ފިލިޕީންސްގައި ކުޅެމުންދާ 2025 ވަނަ އަހަރުގެ އެފްއައިވީބީ ވޮލީބޯޅަ ފިރިހެނުންގެ ވޯލްޑް ޗެމްޕިއަންޝިޕްގެ ފުރަތަމަ ސެމީފައިނަލް ޓިކެޓް ޑިފެންޑިންގ ޗެމްޕިއަން އިޓަލީން ހޯދައިފިއެވެ. ޕާސޭ ސިޓީގައި ބުދަ ދުވަހު ކުޅުނު ފުރަތަމަ ކުއާޓަރ ފައިނަލްގައި އިޓަލީން ވަނީ ބެލްޖިއަމް ސީދާ ތިން ސެޓުން ބަލިކޮށްފައެވެ.

ޕޫލް މަރުހަލާގައި ބެލްޖިއަމްގެ އަތުން ލިބުނު ބަލިވުމުގެ ބަދަލު ހިފުމުގެ ގޮތުން އިޓަލީން ފުރަތަމަ ސެޓުން ފެށިގެން ކުޅުނީ ވަރަށް ހަރުކަށި ކުޅުމެކެވެ. މިޑްލް ރޮބަޓޯ ރުސޯގެ ކިލް ބްލޮކަކުން ނިންމާލި ފުރަތަމަ ސެޓް އިޓަލީން ކާމިޔާބުކުރީ ބޮޑު ތަފާތަކުންނެވެ.

Ad by Hajj Corporation

ދެވަނަ ސެޓުގައި ބެލްޖިއަމްގެ ކުޅުން ކުޑަކޮށް ރަނގަޅުވި ނަމަވެސް، އިޓަލީގެ ވަރުގަދަ ކުޅުމުގެ ކުރިމަތީގައި އެޓީމަށް ހިފަހަށްޓާނުލެވުނެވެ. އަދި މި ސެޓްވެސް ނިމުނީ ރުސޯގެ ބްލޮކަކުންނެވެ. ތިންވަނަ ސެޓުގައި 10-10 އާ ހަމައަށް ބެލްޖިއަމްއަށް ހަމަހަމަކޮށް ހިފަހަށްޓާލެވުނުނަމަވެސް، އޭގެ ފަހުން އިޓަލީން ލީޑުނަގައި، މެޗް 3-0 (25-13، 25-18، 25-18) ސެޓުން ވަނީ ނިންމާލާފައެވެ.