ބުއެނޯސް އައިރެސް، 28 ސެޕްޓެމްބަރު 2025 – އާޖެންޓީނާގެ ވެރިރަށް ބުއެނޯސް އައިރެސްގައި މަސްތުވާތަކެތީގެ ވިޔަފާރިކުރާ ގޭންގަކުން ތިން އަންހެން ކުދިން ވަރަށް އަނިޔާވެރިކޮށް މަރާލައިފި އެވެ.

މި ހިތާމަވެރި ޢަމަލު ހިންގާފައިވަނީ އިންސްޓަގްރާމް މެދުވެރިކޮށް ލައިވްކޮށްގެން ކަމަށް ރިޕޯޓްތައް ބުނެ އެވެ.

Ad by Hajj Corporation

މި ހާދިސާގައި މަރާލެވުނު ކުދިންނަކީ 20 އަހަރުގެ ދެ ކޮއްކޮ އާއި، 15 އަހަރުގެ އަންހެން ކުއްޖެކެވެ. މި ޢަމަލު ހިންގާފައިވަނީ މަސްތުވާތަކެތީގެ ވިޔަފާރީގެ ތެރެއިން ދިމާވި މައްސަލަތަކަކާ ގުޅިގެން ކަމަށް ފުލުހުން ބުނެ އެވެ.

ލައިވްކޮށްގެން މި ޢަމަލު ހިންގާފައިވާތީ މުޅި ދުނިޔެއަށް މި ހާދިސާގެ ސީރިއަސްކަން އިތުރަށް ހާމަވެގެން ގޮސްފައިވެ އެވެ.

މި ޖަރީމާއާ ގުޅިގެން މިހާތަނަށް 5 މީހުން ހައްޔަރުކޮށްފައިއެވެ. މި މީހުންގެ ތެރޭގައި 3 ފިރިހެނުންނާއި 2 އަންހެނުން ހިމެނެ އެވެ. ނަމަވެސް، މި ޢަމަލުގެ އިސް ރޭވުންތެރިޔާ ކަމަށް ބެލެވޭ 20 އަހަރުގެ ޕެރޫގެ ރައްޔިތެއް އަދިވެސް ފިލައިގެން އުޅޭ ކަމަށް ފުލުހުން ބުނެ އެވެ. އޭނާ ހޯދުމުގެ މަސައްކަތް ކުރަމުން އަންނަކަމަށް ވެސް އެ ގައުމުގެ ފުލުހުން ވަނީ ބުނެފައެވެ.

މި ހާދިސާއާ ގުޅިގެން އާޖެންޓީނާގެ ރައްޔިތުން ވަރަށް ބޮޑަށް ކަންބޮޑުވެ، ހިތާމަ ފާޅުކޮށްފައިވެ އެވެ. ގިނަ އަދަދެއްގެ ބަޔަކު ވަނީ އެކި ސިޓީތަކުގައި ހަޅުތާލުކޮށް، މަސްތުވާތަކެތީގެ ވިޔަފާރިކުރާ ގޭންގުތަކުގެ ނުރައްކާ ހުއްޓުވުމަށާއި، މި ޖަރީމާގެ ހުރިހާ މުޖުރިމުންގެ މައްޗަށް އިންސާފު ގާއިމުކުރުމަށް ގޮވާލާފަ އެވެ.