އޯސީސީން ހުޅުމާލޭގައި ހިންގާ އައުޓްލެޓެއްގައި އިންނަ ކޭޝިއަރަށް ހަމަލާދިނުމަށްފަހު ފޭރުނު މައްސަލައެއް ފެންމަތިވެއްޖެއެވެ.

ފުލުހުންގެ މީޑިއާ އޮފިސަރު "މެންދުރު ޓީވީ" އަށް މައުލޫމާތުދެއްވަމުން ވިދާޅުވީ، އެ ފިހާރައިގެ ކޭޝިއަރަށް ތޫނު އެއްޗަކުން ހަމަލާދީ ފޭރުނު މައްސަލައެއް މިއަދު މެންދުރު 12:45 ހާއިރު ރިޕޯޓުކޮށްފައިވާ ކަމަށެވެ.

Ad by Hajj Corporation

މި މައްސަލައިގައި އަނިޔާވެފައި ވަނީ އޯސީސީ ފިހާރައިގައި މަސައްކަތްކުރާ ނޭޕާލަށް ނިސްބަތްވާ އުމުރުން 21 އަހަރުގެ އަންހެނަކަށެވެ.

ހަމަލާގައި ލިބުނު އަނިޔާތަކަށް އެ ކޭޝިއަރަށް ހުޅުމާލޭ ހޮސްޕިޓަލުގައި ފަރުވާދެމުންދާކަމަށް ވެސް އޮފިސަރު ވިދާޅުވިއެވެ. އެ މީހާއަށް ލިބުނު އަނިޔާގެ ތަފްސީލް އަދި ލިބިފައެއް ނުވެއެވެ.

މި މައްސަލައިގައި އަދި މިހާތަނަށް އެއްވެސް މީހަކު ހައްޔަރުކޮށްފައެއް ނުވެއެވެ.

މި މައްސަލަ ފުލުހުން ގެންދަނީ ތަހުގީގުކުރަމުންނެވެ.