ތ. ކަނޑޫދޫގެ ފެނާއި ނަރުދަމާގެ ނިޒާމު ގާއިމުކުރަން ހަވާލުކުރި ކުންފުނިން އެ މަޝްރޫއުުގެ 96 އިންސައްތަ މަސައްކަތް ނިންމާފައިވާ ކަމަށް ބުނެ ސަރުކާރަށް އޮޅުވާލާފައިވާ މައްސަލައެއް އެ ރަށުގެ ރައްޔިތުންނާ އެކު ބޭއްވެވި ބައްދަލުވުމުގައި ރައީސް ޑރ. މުހައްމަދު މުއިއްޒު ސަމާލުކަމަށް ގެންނަވައިފި އެވެ.

އަތޮޅުތެރެއަށް ރައީސް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން ކަނޑޫދޫ ރައްޔިތުންނާ ބައްދަލުކުރައްވައި ރައީސް ވިދާޅުވީ އެ އަތޮޅުގެ އިތުރުން ވ. މ އަދި ފ. އަށް މި ބުރުގައި ކުރެއްވި ދަތުރުފުޅުގައި ވަރަށް ގިނަ ކަންކަން ސާފުވެފައިވާ ކަމަށެވެ.

Ad by Hajj Corporation

މަޝްރޫއުތަކާ ގުޅޭ ގޮތުން ކުންފުނިތަކުން ސަރުކާރަށް އޮޅުވާލާފައިވާކަން އެނގިވަޑައިގެންފައިވާކަން ހާމަކުރައްވަމުން ރައީސް ވިދާޅުވީ، ކަނޑޫދޫގެ ފެނާއި ނަރުދަމާ ނިޒާމުގެ މަޝްރޫއު ހަވާލު ކޮށްފައިވާ ކުންފުނިން ސަރުކާރުގެ ކަމާ ބެހޭ އިދާރާތަކަށް ދީފައިވާ މައުލޫމާތާއި ކޮށްފައި ހުރި މަސައްކަތުގައި ތަފާތުތަކެއް އެބަހުރި ކަމަށެވެ.

ކަނޑޫދޫގެ ފެނާއި ނަރުދަމާ ނިޒާމުގެ މަޝްރޫއު ހަވާލު ކޮށްފައިވާ ކުންފުނިން ސަރުކާރަށް އޮޅުވާލާފައިވާކަމަށް ރައީސް ވިދާޅުވި ނަމަވެސް އެއީ ކޮން ކުންފުންޏެއް ކަމެއް އެމަނިކުފާނު ހާމަ ކުރައްވާފައިނުވެއެވެ.

ރައީސް ވަނީ މައްސަލަ ވަރަށް ސީރިއަށް މައްސަލައެއްގެ ގޮތުގައި ބަލާނެކަމަށް ވިދާޅުވެފައެވެ. މި މަޝްރޫއު ޓާމިނޭޓުކޮށްފައި އެމްޑަބުލިއުއެސްސީއާ ހަވާލުކުރެވިދާނެކަމަށާއި ނަމަވެސް އެއީ އެންމެ ރަނގަޅު ގޮތްކަމަށް ނުވާތީ އަދިވެސް މަސައްކަތް ކުރަނީ އެ ކުންފުނި މެދުވެރިކޮށް މަސައްކަތް ނިންމޭތޯކަމަށް ރައީސް ވިދާޅުވިއެވެ.

ރައީސް ވަނީ ރަށްރަށުގައި ކުރިއަށްގެންދާ ތަރައްގީގެ މަޝްރޫއުތައް ހުއްޓުމުގައި އޮތީ ފައިސާގެ ދަތިކަން ނޫންކަމަށް ވިދާޅުވެފައެވެ.