގެން ހާލަތާ ގުޅޭގޮތަށް ބަދަލުވުމާ ބެހޭ މަތީ ފެންވަރުގެ މަޝްވަރާ ބައްދަލުވުން: އެޑެޕްޓޭޝަންގެ ތަންފީޒުކުރުމާއި އިންވެސްޓްމަންޓް އަވަސްކުރުން" މި ބައްދަލުވުމުގެ ތެރެއިންނެވެ.

Ad by Hajj Corporation

މިނިސްޓަރު ޠާރިޤް ވިދާޅުވީ، "އެޑެޕްޓޭޝަން" ނުވަތަ ހާލަތާ ގުޅޭގޮތަށް ބަދަލުވުމަކީ ޤައުމީ ބުރައެއް ނޫން ކަމަށާއި، އެއީ ބައިނަލްއަޤްވާމީ ގޮންޖެހުމެއް ކަމުގައެވެ. ދިވެހިރާއްޖެ ފަދަ ޤައުމުތަކަށް މިކަމުގެ ހައްލުތައް އޮތީ ހަމައެކަނި އަޅުގަނޑުމެންގެ އަމިއްލަ ސަރަހައްދުތަކުގައި ނޫން ކަމަށާއި، އެއީ ދުނިޔޭގެ ނިޒާމެއްގެ ތެރެއިން ހައްލުކުރަންޖެހޭ ކަމެއް ކަމުގައި ވިދާޅުވިއެވެ. އެ ނިޒާމަކީ މިކަމުގެ މުހިންމުކަމާއި، ފުޅާ ދާއިރާއާއި، ހަމަހަމަކަން ބަލައިގަންނަ ނިޒާމެއް ކަމުގައިވެސް އެމަނިކުފާނު ފާހަގަކުރެއްވިއެވެ. އެގޮތުން، "އެއްވެސް ފަރާތެއް ބާކީ ނުކޮށް" ހުރިހާ އެންމެނަށް ހަމަހަމަ ގޮތެއްގައި މި ގޮންޖެހުންތަކުން އަރައިގަނެވޭނެ މަގެއް ފަހިކުރުމަށް މިނިސްޓަރު ޠާރިޤް ވަނީ ގޮވާލައްވާފައެވެ.

މި ބައްދަލުވުމުގެ ބޭނުމަކީ، "ކޮޕް30"ގެ ކުރިން މޫސުމަށް އަންނަ ބަދަލުތަކާ ގުޅިގެން ހާލަތާ ގުޅޭގޮތަށް ބަދަލުވުމުގެ މަސައްކަތްތައް އަވަސްކުރުމާއި، މިކަމަށް ބޭނުންވާ މާލީ އެހީތެރިކަން އިތުރުކުރުމެވެ. ދުނިޔޭގެ މޫސުމަށް އަންނަ ބަދަލުތަކުގެ ސަބަބުން ދިވެހިރާއްޖެ ފަދަ ކުދި ރަށްވެހި ޤައުމުތަކަށް ކުރިމަތިވާ ނުރައްކާތަކުގެ މައްޗަށް މިނިސްޓަރުގެ ވާހަކަފުޅުގައި އަލިއަޅުވާލާފައިވެއެވެ. މިފަދަ ޤައުމުތަކަށް އެކަނި މި ގޮންޖެހުންތަކާ ކުރިމަތިލެވޭނެ ގޮތެއް ނޯންނާނެ ކަމަށާއި، ބައިނަލްއަޤްވާމީ އެހީތެރިކަމާއި އެއްބާރުލުން ވަރަށް މުހިންމު ކަމަށް މިނިސްޓަރު ވަނީ ހާމަކުރައްވާފައެވެ.