މީހެއްގެ އެކައުންޓުން މަކަރާއި ހީލަތުން 92،000 ރުފިޔާ އަތުލި މައްސަލައެއްގައި ދެ މީހަކު ފުލުހުން ހައްޔަރުކޮށްފިއެވެ.

ފުލުހުން ހާމަކުރި ގޮތުގައި މި މައްސަލައަކީ މި މަހުގެ 17 ވަނަ ދުވަހު ހުށަހެޅުނު މައްސަލައެކެވެ. މި ފައިސާ އަތުލާފައިވަނީ ޓެލެގްރާމް ގުރޫޕަކުން ދިމާވި މީހަކު ފޮނުވި ލިންކަކަށް ވަދެ، އޯޓީޕީ (OTP) ކޯޑު ހިއްސާކުރުމުން ހިންގި ގޮތް ނޭނގޭ ޓްރާންސެކްޝަނެއް މެދުވެރިކޮށެވެ. މައްސަލަ ހުށަހެޅުމާއެކު ފުލުހުން ކުރި ތަހުގީގީ މަސައްކަތުން ވަނީ ފައިސާ ޖަމާކޮށްފައިވާ އެކައުންޓުގެ ވެރިފަރާތާއި މިކަމުގައި ބައިވެރިވި އިތުރު މީހަކު ދެނެގަނެފައެވެ.

Ad by Hajj Corporation

މި މައްސަލައާ ގުޅިގެން ކޯޓު އަމުރެއްގެ ދަށުން މި މަހުގެ 18 ވަނަ ދުވަހު ހައްޔަރުކޮށްފައިވަނީ ހއ. ހޯރަފުށީ، ފައިންޕާކް، އުމުރުން 23 އަހަރުގެ މުހައްމަދު ފަޒީލާއި، ގދ. ފިޔޯރީ، ފައިންބީޗް، އުމުރުން 23 އަހަރުގެ އަބްޝަރު ރަޝީދެވެ. މި ދެ މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، ކޯޓުން ވަނީ އެ ދެ މީހުން 15 ދުވަހުގެ މުއްދަތަށް ބަންދުގައި ބޭތިއްބުމަށް އަމުރުކޮށްފައެވެ.

ފުލުހުން މި މައްސަލަ އިތުރަށް ތަހުގީގުކުރަމުންދާއިރު، މިފަދަ ސްކޭމްތަކުން ރައްކާތެރިވުމަށް އާންމުން ސަމާލުވުމަށް ވަނީ އިލްތިމާސްކޮށްފައެވެ. އެގޮތުން، އޮންލައިންކޮށް ފޮނުވާ ގޮތް ނޭނގޭ ލިންކުތަކަށް ނުވަނުމަށާއި، އެއްވެސް ފަރާތަކާ އޯޓީޕީ ކޯޑު ހިއްސާނުކުރުމަށް ފުލުހުން ވަނީ އެދިފައެވެ. އަދި އޮންލައިންކޮށް ވިޔަފާރިކުރުމާއި ފައިސާގެ މުއާމަލާތްތައް ހިންގުމުގައި މުއާމަލާތުކުރެވޭ ފަރާތުގެ ސައްހަކަން ކަށަވަރުކުރުމަށާއި، ޒާތީ މައުލޫމާތާއި ބޭންކިން ތަފުސީލުތައް އެހެން ފަރާތްތަކާ ހިއްސާނުކުރުމަށް ވެސް ފުލުހުން ވަނީ އިރުޝާދު ދީފައެވެ.