ތުރުކީވިލާތުގެ ރައީސް ރަޖަބު ޠައްޔިބު އަރުދޮއާން އެމެރިކާއަށް ކުރައްވަމުންގެންދަވާ ދަތުރުފުޅުގެ ތެރެއިން، ދެ ޤައުމުގެ ދެމެދުގައި އިސްތިރާޖީ ނިއުކްލިއަރ އެއްބަސްވުމެއްގައި ބުރާސްފަތި ދުވަހު ސޮއިކޮށްފިއެވެ.

މި އެއްބަސްވުމުގައި ސޮއިކުރެއްވީ ވައިޓް ހައުސްގައި ބޭއްވުނު ރަސްމިއްޔާތެއްގައި، ދެ ޤައުމުގެ އިސްވެރިންގެ ހާޒިރުގައެވެ.

Ad by Hajj Corporation

ތުރުކީވިލާތުގެ އެނަރޖީ މިނިސްޓަރު އަލްޕަރސްލާން ބައިރަކްޓަރު އެކްސްގައި ހިއްސާކުރެއްވި ޕޯސްޓެއްގައި ވިދާޅުވެފައިވަނީ، "އަޅުގަނޑުމެން ވަނީ ނިއުކްލިއަރ ހަކަތައިގެ ދާއިރާގައި ތުރުކީވިލާތާއި އެމެރިކާއާ ދެމެދު އޮތް ފުން އަދި ބަހުރުވަތަކެއް އެކުލެވޭ ޕާޓްނަރޝިޕް އިތުރަށް ފުޅާކުރުމަށް އައު މަރުޙަލާއެއް ފަށާފައި" ކަމަށެވެ.

މި އެއްބަސްވުމުގެ އިތުރުން، ތުރުކީވިލާތުން ވަނީ މި ދަތުރުފުޅުގައި އިތުރު ބޮޑު ހަކަތައިގެ އެއްބަސްވުމެއްގައިވެސް ސޮއިކޮށްފައެވެ. އެގޮތުން، ސަރުކާރުގެ ބޯޓާސް ކުންފުނިން ވަނީ ސުވިޒަލޭންޑްގެ މަރކޫރިއާ އަދި އޮސްޓްރޭލިއާގެ ވުޑްސައިޑް އެނަރޖީއާއެކު ޖުމްލަ 75.8 ބިލިއަން ކިއުބިކް މީޓަރުގެ އެލް.އެން.ޖީ (ދިޔާ ގުދުރަތީ ގޭސް) އެތެރެކުރުމުގެ އެއްބަސްވުމެއްގައި ސޮއިކުރައްވާފައެވެ.

އެނަރޖީ މިނިސްޓްރީގެ އިސް އޮފިޝަލެއް ކަމުގައިވާ ޔޫސުފް ސެއިލާން ރޮއިޓަރޒްއަށް ދެއްވި އިންޓަވިއުއެއްގައި ވިދާޅުވެފައިވަނީ، "ތުރުކީވިލާތުގެ ނިއުކްލިއަރ ހަކަތައިގެ ޤާބިލުކަން އިތުރުކޮށް، އައު ޕަވަރ ޕްލާންޓްތައް އިމާރާތްކުރުމުގެ ލަނޑުދަނޑިތަކަށް އެމެރިކާއިން ވަރަށް ބޮޑު ޝައުޤުވެރިކަމެއް ދައްކަވާ" ކަމަށެވެ.