20 ރަށެއްގެ ރައްޔިތުންނަށް ފެނާއި ނަރުދަމާގެ އަސާސީ ޚިދުމަތް ނުލިބި އެތައް އަހަރެއް ވެގެން ގޮސްފައިވުމަކީ އެކަން ބަލައި އިހުމާލުވި ފަރާތްތަކަށް ފިޔަވަޅު އެޅެންޖެހޭ ކަމެއްކަމަށް ކޮންސްޓްރަކްޝަން އަދި އިންފްރާސްޓްރަކްޗާ މިނިސްޓަރު ޑރ. އަބްދުﷲ މުއްތަލިބު ވިދާޅުވެއްޖެއެވެ.

މިނިސްޓަރު މުއްތަލިބު އެކްސްގައި ކުރެއްވި ޕޯސްޓެއްގައި ވިދާޅުވި ގޮތުގައި، 20 ރަށެއްގައި ފެނާއި ނަރުދަމާ އެޅުމަށް ފެނަކައާ ސަރުކާރުން ޙަވާލުކުރި އަގަށްވުރެ ބޮޑުކޮށް ސަބް ކޮންޓްރެކްޓްކޮށްފައި ވަނީ މާލިއްޔަތު ޤަވާޢިދުގެ ދަށުން ނަގަންޖެހޭ ހުއްދަ ނެގުމެއްނެތިއެވެ.

Ad by Hajj Corporation

''މިކަމުގެ ސަބަބުން ފެނަކައަށް އެތައް ސަތޭކަ މިލިއަން ރުފިޔާގެ ގެއްލުންވުމުގެ އިތުރަށް އެ ޕްރޮޖެކްޓްތައް ހިންގުމަށް އިތުރަށް ޚަރަދުކުރަން ޖެހުމާއި އަދި 20 ރަށެއްގެ ރައްޔިތުންނަށް ފެނާއި ނަރުދަމާގެ އަސާސީ ޚިދުމަތް ނުލިބި އެތައް އަހަރެއް ވެގެން ގޮސްފައިވުމަކީ އެކަން ބަލައި އިހުމާލުވި ފަރާތްތަކަށް ފިޔަވަޅު އެޅެންޖެހޭ ކަމެއް.'' މުއްތަލިބު ވިދާޅުވެފަވެއެވެ.

އޮޑިޓަރ ޖެނެރަލްގެ އޮފީހުން 25 ސެޕްޓެމްބަރު 2023 ގައި ނެރުނު ފެނަކައިގެ ހާއްސަ އޮޑިޓް ރިޕޯޓުގައި ފާހަގަކޮށްފައިވާ ގޮތުން، 2023 ވަނަ އަހަރު ނިމުނުއިރު ފެނަކަ ކޯޕަރޭޝަނުގެ ދަރަނި 379 ޕަސެންޓަށް އިތުރުވެފައިވެއެވެ. މިކަން މިގޮތަށް ދިމާވެފައިވަނީ ކުންފުންޏަށް ލިބުނު އާމްދަނީ ނުވަތަ ދައުލަތުން ޓެރިފްލޮސްގެ ގޮތުގައި ދިން ފައިސާ ނުފުދިގެނެއް ނޫންކަމަށް ރިޕޯޓުގައި ބުނެފައިވެއެވެ.

އޮޑިޓް ރިޕޯޓުން ހާމަވި ގޮތުގައި، 2021 އާއި 2023 އާ ދެމެދު ފެނަކައިން ހިދުމަތާއި ތަކެތި ހޯދަން އެކި ފަރާތްތަކާ ހަވާލުކުރި 2.2 ބިލިއަން ރުފިޔާގެ މަސައްކަތުގެ ތެރެއިން 1.3 ބިލިއަން ރުފިޔާގެ މަސައްކަތް ހަވާލުކޮށްފައިވަނީ ވާދަވެރި ބީލަމަކާ ނުލައި، އުސޫލުން ބޭރުންނެވެ. މީގެ އިތުރުން، އާ އިންޖީނުގެތަކާއި އޮފީސް އިމާރާތްތައް އެޅުމަށް މާކެޓް ރޭޓަށް ވުރެ 767.3 މިލިއަން ރުފިޔާ އިތުރަށް ހަރަދުކޮށްފައިވާކަން ވެސް ފާހަގަކުރެވިފައިވެއެވެ.

އޮޑިޓަރ ޖެނެރަލް ވިދާޅުވެފައިވަނީ މިއީ "މެދުވެރިވި" ހާލަތެއް ނޫން ކަމަށާއި، "ކުރިމަތިކުރި" ހާލަތެއް ކަމަށް ބެލުމުގެ ފުރުސަތު އޮތް ކަމަށެވެ.