ތ. ކަނޑޫދޫ ބަދަރުގައި ވަކި ޖެޓީއެއް ޤާއިމްކުރުމުގެ މަޝްރޫޢުގެ އެއްބަސްވުމުގައި މިއަދު ސޮއިކޮށްފިއެވެ.

މި އެއްބަސްވުމުގައި ސޮއިކޮށްފައި ވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކޮޅުމަޑުލަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން މިއަދު ކަނޑޫދޫއަށް ކުރެއްވި ޒިޔާރަތުގެ ތެރެއިންނެވެ.

Ad by Hajj Corporation

މިނިސްޓްރީ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރ އިން ކަނޑޫދޫ ބަނދަރުގައި ޖެޓީ ޤާއިމްކުރުމުގެ މަޝްރޫޢުގެ މަސައްކަތް ހަވާލުކޮށްފައި ވަނީ މޯލްޑިވްސް ޓްރާންސްޕޯރޓް އެންޑް ކޮންޓްރެކްޓިންގ ކޮމްޕެނީ (އެމް.ޓީ.ސީ.ސީ) އާ އެވެ.

މި އެއްބަސްވުމުގައި މިނިސްޓްރީގެ ފަރާތުން ސޮއިކުރެއްވީ މިނިސްޓަރ ޑރ. ޢަބްދުﷲ މުއްޠަލިބްއެވެ. އަދި އެމް.ޓީ.ސީ.ސީގެ ފަރާތުން ސޮއިކުރެއްވީ އެކުންފުނީގެ މެނޭޖިންގ ޑިރެކްޓަރ ޑީސީޕީ (ރިޓަޔާރޑް) އަހްމަދު ސައުދީއެވެ.

މި މަސައްކަތަށް 7,495,200.00 (ހަތް މިލިއަން ހަތަރު ލައްކަ ނުވަދިހަ ފަސް ހާސް ދުއިސައްތަ) ރުފިޔާ ޚަރަދުވާނެ ކަމަށް ލަފާކުރެވޭއިރު، މަސައްކަތް ނިންމުމަށް 150 ދުވަހުގެ މުއްދަތެއް ކޮންޓްރެކްޓަރަށް ދީފައިވެއެވެ.

މި މަޝްރޫޢުގެ ދަށުން ތ. ކަނޑޫދޫ ބަނދަރުގައި ކުރިއަށްގެންދިއުމަށް ހަމަޖެހިފައިވާ މައިގަނޑު މަސައްކަތަކީ، ބަނދަރު ބޭރުތޮށްޓާއި އިންވެގެން 150 މީޓަރު ދިގުމިނުގެ އަދި 2 މީޓަރު ފުޅާ ކޮންކްރީޓް ޖެޓީއެއް ހެދުމެވެ.

މި ޖެޓީ ޤާއިމްކުރުމުން ކަނޑޫދޫ ބަނދަރުގެ ބޭނުންކުރުން އިތުރަށް ފަސޭހަވެ، ރައްޔިތުންނަށް ލުއިފަސޭހަ ކަމާއެކު ދަތުރުފަތުރުގެ ޚިދުމަތްތައް ލިބިގެންދާނެ ކަމަށް މިނިސްޓްރީން ވިދާޅުވެއެވެ.