ކުޅުދުއްފުށި ސިޓީގެ ތަރައްޤީއަށް ރޭވިފައިވާ އިޤްތިޞާދީ ކަންކަމުގެ މަޢުލޫމާތު ހިއްސާކޮށްފި އެވެ.

އިގްތިސާދީ ތަރައްގީއާ ވިޔަފާރިއާ ބެހޭ ވަޒީރު މުހައްމަދު ސައީދުވަނީ އިޤުތިޞާދީ ތަރައްޤީއާއި ވިޔަފާރިއާ ބެހޭ ވުޒާރާއާއި ބިޒްނަސް ސެންޓަރ ކޯޕަރޭޝަން (ބީސީސީ) އިން ގުޅިގެން އިއްޔެ ކުޅުދުއްފުށި ސިޓީގެ ވިޔަފާރިތަކަށް އަމާޒުކޮށްގެން ކުރިއަށްގެންދިޔަ މަޢުލޫމާތު ދިނުމުގެ ސެޝަންގައި ބައިވެރިވެވަޑައިގެންފައެވެ.

Ad by Hajj Corporation

މިކަމާ ގުޅޭގޮތުން ވަޒީރު ވިދާޅުވީ ކުޅުދުއްފުށީގައި ފަންނުވެރި އެކިމަސައްކަތްކުރާ ބައެއްފަރާތްތަކާއި، ވިޔާފާރީގެ އެކިކަންކަމުގައި އުޅުއްވާ ފަރާތްތަކާއިއެކު ބައްދަލުވެ ފުޅާދާއިރާއެއްގައި މަޝްވަރާކޮށްލައްވަން ފުރުސަތު ފަހިވެގެންދިއުމަކީ ލިބިވަޑައިގެންނެވި ވަރަށް ބޮޑު އުފަލެއް ކަމުއެވެ.

ވަޒީރު ވިދާޅުވީ އިއްޔެ، ކުޅުދުއްފުށި ސިޓީގެ ގިނަ ފަރާތްތަކަކާއެކު ބައްދަލުވެ ހިޔާލުބަދަލުކޮށްލަން ފުރުސަތު ލިބިވަޑައިގެންނެވި ކަމަށާއި، ރައީސް ޑރ. މުޢިއްއްޒުގެ ސަރުކާރުން، އެސިޓީގެ ތަރައްޤީއަށް ރޭވިފައިވާ މަސައްކަތްތަކުގެ ތެރޭގައި ހިމެނޭ އިޤްތިޞާދީ ކަންކަމުގެ މަޢުލޫމާތުވެސް އެފަރާތްތަކާ ހިއްސާކުރައްވާފައިވާ ކަމަށެވެ.

މިގޮތުން "ކުޅުދުއްފުށި ބިޒްނަސް ބްރީފް" ގެ ނަމުގައި އިއްޔެ ބޭއްވެވި މި ސެޝަންގައި، ވިޔަފާރި ރަޖިސްޓްރީކުރުމާއި، ކްރިއޭޓިވް އިކޮނޮމީގެ ފުރުޞަތުތަކާއި، ކުރިއަށް އޮތް އެމްއެސްއެމްއީ އެވޯޑްސްގެ މައްޗަށް އަލިއަޅުވާލާފައިވެއެވެ.

މީގެ އިތުރުން އެ ސިޓީގެ ވިޔަފާރިވެރިންނާއެކު ސުވާލާއި ޖަވާބު ސެޝަނެއްވެސް ވަނީ ކުރިއަށްގެންގޮސްފައެވެ.

މި މަޢުލޫމާތު ސެޝަން ކުރިއަށްގެންގޮސްފައިވަނީ ވަޒީރު ސަޢީދު ކުޅުދުއްފުށި ސިޓީއަށް ކުރެއްވި ރަސްމީ ދަތުރުފުޅުގެ ތެރެއިންނެވެ.